لە راپۆرتەگە کە ئاژانس شەفەق نیوز ئەڵگەردانیەسەی، لە زوان خانمە چالاکوان عراقی دینا خدر نویساس: “کارکردن لە بوار هەڵکەنین مین ئەوە ئەرام نشان دا کە سنووردارکردن تەقلید کۆمەڵایەتی ئەرا ئەوە دروس بویە کە بشکیەێد”.
لە راپۆرتەگەی نەتەوە یەکگرتگەیل باس ئەوە کریاس کە دینا خدر هاوشان مەحروسە عەبدولمونیر و مەها جەمال ژن عراقیین و چالاک ریخریاگ مرۆیی چاریتە، کە مووڵەت کارکردنیان لە حکومەت عراق و حکومەت هەرێم کوردستانەو دیرن، و وا هاوبەشی جيوەجیکار دانریەێد وەرد ریخریاگ نەتەوە یەکگرتگەیل ئەرا کاروبار مین لە شنگال.
چاریتی لە ماڵپەڕەگەی خوەی خوەی ناسنێد و ئویشێد "ریخریاییگ ناحکومی نیشتمانی عراقییە کە کار کەێد ئەرا جیوەجیکردن بیوەیی و گەشەپیدان لەڕی چەکانن مین و هووشیاری لە رخەیل تەقەمەنی نەتەقینەوە، ئەرا دەسمیەتیدان ئەو کەسەیلە کە وەمدوو جەنگ زەرەدمەن بوینە، وتیش لە ساڵ ٢٠١٦ دامەزریاس, و لە دهۆک و موسڵ و شنگال بارەگا دیرێد.
لە راپۆرتەگەی نەتەوە یەکگرتگەیل هاتیە کە "ژن بازیگەر گرنگن لە چالاکییەیل مین"، وتیش: مەحروسە عەبدول مونیر، توێژەر، کار ئەرا پاکەوکردن ناوچەیل لە کەرەستەی تەقینەوە کەێد و ئەرا بەرزکردن توانای خوەی، بەشداری لە گشت خولیگ راهێنان کردگە، و سوود لە گشت دەرفەتیگ وەرگردیە وەخاتر بەرزەوکردن توانایل خوەی.
راپۆرتەگە لە زوان مەحروسە خان نویسیاس: “جویر داڵگ دوو مناڵ، چالاکییەگەم بەشدارە لە دروسکردن شوین بیوەی ئەرا زاڕووەیل ئەرا بازیکردن و ژیان مناڵییان و دروسکردن یادگاری رەنگین”.
مەها جەمال، لە راپۆرتەگە باس ئەوە کریاس کە ئەو ئەندام "تیم وەڕێوەبردن مەترسی تەقینەوە"س، و لە ماوەی سێ ساڵ گوزەشتە بەشدار بویە لە هەڵمەتەیل بەرزکردن کارامەیی و زانیاری و توانایلی.
لە درویژەی راپۆرتەگە هاتگە کە مەها جەمال پەیوەندی وە مەیدان چالاکیی مینەو کردگە، چوینکە کاریگەریی ئی کارە لەبان ژیان خەڵک دیە.
راپۆرتەگە لە زوان مەها خان نویسیاس: "هەس وە شانازی و دڵخوەشی کەم هەناێ مادەیگ تەقینەوە پەیا کەم، و لەلایان بووم زانم کە ژیانيگ ترەک لەبان زەوییەگەم رزگار کەم".
لەلای خوەییش دینا خدر، کە لە بوارید کردار مین کار کەێد، باس لەوە کەێد کە وە هەوسەڵەیگ چەوەڕیی ئەوە کەێد شمارەی پەیمانەیی نوو توومار بکەێد لە خولەیل راهێنان ئەرا پاکەوکردن مین و تەقەمەنی، هەمیش وە وەرگردن پۆست سەرکردایەتی پیشکەفتن لە ژیان پیشەیی وەدەس بارێد.
وەگورەی راپۆرتەگە، دینا خان لەبان هویر شکاننیدگ چەشنە کوێنەپەرسیەیل ئی بوارە کارییە کە پیاو لەناوی زاڵە، یەیش بیجگە لەوەگ پشتگیری مەردم کەێد لە گلەوداین زەوییەیلیان کە وەرجەیە وە مین و تەقەمەنی پیس بوین.
راپۆرتەگە لە زوان دینا خان نویسیاس: “کۆمەڵگە رازی لە ئیمە جویر ژن نەویە کە لە چالاکی کردار مین کارکەیمن، ئمجا کەمکەم هویروڕایان ئاڵشت کردن هەناێ دەرئەنجام کارەیلمان دین تا ئەو ئاستە کە پشتمانیش گرن”.
وتیش: بەشداریکردن ژنەیل لە چالاکییەیل مین لە پیشینەی کارەیلە، بەڵام هیمان فرە چشت مەنیە کە ئەنجام بیریەێد.