شه‌فه‌ق نيوز/ هه‌زاران مناڵ له باوگ و داڵگه‌يليان جيا بوين له‌و جه‌نگه ك ئه‌را ماوه‌ێ 9 مانگ دريژه داشت له‌وه‌ر ئازادكردن موسڵ وه‌ل ساڵه‌يليگيش زويتر له ده‌سڵات ريكخرياگ ترۆريستى داعش له باكوور عراق.
بڕيگ مناڵ گومبوێ دوينريانه‌و وه ته‌نيا گه‌رديان له‌ناو ويرانه‌يل و ترس له گيانيان نيشتوێد، بڕيگيش په‌يوه‌ندێ كردنه ڕزه‌يل ئه‌و كووچبه‌ره‌يله ك له‌تاو ويرانه‌و جه‌نگ كاولكار واين وه‌ره‌و شوونه‌يل تر.
له حاڵه‌ته‌يليگيش مه‌رگ چاره‌نويس باوگ و داڵگه‌يليان بوێ،، ئه‌ندامه‌يل خيزان له وه‌خت واين چويچيان له ئاكام جه‌نگ جاده‌و په‌لاماره‌يل ئاسمانى يا له‌تاو زوڵم چه‌كداره‌يل ريكخرياگ و فريه‌يگيش تويش شۆك هاتن له سه‌ختى ئه‌و كرده‌وه‌يله هاته تويشيان.
وه‌و خاتريشه مقه‌يه‌تيكردن مناڵه‌يل بويچگ و گرده‌وكردنيان وه‌ل خيزانه‌يليان بويه ئه‌ركيگ هه‌ڵه‌په‌ڵه له‌وه‌رده‌م ريكخرياگه‌يل كار ئنسانى.
له‌ى باوه‌تيشه‌و شاره‌زايگ له مقه‌يه‌تيكردن مناڵه‌يل له ريكخرياگ نه‌ته‌وه‌يل يه‌كگرتگ (يونسێف) ئه‌و مناڵه‌يله هانه وه‌رده‌م مه‌ترسى فريه خه‌ته‌رناك و زوورميانيش وه ئه‌زموونه‌يل پڕ ژان گوزه‌ر كردنه.
رووژيگ له مانگ ته‌شرين يه‌كه‌م گوزه‌يشت، مه‌ريه‌م 9 ساڵان خيزانه‌گه‌ێ هيشته‌جى ئه‌را ئه‌وه‌گ سه‌ردان داپيره‌ێ بكا له خوه‌رئاواێ موسڵ ك له‌و وه‌خته‌يله له‌ژير ده‌سڵات ريكخرياگ ترۆريستى داعش بوێ و دوياێ ئه‌وه‌يش په‌لاماره‌يل هيزه‌يل عراقى ده‌س وه‌پيكرد ئه‌را هاوردنه‌وه‌ێ شاره‌گه‌و مه‌ريه‌م ناچار بوێ له‌ورا بميننێد.
حه‌سه‌ن باوگ مه‌ريه‌م ك پۆليس بوێ و له كاره‌گه‌ێ واز هاورد له‌وه‌ختيگ تونڕه‌وه‌يل موسڵ داگير كردن له ساڵ 2014، خوه‌ێ و هاوسه‌ره‌گه‌ێ له ترسه‌و وه‌ل مه‌ريه‌م و هه‌رسێ خوه‌يشكه‌گه‌ێ جيواز بوين ئه‌را ماڵيگ تر.
له ماڵيگ ويرانه ك هيمان بنيايه‌گه‌ێ ته‌مام نه‌كرياوێد، خيزانيگ له‌تى ژياو حه‌سه‌ن وت: ئيمه چه‌ن جاريگ جيواز بويمنه، وه‌لێ مه‌ريه‌م و داپيره‌ێ مه‌ندن له‌وه‌ختيگ پيه‌ڵه‌يل به‌سيا و هاتوچوو له بانيان نه‌كريا.
دوياخريش ئه‌و خيزانه واين ئه‌را كه‌مپ حه‌سه‌ن شام كووچبه‌ره‌يل، وه‌لێ مه‌ريه‌م له ديم خوه‌رئاوا له شاره‌گه تواناى ده‌رچگنى نه‌مه‌ند.
دوياێ ماوه‌يگ له‌وه‌خت زاڵبوين هيزه‌يل حكومى له‌بان ناوچه‌گه له مانگ حزه‌يران گوزه‌يشت، مه‌ريه‌م و داپيره‌ێ تويه‌نستن بڕه‌سنه كه‌مپ ئه‌لخازر و باوگى داوا له يونسێف كرد ده‌سميه‌تى بيه‌ێد و له‌ڕى وه‌رپرسه‌يل ئه‌و ريكخرياگه ره‌سيه دويه‌ته‌گه‌ێ.
ريكخرياگ يونسێف ئويشيد مناڵه‌يليگ دوينريانه‌سه‌و له حاڵه‌ت شوك بوينه له ناوڕاس ويرانه‌يليگ يا له‌ناو تونێله‌يل موسڵ، ك بڕيگ له‌ليان خيزانه‌يليان له‌ده‌سدانه له‌وه‌خت واين وه‌ره‌و ئه‌مان و بڕيگيش له باوگ و داڵگه‌يليش جارجاريگ ناچار بوينه واز له مناڵه‌يليان بارن و وڵيان بكه‌ن له‌لاى كه‌سه‌يل تر.
به‌ياننامه‌يگيش باس له‌وه كرد ك زوورم مناڵه‌يل ناچار جه‌نگ و كوشتار كريانه يا ئه‌نجامداين كرده‌وه‌يل تون وتيژێ و بڕيگيش له مناڵه‌يل تويش ئستغلال جنسى هاتنه.
ماريا سيلفام له ريكخرياگيگ له هه‌ولێر ئويشێد: شماره‌ێ ئه‌و مناڵه‌يله ك له ماوه‌ێ مانگه‌يل گوزه‌يشت كه‌ميگ له موسڵ ده‌رچينه زياێ كردگه وه‌تايبه‌ت له‌وه‌خت جه‌نگ.
باس له‌وه‌يش كريه‌ێد ك بڕيگ له مناڵه‌يل بويچگ گه‌ردن له ناو جاده‌يل و بڕيگيش له‌ليان ئستغلال كريه‌ێد و ئه‌و خيزانه‌يليشه ك ماڵه‌يليان له‌ده‌سدانه يا له جه‌نگ واينه تواناێ روێ وه‌ڕوێ بوينه‌وه‌ێ مه‌ينه‌تى فيشتر نه‌يرن.
وه‌ل ئه‌وه‌يشا چه‌وه‌ڕێ ئه‌كريه‌ێد وه‌جبه‌يل تازه‌يگ له مناڵه‌يل گومبوێ ده‌ربكه‌ن وه‌ل وه‌رده‌وامێ جه‌نگ و شكه‌ست ريكخرياگ ترۆريستى داعش له‌ئاكام په‌لاماره‌يل حكومى ئه‌را هاوردنه‌وه‌ى شار ته‌لعه‌فه‌ر ك ئه‌و ريكخرياگه له‌بانى ده‌سڵات گرتگه.