شه‌فه‌ق نيوز/ دوياێ سێ ساڵ له ده‌سوه‌پيكردن په‌لاماره‌يل ئاسمانى ئه‌مريكى دژ بنگه‌يل ريكخرياگ ترۆريستى داعش، شاره‌زايه‌يل و چه‌ودێره‌يل باوه‌ڕيان ئه‌وه‌سه ك ريكخرياگ داعش له دويا رووژه‌يلى ژيه‌ێد له عراق و سوريا.
له 7 ئاب 2014 باراك ئۆباما سه‌رۆك وه‌رين ئه‌مريكى له واشنتۆنه‌و ئاشكراێ داين سڵا وه هيزه‌يل وڵاته‌گه‌ێ كرد وه ئه‌نجامداين په‌لاماره‌يل ئاسمانى دژ ريكخرياگ ترۆريستى داعش له عراق.
ئۆباما له‌و رووژه ئاشكراێ پيشكه‌شكردن ده‌سميه‌ت هه‌ڵه‌په‌ڵه‌يگ ئه‌را حكومه‌ت عراقى و هيزه‌يل كورد كرد له‌وه‌ر پشتگيرى جه‌نگيان دژ ريكخرياگ داعش ك له‌و وه‌خته شه‌نگاڵ داگير كردوێد و هه‌تك وه مه‌ردمه‌گه‌ێ كرد له كه‌مينه‌يل ئێزيدێ.
رووژيگ دوياتر، وزاره‌ت وه‌رگرى ئه‌مريكه ئاشكراێ وه ئامانجگرتن دو ته‌ياره‌يل جه‌نگى 18 F/A كرد ك داعش هاورده‌يانه كار دژ هيزه‌يل كورد و چه‌ك وه‌ده‌سه‌يل ئه‌مريكى.
ته‌ياره‌يليگيش له وه‌خت خوه‌ێ له‌ناو هه‌ڵگر ته‌ياره‌يل USS جۆرج بۆش له كه‌نداوه‌و هه‌ڵسيان.
دوياێ ده‌سوه‌پيكردن ئه‌و په‌لاماره‌يل ئاسمانيه وه ماوه‌ى كه‌ميگ وه تايبه‌ت له 10ى ئه‌يلوول/ سپته‌مبه‌ر، وڵاته‌يل يه‌كگرتگ ئاشكراێ دامه‌زرانن هاوپه‌يمانيگ فراوان ناوده‌وڵه‌تى كرد ئه‌را روێ وه‌ڕوێ بوينه‌وه‌ێ داعش له عراق و سوريا.
وه‌رجه ده‌سوه‌پيكردن ئه‌و په‌لاماره‌يل ئاسمانيه له تاوسان 2014، ريكخرياگ داعش زورم خاكه‌يل خوه‌رهه‌ڵات سورياو خوه‌رئاواێ عراق و باكوورى و موسڵيش داگير كردوێد و له دويرێ ته‌نيا ميليگ له به‌غدا، ئيسه‌يش زوورمى له‌ده‌سدا جوور ئه‌وه‌گ رائد ئه‌دريان رانكين غالاوى قسه‌كه‌ر وه‌ناو وزاره‌ت وه‌رگرى ئه‌مريكى ئه‌را كه‌ناڵ ئه‌لحوڕه باسى كرد.
عه‌ميد رايان ديلۆن قسه‌كه‌ر وه‌ناو هاوپه‌يمان ناوه‌وڵه‌تييش دژ داعش له‌ڕى مه‌زه‌نه‌كردن ئاكامه‌يل سێ ساڵ ئه‌را راديۆ سه‌وا، هاوردنه‌وه‌ێ خاكه‌يل هه‌ر يه‌ك له عراق و سوريا ك له‌ژير ده‌سڵات ئه‌و ريكخرياگه بوى وه خاسترين ده‌ليليگ ئه‌را سه‌ركه‌فتن كار هاوپه‌يمان تاريف كرد.
وه‌ل ئه‌وه‌يشا سه‌ركرده‌يل پنتاگۆن جه‌خت له‌بان رۆڵ بنه‌ڕه‌تێ هيزه‌يل عراقى و سورێ كرد وه پشتگيرى له واشنتۆن له جيوه‌جيكردن پيشڕه‌وێ و تاريف ئه‌و ئه‌ركه‌يله كرد سوپاێ عراقى ئه‌نجامى داگه.
محه‌مه‌د ئه‌لخزرى عه‌ميد ته‌ياره‌وانيش وت: عراق له جياێ گشت جه‌هان جه‌نگ دژ ريكخرياگ ترۆريستى داعش كردگه‌و يه‌يش له‌يوا كردگه پشتگيرى بكريه‌ێدو پشتگيريكردنيشى فه‌رمان و ئه‌ركيگ بدێ له‌بان ده‌وڵه‌ته‌يل جه‌هان، چوينكه ترۆر ئه‌خوازێد ته‌قاس له گشت ئنسانيه‌ت بكا.
وه‌ل ئه‌وه‌يشا رۆڵ گرينگ په‌لاماره‌يل ئاسمانى مه‌سه‌له‌يگ حاشاهه‌ڵنه‌گره چ له‌لايه‌ن هاوپه‌يمان ناوده‌وڵه‌تى يا سوپاێ عراقى له جه‌نگ دژ داعش و هه‌ر وه‌و خاتريشه ئه‌لخزرى وت: له‌يرا رۆڵ هيزه‌يل عراقى ده‌ركه‌فت.
هه‌رچه‌نى متمانه وه هيزه‌يل عراقييش هاورياوه، وه‌ل ئه‌وه‌يشا ئه‌لخزرى وت: قوناغ ئاينده‌يش له پرووسه~ێ پاكسسازى عراق له ريكخرياگ ترۆريستى داعش خواسته ئه‌را وه‌رده‌وامى پيشكه‌شكردن پشتگيرى وه هيزه‌يل وڵاته‌گه‌ێ له بوار مشوره‌ت و مه‌شق و پيشكه‌شكردن لۆجيستى و زانيارێ، ئه‌ويش نه‌ك ته‌نيا له وڵاته‌يل يه‌كگرتگ و هاوپه‌يمان ناوده‌وڵه‌تى، به‌ڵكوو له گشت ده‌وڵه‌ته‌يل جه‌هان.