وەگورەی ماڵپەڕە بەریتانییەگە، نەورۆز خەڵک شار زاخۆە لە هەرێم کوردستان، هەرلیوا لە رخ ئەو مۆسیقا کە دروسی کردیاد، لە عراق دەرچگ، بەڵام ئیرنگە سەرکەفتگ بویە لە رەسین وە "ستۆدیۆی ئابی رۆد" وەناوبانگ ک وەرجەیە تیپ "بیتڵز" لەناوی گورانی توومار کردیە.
ئەو راپۆرتە ک لە لایەن ئاژانس شەفەق نیوز هەڵگەردان کریا نشان دا ک تا ئەو مەوقە نەورۆز لە شیواز گورانی چڕینی وەتاری دەنگ سروشت کردگە، و تەقەلای وە مرۆڤکردن ئەو دەنگەیلە لە گورانیەیلی داگە. لە ڕاپۆرتەگە دەسنشان کەێد ک نەورۆز هەناێ لە ساڵەیل هەشتاگان لە مەکتەو بویە، گورانیچڕیگ ناودیار پشتی گردیە وەشیوەی هونەری سپۆنسەری کردگە، و دەس وە توومارکردن گورانی کردیە، بەڵام لەوەر رژیم سەدام حسێن لەو سەردەمە، ناچار بویە وە نایاسایی ئەو کارە بکەێد و ئەویش هەناێ هەرزەکار بویە لەبان دژایەتیکردن حکومەت دەسگیر کریا.
سایتەگە لە زوان نەورۆز تەمەن ٦٢ ساڵە نویسان: "کوت بوی پەیماننامەیگ واژوو بکەم ک ئەگەر جاریگتر گورانی بچڕم، تەنانەت لە ناو برادەرەیلمیش بوود لە سێدارە دریەم، بەڵام لەوەر ئەوە ک هەرزەکار بویم، دەرفەتیگ وەپیم دریا، باوجی وتن ئەوە دویاجارد بوود". گۆرانی وتن لەبان هەر چشتیگ، گورانییگ دڵداری، و لەلای ئەوان من کەسیگ رخبەرم و توەنم وە مۆسیقاگەم کاریگەری لەبان خەڵک بکەم."
نەورۆز لە قسەیلی ئویشێد؛ "هەناێ تەمەنم رەسیە ١٧ ساڵ، پەیوەندی وە شۆڕش کورد کردم و بویمە خەباتکاریگ ئازادی لە دژ رژیم سەدام حسێن، و دەسکردمە گورانی چڕین وە ئاشکرا وە دژ رژیم، لەو وەختەو تا ئیسە چەن جاریگ دەسگیر کریام، و ناچار بویم بچمە سوریا، ئیجا وەرەو لوبنان دەرکریام، و گشت تاوانەگەم ئەوە بوی ک گورانیچڕیگ کورد لەداڵگ بویمە".
لە راپۆرتەگە هاتیە؛ رژیم سەدام لە ساڵ 1988 دەسکردە هەڵمەت جینۆساید گەل کورد و پێشێلکاری گەورەی ماف مرۆڤ ئەنجامدا، لەوانەیش وەکارهاوردن چەک کیمیایی، لە ساڵ 1991 ملیۆنا کەس روی کردنە لە سنوورەیل ئیران و تورکیا، لە وەختیگ هەزاران کەسیش وە کردەوەیل رژیم گیانیان لەدەس دان.
ڕاپۆرتەگە وتیش: لەوەر ئەو پەلامارەیلە و رخی لەبان ژیانی، نەورۆز لە ساڵ 1989 سەر هەڵگرد و ساڵانیگ لە دەروەدەری لە سوریا و لوبنان و تورکیا وەسەر برد، وەرجە ئەوەگ دویاجار لە خوەرھەڵات لەندەن داکاسیەێد.
راپۆرتەگە دەسنشان کرد ک لە ماوەی ٣٠ ساڵ گوزەشتە نەورۆز لە چەن بواریگ کار کردیە، لەوانەیش هەڵگەردان کوتپڕ وەگەرد وەزارەت ناوخۆ، بەڵام وەردەوام بویە لە گورانی چڕین وە ئازادی وە زوان داڵگی خوەی.
راپۆرتەگە لە زوان نەورۆز نویسانیە "لەندەن گشت چشتیگ پیشکەشم کرد، منیش فرە خوەشم لەلی تیەێد، پاسپۆرتیگ، ڕی پیاوە ک لە کەسیگ کەس پاپەی نیوود، هەرلیوا گشت گیچەڵەیل خوەرھەڵات ناوەڕاس، و وەشیوەی ژیروەژیر و ترس لەناو وڵاتەیل گەردیام، ک وەیکجار لەناو لەندەن من ئازاد بویم".
نەورۆز لە درویژەی قسەیلی وتیش "لەندەن دووسی وەپیم وەخشێد و گشت چشتیگ، ئەگەر بوی بیەنەمە دەس عراق و بکوشیەم، بەڵام لەجیای ئەوە، گرنگی وەپیم دریا".
ئیرنگە نەورۆز دەرفەت توومارکردن گورانییەگەی لە ستۆدیۆیل ئابی رۆد وەرگرد، ک ناوبانگەگەی پەیوەندی وە گروپ بیتڵز دیرێد، ک گۆرانییگ شانوەشان تیپ بەریتانی "ئۆپەرڤیۆز" پێشکەش کەێد، ک هەرلە لە شێری ئەندەرسۆن و هۆڵ سانت جۆن هانە ناوی، ک لەی دواییە گورانییە نووەگەی توومار کردیە گورانییگ لە ژیر ناو "خۆشەویستیم پیشان بدە"، ک ئەو واقیعە خەێدە وەرچەو ک کەفێدە روی ملیۆنا ئاوارە لەبان بەرزەوبوین خوسە و کینە لە وڵاتیان.
لە ڕاپۆرتەگە لە زوان نەورۆز وتیش: "هەناێ چویمە ناو ستۆدیۆگە، هویر لە گورانی (Imagine) جۆن لێنۆن کردم ک ئەوە خەویگ بوی هاتەدی، فرە خوەشم هات وەگەرد شێری و هۆڵ کاربکەم، چوینکە هەردوگیان چالاکوان ماف مرۆڤن، وەڕاسی وەپیم خوەش بوی ک لە خود ستۆدیۆی بیتڵز گورانی چڕیم، ئەوە خەیاڵیگە و هەسیگ رەنگینە".
نەورۆز لە کۆتایی ئویشێد "ئاوارەبوین کاریگ ئاسان نییە، و وەجیهیشتن ئەو شوینە ک لەناوی گەورە بوی و قایم وەپیەو بەسیایدە، وەلێ چارەیگتر نەیاشتم، و منیش ئەگەر چارەیگتر بیاشتام کوردستانم وەجی نەیشتم، وەلێ هویچ رییگ لەنوام نەوی ک بتوەنم لە ژیر دەسەڵات سەدام حسێن بژیەم، لە وەختیگ گەلەگەم کوشیا، تاکە رییگ ئەرا رزگاربوین واین و سەرهەڵگردنە."
هەڵگەردان: ئاژانس شەفەق نیوز