رووژنامەی بەریتانی لە راپۆرتیگ وەگەرد وینە لە ژیان گەنجەیل لەناو عراق وت: جاریگتر بەغداد وە بازاڕ و جادەیل رەنگاوڕەنگ و قەرەباڵغ و چایخانەیل پڕ لە گەنج و بوو هێل گلەو خوارد.

 ئەو راپۆرتە ک ئاژانس شەفەق نیوز ئەڵگەردانی کرد وتیش:  باس ئەوە کرد کەفتە ری عراق لە جەنگەیل ٢٠ ساڵ گوزەشتە، ئیجا وت: روی بەغداد دەسکردە ئاڵشتبوین، ک دیوارەیل کۆنکریتی رمیەن، و شوینەیلیگ ئەرا کارکردن هاوبەش کەفێدە دەر، و کنار چەم دیجلە گەشە وەپی کریاگە، گ یەک بازیگ لە کار بیناکردن هەس، لەوەختیگ گەنجەیل دیوارە بوورەیل رەنگاوڕەنگ کردن، و بینا چووڵەیل کردنە چیشتەخانە، و باس ئی نەوە کرد لە دویادویای تەمەن ناخاڵەیی و سەرەتای تەمەن بیس ساڵە، وەو نەوە ک ئومید فرەیگ وەپیان بەسیاگە.

راپۆرتەگە وتی: خوەنەوار و ڕاهێنەر بالێه و هونەرمەن و کەسەیلیگ پاوپلیان لەناو ساڵەیل جەنگ بڕیاگ، و ئەوان و خاوەن کاروبارەیل لەناو جەنگ پەیا بوینە، و ئیرنگە لە دوڕیانیگ گوما بوینە.

راپۆرتەگە لە زوان ئەنوار ئەحمەد (٢٣ ساڵان) ک خانمیگ چالاکوان ژینگەییە ئویشێد: ئی نەوە یا خوازێد لە عراق بچوودە دەیشت و لە شوینیگتر لەنوەو دەسوەپی بکەێد، یا لەیرا بمینێد و دووارە بینا بکەێد و لەناو نیشتمان وەردەوام بویمن.

ئەنوار ئەحمەد هەمیش ئویشێد: بەغداد کار وەمن دیرێد، و هەناێ کارەگە ئاسانیش نەوود، زانم ک منیش وڵاتەگەم خوازم.

راپۆرتەگە وتیش؛ زیاتر لە نیمەی دانیشتگەیل عراق ک هەژماریان رەسێدە ٤٢ مەلیۆن کەس، هانە خوار تەمەن ٢٥ ساڵان، ک وەیجویرە بویچگترین تەمەن دانیشتگەیل جەهانن، لە وەختیگ فرە لە گەنجەیل پڕن لە تەما و هەس سەرکردایەتی، هەرچەن چەنە خوەییش بیئومیدی هەس.

 وتیش: ریژەی بیکاری رەسێدە نزیکەی ١٤٪، و گەندەڵی لەناو حکومەت هەس، و سیمای تونوتیژی لەبان ژن چشتیگ باوە، و لە وەخت داگیرکردن وڵاتەگە وەلایەن ئەمریکا تا ئیسە چاکسازی لە سیستەم سیاسی نەکریاگە.

لەوەر گشت ئی هوکارەیلە، لە ساڵ ٢٠١٩ خوەینشاندان لە عراق هەڵسیا، و گەنجەیل لە وەردەم ئی خوەینشاندانەیلە بوین، و وەگورەی قسەی ئەنوار خان، ئیمە دویارووژ بەغداد و عراق دیاری کەیمن.

 ئەنوار خان سەری هاناو چەن کاریگ، ک خوەی هونەرمەنە و میوزیکزانە، وەلێ لەوە گرنگتر خوەی چالاکوان ژینگەییە وەگەرد گرووپیگ پاڵپشتیکردن ناوخوەیی کار و دەوام تەواویگ کەێد، ئەرا مقیەتیکردن چەم دیجلە.

 ئەنوار هەمیش ئویشێد: نەوەی ئیمە فرە هوشیارە، هەناێ باوەتەگە پەیوەندی وە ئاڵشتبوین کەشوهەوا بیاشتاد، چوینکە ئیمە هایمنە ناو یەکیگ لە زەرەدمەنترین دەوڵەتەیل جەهان، وتیش: هشکەساڵی و کەمئاوی و خوەڵوتووز هەس، وەداخەو یە دویارووژمانە.

 راپۆرتەگە هەمیش وت: لە وەختیگ باوان ئەنوار ئەحمەد پاڵپشتی تەمایلی کەن، لە زوان لیزان سەلام (٢٦ ساڵان) باس کەێد ک یەکەمین خانمە راهێنەر بالێه مووڵەتدارە لە بەغداد، ک ئویشێد: فرە لە خیزانەیل رسوومەیل خوەیان دیرن، و هاتێ لەبان دویەتەیل فرە سەخت بوود.

لیزان خان، هەرچەن باوانی پشتگیریی کردنە، باوجی کەفتیەسە وەر ساڵەیلیگ لە تەنگەوکردن و رەخنە لەبان سۆشیال میدیا، ک بەشیگ کارەگەی وە قیزەون و قەیەغە دانە قەڵەم.

ئیرنگە، لیزان خان هوکارەی ٤٥ فێرخواز لە بەغداد کەێد، وەلێ ئویشێدیش کارەگە ئاسان نییە، و دەسپاچە بویە، چوینکە کوتیگی خوازێد لەناو بەغداد بمینێد، و ئەو کوتەگەی خوازێد بچوودە ریەو، و ئویشێد: خوەم وە بەشیگ لەی کۆمەڵگا نیەزانم تا ئاڵشت نەوود، وەلێ لە خود وەختەگە خوازم لەیرا بمینم تا ئەرک خوەم جیوەجی بکەم و دەسمیەتی لەی ئاڵشتبوینە بیەم.

لە نووڕین موستەفا رەحمان لە تەمەن ٢٦ ساڵان، ئەو ئاڵشتبوینە وەشیوەیگ هاتیە ک چەوەڕی نەکریاوێد، و وەدڵی نەویە، ک هەناێ لە تەمەن ١٠ ساڵان بویە، خوەی و داڵگی چگنە بازاڕ لە ناوچەی ئەبو غرێب، و کابرایگ خوەیکوش خوەی تەقانەو، دەیان کەس کوشیان، و ئەویش پای بڕیا، و کەفتە ناو ساڵەیلیگ لە ژان و ئازار و دڵتەنگی، تا پارکە، هەناێ کەفتە گەرد تیمیگ تووپان ئەرا ئەوانەگ پاوپلیان بڕیاگە، و توەنست رییگ ئەرا خوەی پەیا بکەێد، و ئیسە رووژیگ سێ گلە چوودە ڕاهێنان، وە ئومێد ئەوە ک بکەفێدە ناو هەڵوژاردەی عراق.

راپۆرتەگە باس قسەی موستەفا کرد هەنای لەناو یاریگا مەوقەی هوچانی بوی ک وت: یەک چشت زانستم، ک لەکەیل جەنگ لە گشت شوینیگ هەس، و نیەتوەنیمن چەو لەلی بپووشیمن، بایەتە وەگەردی ژیان بکەیمن و وەخاسترین شیوە سوود لەلی بگریمن، بایەتە ری خوەمان وەسەر بوەیمن.

ئەڵگەردان: ئاژانس شەفەق نیوز