شەفەق نیوز- دیمەشق/ قامیشلۆ
لە قامیشلۆ، لە ماوەی گوزەشتە، کەسیگ راپۆرتیگ ئەرا هەواڵگری سەربازی لەبان ماموستایگ لە شارەگە نۊسان، و کارەگە وە دەرکردنی لە وەزارەت پەروەردە کووتایی هات، وەلی توومەتەگە، چۊ ئەوەگ عەبد عیسا توێژەر و راوێژکار لە دادوەر ناودەوڵەتی باسی کەێد، ئەوە بۊ کە ئەو "وە کوردی خەنستیە".
دۊای چەن ساڵیگ، مەکتەوەیل خود شارەگە خوەیان ئامادە کەن ئەرا پیشوازیکردن لەو زوانە کە ماموستایگ لەوەر وەکارهاوردنی سزا دریا، وەلی ئی جارە لەناو خشتەی فەرمی، لەشان عەرەبی و ئینگلیزی.
ئاڵشتکارییەگە زۊ هات.
وەرجە دە رووژ لە دەسکردن ساڵ خوەنستن، وەزیر پەروەردە و فێرکردن محمد عەبدولڕەحمان ترکۆ، لە 27 ئاب، بڕیار شمارە 2068/943 دەرکرد، و رێنماییەیل جیوەجیکردن ئەرا مەرسووم شمارە 13 ئەرا ساڵ 2026 هەموار کرد.
وەپای ئەوە، زوان کوردی لە وانەیگ ئارەزوومەنی وە دوو وانە لە هەفتەیگ وەپای رێنماییەیل وەرین ئاڵشت بۊ ئەرا بەشیگ لە پرۆگرامەیل پەسەنکریاگ لە گشت قۆناغەیل خوەنستن، لە مەکتەوەیل حکومی و تایبەت لەو ناوچەیلە کە کوردەیل ریژەیگ وەرچەو لە دانیشتگەیل هەن.
بڕیارەگە سێ وانە لە هەفتەیگ ئەرا وانەی زوان کوردی دیاری کرد، کە نمرەگەی چوودە ناو بڕ کووتایی، لەشان وانەیگ سەروەخوەی ئەرا چالاکییەیل.
هەمیش ری وە خوەنەوارەیل دا، مەوقەی یەکەم ساڵ خوەنستن لە جیوەجیکردنی، هەڵوژاردن خوەنستن وانەیل کۆمەڵایەتی و میژوو و جوگرافیا و فەلسەفە وە عەرەبی یا وە کوردی بکەن، لە رێکخستنیگ کە وەسف کریا ئامانج لەلی ئاسانکردن قۆناغ گواستنەوەس ئەرا ئەو خوەنەوارەیلە کە وەرجەیە ئی وانەیلە وە زوان خوەیان لە مەکتەوەیل ئیدارەی زاتی خوەنستنە.
وەلی بڕیارەگە یەکلایی نەکرد کە دۊای کووتاییهاتن ئەو ساڵە چە تیەێد، و ئایا فێرکردن ئەو وانەیلە وە کوردی وە شیوەیگ ترەک وەردەوام بوود یا لە سنوورەیل قۆناغ ئاڵشتکردن وسێد.
لە وەرانوەر ئەوە، پرسیاریگ ترەک بی جواویگ ئاشکرا لەناو دەق بڵاوکریاگ مەنەو. ئایا وانەیل کوردی بوودە بەشیگ زوورەملی لە خشتەی خوەنەوار کورد، یا هەڵوژاردنیگ فێرکاری کە خریەێدە بان بەرنامە بنەڕەتییەگەی؟
جیاوازی ناوەین هەردوگ ئەگەرەگە تەنیا تەکنیکی نییە، چۊنکە شایەت وە راسگانی شمارەی ئەو خوەنەوارەیلە دیاری بکەێد کە زوانەگە خوەنن و ئاست ئاڵشتبۊن بڕیارەگە ئەرا کارکردنیگ فراوان لەناو مەکتەوەیل.
هەموارەگە دویر لە رەوشیگ سیاسی زویوەزوی دەرنەچگ.
لە 25 ئاب، مەزڵووم عەبدی خەوەردا لە کووتاییهاتن ئەرک هیزەیل سوریای دیموکرات "هەسەدە" و هەڵوەشاننی چۊ هیزیگ سەربازی سەروەخوەی، دۊای تەواوبۊن رێڕەو تیکەڵکردن سەربازی و ئەمنی و کارگێڕیی لەناو دامەزراوەیل دەوڵەت، و دۊای دوو رووژ بڕیار زوانەگە دەرچگ، دۊاتر عەبدی چۊ راوێژکاریگ لای سەرۆکایەتی کۆمار دامەزریا.
لە ماوەی کەمتر لە هەفتەیگ، پیشهاتەیل یەک لەشۊن یەک هاتن کە نشان قۆناغیگ جیاواز دەن لە پەیوەندی ناوەین دیمەشق و کوردەیل، هیزیگ سەربازی سەروەخوەی کووتایی تیەێد، سەرکردەگەی چوودە دامەزراوەی سەرۆکایەتی، و زوانیگ کە ئەرا چەن دەیەیگ لە دەیشت مەکتەوەیل دەوڵەت ناوەندی مەنۊد شوینیگ فراوانتر لەناو پرۆگرامەگەی وەدەس تیەرێد.
