شه‌فه‌ق نيوز/ ماڵپه‌ڕ"ئامه‌د نيوز" ئۆپۆزسيۆن ئيرانى راپۆرتيگ بڵاو كرد و له‌تى باس له‌وه كرد ك بلۆكه ته‌ڵايه‌يل سه‌دام حسێن سه‌رۆك وه‌رين عراقى، له‌لايه‌ن موجته‌با خامه‌نه‌يى كوڕ دويه‌م رابه‌ر ئيرانى درياگه‌و فروشياسه بازرگانيگ هندى.
ماڵپه‌ڕه‌گه له زووان سه‌رچه‌وه‌يگ تايبه‌ت له ته‌ياره‌خانه‌ى مهرئاباد له‌ناوڕاس ته‌هران، وت: له 6 يۆليۆ ته‌ياره‌يگ سه‌ر وه بازرگانيگ هه‌ندى وه‌ناو ئه‌نجيل جاندل نيشته‌سه‌وه‌و بلۆكه ته‌ڵايه‌يل سه‌دام حسێن سه‌رۆك وه‌رين عراقى جيواز كردگه ك له‌لايه‌ن موجته‌با خامه‌نييه‌و له بانك ناوه‌ندى عراقه‌و دزريانه له‌وه‌خت رميان رژيم به‌عس.
وه‌گووره‌ى سه‌رچه‌وه‌گه ك ناوى ئه‌را هووكاره‌يل ره‌سانن ئاشكرا نه‌كرياگه، دوياى رميان رژيم به‌عس عراق، موجته‌با خامه‌نه‌يى له‌رێ جه‌نراڵ ره‌حيمى ده‌سميته‌ده‌رێ ك په‌يوه‌ندێ وه‌ل ليوا محه‌مه‌د عه‌لى جه‌عفه‌رى سه‌ركرده‌ى گشتى ئيسه‌ى هيزه‌يل پاسه‌وان شۆڕش ئيرانى ديرێد، ئه‌و بلۆكه ته‌ڵايه‌يله جيواز كردگه ئه‌را ده‌يشت عراق.
سه‌رچه‌وه‌گه باس له‌وه‌يش كرد، موجته‌با خامه‌نه‌يى بڕيگ له‌و بلۆكه ته‌ڵايه‌يله له بازاڕ ته‌هران فرووشتگه له‌وه‌ر خاتر دوباره دروسكردنه‌وه‌ى و ئاشكرا نه‌كردنى دوياى تاواننه‌وه‌ى و ئاماژه وه‌يه‌يش كرد ك به‌شه‌يل گه‌ورايگ له‌و بلۆكه‌يله فرووشياسه بازرگانيگ هندى وه پيشنيار جه‌نراڵ ره‌جه‌بى ك ئه‌رك جيوازكردنى له عراقه‌و گرتوێده خوه‌ى وه فه‌رمان موجته‌با خامه‌نه‌يى.
سه‌رچه‌وه‌گه يه‌يش ده‌رخست ك ئه‌و بازرگان هنديه جه‌خت له‌وه كردگه ئه‌و بلۆكه ته‌ڵايه‌يل عراقيه جيواز ئه‌كا ئه‌را وڵاته‌گه‌ى و تاونيده‌يانه‌و دوياره سياغه‌تيان ئه‌كاو له‌ناو هند و له‌ده‌يشت ئه‌و وڵاته ئه‌فرووشيده‌يان.
جى باسه، دوياى هاتن هيزه‌يل ئه‌مريكييش ئه‌را عراق و رمانن رژيم سه‌دام حسێن له‌ساڵ 2003، ده‌زگايه‌يل حكومى و بانكه‌يل فريه‌يگ عراقى تويش تاڵانكردن و دزێ هاتن له‌لايه‌ن لايه‌نه‌يليگ ناوخوه‌يى و ده‌ره‌كى و حزبه‌يل سه‌ر وه رژيم ئيرانى.