شەفەق نیوز - نەجەف

لە سۊک دۊريگ لە ناو بەڵم برنج، و لە ناوەین گولەیل برنج کە دەڕاسەیل هیشتنەسەی جی، داڵگ ئیسماعیل وە شەۊ سیە و دەمپیچەگەی نیشێد، دەسەیلی دریژەو کەێد وەرەو زەۊ ئەرا هەڵچانن دەنگەیل برنج کە شایەد بۊچگ بنووڕیەن، وەلێ چشت فرەیگە ئەرا شەش مناڵەگەی.

لێرە، ئی داڵگە وە مينەی بەرهەمیگ فرە یا قازانجیگ گەورە نیەکەێد، وەلێ وە شۊن تیکەنانیگ کەفێد کە ورسگی زاڕووەیلی بشکنێد و دەسمیەتییان بەێد ئەرا وەردەوامبۊن لە خوەنستنیان.

رۊ خوەی لە چەو ريوارەیل شارێدەو، وەلێ نیەتۊنێد چیرووک مانيبۊنی بشارێدەو، چیرۆک داڵگیگ کە رۊوەرۊبۊنەوەی سەختی ژیان وە بێدەنگی هەڵوژاردگە، و ئاڵشتکردن جیماگەی برنجەیل ئەرا ژیان رووژانەی و ئومیدیگ کە وەرد خەون مناڵەیلی گەورە بوود.

 داڵگ ئیسماعیل ئەرا ئاژانس شەفەق نیوز ئۊشێد، کە "ئی کارە شەکەتی و سەختە، وەلێ ئیمە وەرگەی گشت سەختیەیل گریمن ئەرا دۊنین زەردەخەنەی یەکیگ لە مناڵەیلم و دەسمیەتیداینیان لەبان تەواوکردن خوەنستنیان".

دیاری کەێد کە ئی کارەیلە بەێدەیەو ئەرا رووژەیل گەمارۆگە لە نەوەتەیل سەدەی گوزەشتە، وەختیگ عراق لە قەیرانیگ ئابووری خنکنەر ناڵان، وە ئاشکراکردن ئەوە کە "ئێمە وەرد داڵگمان چیایمن ئەرا زەۊە کشاوەرزییەیل ئەرا گردەوکردن جیماگەی بەڵمەیل برنج عەنبەر، و هەست وە شەرمەزاری لەو کارە نەکردیمن، وەلێ ئمڕوو هەست وە شەرم کەیمن، چۊنکە نیەخوازیمن کوڕ و دۊتەیلمان بخەیمنە ناو هەڵوێستیگ شەرمەزارکەر لە وەرانوەر مەردم".

لە لای خوەیەو، داڵگ نادیە ئەرا ئاژانس شەفەق نیوز ئۊشێد، کە "ژنەیل هەرساڵ لە ماوەی وەرز درەو تیەن ئەرا گردەوکردن دەنگە مەنەیل لە زەۊ، و دۊای ئەوە هەڵسیمن وە پاککردن و هەڕینیان ئەرا سوودوەرگر.ن لەلیان لە دابینکردن هەوەجەیل خیزانەگەم کە چوار کەسن".

وتیش: "شوینەیل دۊر لە چەو مەردم هەڵوژیمن ئەرا ئی کارە سەختە، کە بۊەسە کاریگ لە کارەیل وەرین، و تەنیا ئەو خیزانەیلە پەنا وەپی بەن کە لە لاتی ناڵن، لە کۆمەڵگەیگ کە چینەیل لەناوی لە ناوەین دەوڵەمەن و لات جیاوازن".

 ئەو ژنەیلە کە کار لە گردەوکردن دەنگە برنجەیل عەنبەر کەن لەناو شار مشخاب نیشتەجیبن، و لە ماوەی وەرز درەو وەرەو کێڵگەیلە چن لەوەر سەختەی و نەدارییان و زیایبۊن داواکارییەیل ژیان رووژانە.

 وەپەی وتەیلیان، ئەرکەیل ژیانگوزەرانی گەورەترەو بۊە لە توانایان ئەرا جیوەجیکردنی، وە تایوەت وەرد هەوەجەیل مناڵەیل و داواکارییەیل خوەنستن، لە سای بەرزەوبۊن نرخەیل و گرانی ژیان، ئەوەگ کە هیلێد کار سەخت بکەن و جیماگەیل برنج هەڵچنن  ئەرا بەشیگ لە هەوەجەیل خیزانەیلیان، و وەردەوامبۊن لە رەنج ئەرا  پەیاکردن تیکەنانیگ.

 لەی چوارچیوە، محمد فەتلاوی ئەرا ئاژانس شەفەق نیوز ئۊشێد، کە ئی ژنەیلە هەرساڵ لە ماوەی وەرز درەو رۊ کەنە ناوچەی مشخاب ئەرا گردەوکردن جیماگەی بەرهەم شەڵەب لە زەۊە کشاوەرزییەیل.

 ئاشکرا کەێد کە وەکارهاوردن دەڕاسە ئامێرییەیل بڕیگ لە بەڵمەیل پەرتەوبۊ لە کێڵگەیلە لە دۊای خوەیان هیلنە جی، کە یەیش ری وە ژنەیل دەێد گردیەو بکەن و سوود لەلی وەرگرن، و درەو دەسی سوودمەنترە لەڕۊ بڕ ئەو برنجەیلە کە کریەێد  هەڵچنیەن، وەلێ وەختیگ دریژ کێشێد و هەوەجە وە تەقەلایگ لەشی گەورە کەێد.