شه‌فه‌ق نيوز/ "ميعاد جبورى" ئافره‌ته جه‌نگاوه‌ر عراقى وه كڵاو سه‌ربازيه‌و له‌بان سه‌رپووشه‌گه‌ى جوور چشتيگ ئه‌ڵڵاجه‌ويه له‌ناونى سه‌دان پياو له‌وانه‌گ جه‌نگ ئه‌كه‌ن ئه‌را هاوردنه‌وه‌ى ئاواييگ له‌ژير ده‌سڵات ريكخرياگ ترۆريستى داعش له باكوور عراق.
ميعاد، داڵگ په‌نج مناڵه، ته‌نيا ئافره‌تيگه له‌ڕزه‌يل هيز هاوبه‌ش له سوپاى عراقى و فه‌سيله‌يل عه‌شايرى ك په‌لامار ئاوايى كه‌نعوس دا ئه‌را ئازادكردنى له‌ژير ده‌سڵات ريكخرياگ ترۆريستى داعش.
ميعاد جوور هه‌ر يه‌كيگ له‌و پياوه‌يله ك هانه دورگردى له‌وه‌ر خوسه‌و كينه‌تى له ريكخرياگ داعش چه‌ك خه‌ڵگرت، ئه‌و ريكخرياگه ك رويوه‌ر فريه‌يگ له وڵات داگير كرد له‌وه‌رجه دوساڵ و پيسترين شيوازه‌يل سزا هاورده كار كار و له‌وانه‌يش كوشتن شماره‌يگ له رووڵه‌يل بنه‌ماڵه‌گه‌ى.
وه‌لێ ته‌نيا وجوود ى له مه‌يدان جه‌نگ چه‌واشه‌ى گشت ئه‌و نه‌ريته‌يله‌سه له كومه‌ڵگا ك له‌تى رۆڵ ئافه‌ته ده‌رخه‌ێد، هه‌ر وه‌و خاتريشه ميعاد له‌ناونى گوزارشه‌يل خوه‌شنه‌وايى له پياوه‌يل ده‌ورگردى ئويشێد: گشت ئه‌و سه‌ربازه‌يله برامن و منيش شانازى وه‌پيانه‌و ئه‌كه‌م، ئه‌و چه‌كداره‌يل داعشيشه هاتنه ئه‌را ويرانكردن عراق و ئه‌و سه‌گه‌يله بايه‌سه بسزنيم.
ميعاد وه‌ل وتن ئه‌و قسه‌يله له‌بان جه‌نگ، ئه‌را ماوه‌ى 10 رووژه په‌يوه‌ندى كرده‌سه فه‌سيل " شيره‌يل دجله" و ته‌نانه‌ت زويتريش هويچ شاره‌زاييگ له‌باره‌ى جه‌نگ نه‌ياشتگه.
ئى فه‌سيليشه يه‌كيگه له‌و ده‌يان فه‌سيله‌يله ك ئه‌را پشتگيرى هيزه‌يل پياده‌ى عراقى ده‌ركه‌فت له موسڵ له هه‌ڵمه‌تيگ وه پشتگيرى وڵاته‌يل يه‌كگرتگ له ئوكتۆبه‌ر/ ته‌شرين يه‌كه‌م ك ئامانج له كرده‌وه‌يليان له‌ناوبردن ريكخرياگ داعشه.
ميعاد هه‌رچه‌نى تفه‌نگ كلاشينكۆف ها شانيه‌و، وه‌لێ هيمان يه‌ك گوله‌يش وه‌پى نه‌ته‌قان له جه‌نگ رووژ چوارشه‌ممه و له مه‌سافه‌ى كه‌ميگ له خه‌ت نوايين وسياوێد.
ميعاد وه‌بى ئه‌وه‌گ هويچ ترسيگ داشتوود له جه‌نگ و گوله‌ى قازيفه‌ى مورته‌ر، ئويشيد: ڕى وه‌پيم نايه‌ت بچمه به‌ره‌ى جه‌نگ راسكانى و ئه‌ڕام ترسيه‌ن، وه‌لێ من ئه‌خوازم وه‌ليانا به‌شدارى له به‌ره‌ى نوايين جه‌نگ بكه‌م.
ميعاد باس له‌وه كرد ك له‌ماوه‌ى ئه‌و دوساڵه ك له‌ژير ده‌سڵات ريكخرياگ داعش بويه خه‌وه‌ر ره‌سانه‌سه هيزه‌يل ئاسايش عراقى له‌باره‌ى جموجويل تونڕه‌وه‌يل و هويچ وه‌ختيگيش پابه‌ند نه‌ويه وه فه‌رمانه‌يليان.
ميعاد و خيزانه‌گه‌ى له تاوسان درچين له كه‌نعوس و تيكه‌ڵ هه‌زاران كووچبه‌ر عراقى بوين له كه‌مپيگ له هه‌رێم كوردستان، ك ده‌زگاى ئاسايش هاوسه‌ره‌گه‌ى ده‌سگير كرد و خستنه‌ى زيندان.
ميعاد هووكار زيندانيكردن هاوسه‌ره‌گه‌ى نازانێد و وت: شايه‌ت له‌وه‌ر گومان له ناوه‌گه‌ى وه‌ل ناو كه‌سيگ تر گومانليكرياگ گيرياوێد، يا كه‌سيگ خوسه‌ى له‌لى هاتگه‌و تومه‌تبارى كردگه وه ئه‌وه‌گ په‌يوه‌ندى وه تونڕه‌وه‌يله‌و ديرێد، وه‌لێ من بزانم هويچ تاوانيگ نه‌ياشتگه.
دوياى ده‌سگيركردن هاوسه‌ره‌گه‌ى، ميعاد چى وره‌و باشوور تكريت و مناڵه‌يلى له‌لاى يه‌كيگ له ژنه‌يل قه‌وم خوه‌ى هيشته‌جى ك ته‌مه‌نيان ها ناونى 1 تا 9 ساڵان، تا وه‌ختيگ له جه‌نگ ئه‌ياده‌و.
وه‌ل ئه‌وه‌يشا هاوسه‌ره ده‌سگيركريايه‌گه‌ى ميعاد هويچ زانيارييگ له‌باره‌ى ژنه‌گه‌ى نه‌يرێد وه‌ل فه‌سيليگ چه‌كدار، ميعاد ئويشيد: پياوه‌گه‌م رازى نيه، وه‌لێ ئه‌زانێد من گورگم و جه‌نگاوه‌رم و جوور پياويگم.
فه‌سيل شيره‌يل دجله(اسود دجله)ك له‌لايه‌ن حكومه‌ت عراقيه‌و پشتگيرى ئه‌كريه‌ێد، پيكهاتنه له بڕيگ جايه‌ڵ جوان ناوچه‌يى، ك فريه‌يگ له‌ليان له سوپا بويه‌و دووس و ئه‌زيزه‌ليليان وه‌ده‌س تونڕه‌وه‌يل له‌ده‌سدانه.