شەفەق نیوز/ هەولێر پایتەخت هەرێم کوردستان، ئمڕوو دووشەممە، ٣٥ مین ساڵیاد کووچکردن رێبەر کورد ناودیار ئیدریس بارزانی نووەو کریا.
ساڵیادەگە لەناوڕاس شارەگە نزیک قەڵای ئاسەواری هەولێر، وەئامادەبۊن بڕ فرەیگ لە خەڵکەگە کریا، و کەسایەتیەیل فەرمی و پێشمەرگە دێرینەیل لەناوی بۊن.
هەمیش پێشانگای فۆتۆگرافی ئەرا ژیان خەبات بارزانی لە بزووتنەوەی ئازادیخواز کورد کریا.
ئیدریس بارزانی ئەندازیار شۊڕس گوڵانە، و ئەندازیار ئاشتەوبۊن نیشتمانیە، وباوگ نێچیروان بارزانی سەرۆک ئیسەی هەرێم کوردستان و وجاخ مەڵا مستەفا بارزانی رێبەر کوردە.
ئیدریس بارزانی لە مانگ ئادار ساڵ ١٩٤٤ لەناوچەی بارزان لەداڵگبۊیە، و لە ناحیەی سلیفان سەروە پارێزگای ئەرومێە لەباکوور خوەرئاوای ئیران لە ساڵ ١٩٨٧ وەنۆرە دڵ کووچ دۊیایی کرد.
هەنای تەمەن ئیدریس بارزانی رەسیە دوو ساڵان، مەڵا مستەفا بارزانی باوگی وەگەرد هاوڕیەیلی رۊی وەرەو خوەرهەڵات کوردستان کردن، ک کۆمارە نووگەی مەهاباد دەس وەپی کرد، و دۊای ئەو رووداوەیلە ک لەپشت هەڵسان کۆمار مەهاباد کەفتنە وەر، مەڵا مستەفا بارزانی لە خەباتە دیارەگەی ناچار بۊی خوەی و هاوڕیەیلی رۊی وەرەو یەکێتی سۆڤێت بکەن، و خیزانە بارزانیەیلە وەگەرد شێخ ئەحمەد بارزانی برای گەورەی مەڵا مستەفا ئەرا عراق گلەوخواردن، ک ئەو مەوقە ئیدریس بارزانی سێ ساڵان بۊی، و هەنای رەسین، دەسەڵاتەیلە وەرەو ناوچەیل باشوور عراق دۊریان خستن.
لەتەمەن شەش ساڵان، ئیدریس بارزانی چگە مەکتەو لە شار کەربەلا، لە مەوقەی لەناوبردن دەسەڵات شاهییش ک وەدەس عەبدولکەریم قاسم لەساڵ ١٩٥٨ هەمیش لە دیدار باوگی بیبەش بۊی، دۊای ئەوە مەڵا مستەفا و هاوڕیەیلی لە یەکێتی سۆڤێت گلەوخواردن و دۊیای جیابۊن درۊژیگ، جاریگ تر خیزانەگە یەکەو گرد.
ئەدەبیات پارتی دیموکراتی کوردستان باس کەن ک ئیدریس بارزانی لە سەرەتای دەسکردن وە شۊڕش ئەیلوول دۊای گلەوخواردن مەڵا مستەفای باوگی لە یەکێتی سۆڤێت و وازهاوردن عەبدولکەریم قاسم لە پەیمانەیلی، خوەی رەسانە شۊڕشەگە، و یەکیگ لە کەسە یەکەمەیل بۊی لە پێشمەرگە ک چەک هەڵگرد.
دۊای ٩ ساڵ لە خەبات ئەرا باوەتەگە، ولە کۆنگرەی هەشتەم پارتی ک لە ناوبردان سەروە ناحیەی گەڵاڵە ئەنجام دریا، ئیدریس بارزانی ئەرا یەکەم جاری جۊر ئەندام دەسەی مەرکەزی پارتی پەسەن کریا
وەگەرد دەسکردن وە دانوستانەیل وەگەرد حکومەت عراق ئەرا ئاشتی لە کوردستان و عراق، ئیدریس بارزانی و مەسعود بارزانی برای ئەرا ئەندام شاند دانوستان پەسەن کریان، ک هەرلە ساڵح یوسفی و دارا تەوفیق و سامی عەبدولڕەحمان و نافز جەلال و مەحمود عوسمان لەناوی بۊین، و لەورا ئیدریس بارزانی لە خەبات چەکدار هات ئەرا خەبات سیاسی و دیبلۆماسی وەخاتر باوەت گەلەگەی، و دانوستانەیل ک مەڵا مستەفا سەرپەرشتیاریی کرد وەردەوام بۊی تا رەسیە ئانجام حوکم زاتی ئەرا کوردستان عراق وەشیوەیگ فەرمی، و رێککەفتن ١١ی ئادار واژوو کریا. باوجی دەسەڵاتەیل بەغداد دۊیای چوار ساڵ رێککەفتنەگە پلانن، ک دووارە بۊیە رۊەڕۊبۊن، ئەوە بۊی ک حکومەت عراق رێککەفتن جەزائیر واژوو کرد.
دۊای رێککەفتن جەزائیر، ئیدریس بارزانی ناچار بۊی خوەی خیزانەگەی و بڕەیل پێشمەرگە بەنابەر ئیران بوون، و خوەی و مەسعود بارزانی برای دەسکردنە جۊلە و کار ئەرا دووارە رێکخستن سیاسی و سەربازی، و زەمینەسازی ئەرا دووارە بیناکردن رێکخستن حزبی و هێزەیل پێشمەرگە و دەسکردن وە چالاکیەیل.
ئیدریس بارزانی هەمیش خاوەن ئەو دەور گورجەسە لە ئاشتەوبۊن وەگەرد یەکێتی نیشتمانی کوردستان و ئەو لایەنەیل کوردستانی ک لە دۊادۊای ساڵ ١٩٨٦ کریا، تا ئەوە بوودە یەکەم نەوەی دروسکردن بەرەی کوردستانی فراوانیگ تا لە مانگ حوزەیران لە ساڵ ١٩٨٨ ئاشکرا بوود، ک خوەی یەکەمین بەرەی سیاسی و سەربازی کوردستانی و عراقیە سەرکەفتن گرنگیگ وەدەس بارێد، و ریەگە ئەرا راپەڕین وەهار ئادار ساڵ ١٩٩١ خوەش بکەێد.
دۊای راپەڕین ١٩٩١ و رزگارکردن بەشە گەورەگە لە خاک کوردستان، تەرم ئیدریس بارزانی وەگەرد تەرم باوگی و رێبەر رووحی کورد مەڵا مستەفا بارزانی لە ٦ تەشرین یەکەم لە ساڵ١٩٩٣ ئەرا کوردستان هاوریاوە، تا لەبارزان بنریەنە خاک، و بوودە مەزار و مەنزڵگایگ ساڵانە هەزاران کەس رۊی وەپی کەن.