وەلی تاقیکردنە راسگانییەگە لە شەشەی ئەیلول دەس وەپی کەێد، وەختیگ خوەنەوارەیل گلەو خوەن ئەرا مەکتەوەیل و بڕیارەگە لە دەقیگ وەزارییەو ئاڵشت بوود ئەرا کتاوەیل و مامزستایەیل و پۆلەیل و وانەیل رووژانە.
چە چشتیگ وە راسی ئاڵشت بۊە؟
رێنماییەیل جیوەجیکردن یەکەم، کە لە 26 کانوون دۊەم دەرچگن، زوان کوردی چۊ وانەیگ ئارەزوومەنی وە دوو وانە لە هەفتەیگ پەسەن کردۊد، کە نمرەگەی لەناو بڕ گشتی تومار کریەێد بی ئەوەگ ئەنجامەگەی کار بکەێدە بان دەرچگن خوەنەوارەگە یا کەفتنی.
بڕیار 27 ئاب شمارەی وانەیل زوانەگە بەرزەو کرد ئەرا سێ وانە لە هەفتەیگ، و وانەیگ سەروەخوەی ئەرا چالاکییەیل زیای کرد، و وە ئاشکرا نۊسان کە زوان کوردی بوودە بەشیگ لە پرۆگرامەیل پەسەنکریاگ و نمرەگەی چوودە ناو بڕ کووتایی.
وەلی ئاڵشتکارییەگە لەبان شمارەی وانەیل نیەوسێد.
تەنیا لە ماوەی یەکەم ساڵ خوەنستن دۊای جیوەجیکردن بڕیارەگە، خوەنەوارەیل تۊەنن هەڵوژاردن خوەنستن وانەیل کۆمەڵایەتی، لەناویانیش میژوو و جوگرافیا و فەلسەفە، وە عەرەبی یا وە کوردی وەپای پرۆگرامەیل پەسەنکریاگ بکەن.
بڕیارەگە ئەوە وە رێکاریگ ئەرا ئاسانکردن قۆناغ ئاڵشتکاریەگە باس کرد، ئەوەگ دەرفەتیگ دەێدە ئەو خوەنەوارەیلە کە وەرجەیە ئی وانەیلە وە کوردی خوەنستنە ئەرا ئاڵشتبوین هۊردەهۊردە وەرەو سیستمە نووەگە، بی ئەوەگ وە شیوەیگ ئاشکرا دیاری بکەێد کە دۊای کووتاییهاتن ساڵ یەکەم چە رۊ دەێد.
لەیرە یەکیگ لە جیاوازییەیل بڕیارەگە دەرکەفێد، کە زوان کوردی شوینیگ قایمتر وەدەس تیەرێد وە هەژمارکردنی چۊ وانەیگ لەناو پرۆگرام نیشتمانی، لە وەختیگ وەکارهاوردنی چۊ زوانیگ ئەرا فێرکردن وانەیل ترەک، لە شیوازە ئیسەییەگەی، یەسیغسەو وە گام ئاڵشتبوین کە لەڕۊ وەختەو دیاریکریاگە.
بڕیارەگە تەنیا یەک خوەنستنیگ لەناو ناوەندەیل کوردی وەخوەی نەدی.
ئەکادیمی و شیەوکەر سیاسی فەردی سەعدون وەپای خوەنستن خوەی دیاری کرد، کە ئەو چوار وانە کە ئەرا زوان و چالاکییەیل دیاری کریانە چۊ وانەیگ ئارەزوومەنی زیایە ئەرا پرۆگرام پەسەنکریاگ دەرکەفن، و هوشداری دا لەوەگ بڕیگ لە خوەنەوارەیل شایەت خوەیان لەلی لادەن ئەگەر بوودە باریگ خوەنستن زیایە.
سەعدون لە قسەیلی ئەرا ئاژانس شەفەق نیوز دۊنێد، کە خاسترەگە ئەوە بۊ خوەنستن کوردی ئەرا خوەنەوارەیل کورد زوورەملی بۊاتاد و ئەرا عەرەبەیل و پێکهاتەیل ترەک ئارەزوومەنی بۊاتاد.
هەمیش پرسیارەیل لەباوەت دەسەواژەی "ئەو ناوچەیلە کە هاووڵاتییەیل کورد ریژەیگ وەرچەو هەن" ورووژان، و ئایا شایەت سنووردارکردنیگ ئەرا جیوەجیکردن بڕیارەگە لە شارەیلیگ بکەێد کە گردەوبوینەیل گەورەی کوردی لەناوی هەس بی ئەوەگ فرەیی دانیشتگەیل دیرن.
ئی ناکۆکییە تەنیا چۊ رێکاریگ دەرنیەکەفێد. چۊنکە جیاوازی ناوەین وانەیگ کە لەناو بەرنامەی خوەنستن بنەڕەتی هەس و یەکیگ ترەک کە خوەنەوارەگە تۊنێد هەڵوژاردن نەکەێد ئەرا خوەنستنی شایەت یەکلاییکەر بوود لە دیاریکردن قەوارەی رۊکردنە بانی و ئایندەی تاقیکردنەگە.
بڕیارەگە ئۊشێد کە زوان کوردی بۊەسە "بەشیگ لە پرۆگرامەیل پەسەنکریاگ"، وەلی وە هۊردەکارییەو باس نیەکەێد کە چۊن وانەیلی لەناو خشتەی رووژانە ئەرا هەر مەکتەویگ بەشەو کریەێد، و یەیش ئەوەسە کە وەگەرد جیوەجیکردن راسگانی دەس وە روونبۊن کەێد.
"زوانیگ نیشتمانی" نەک فەرمی
رێڕەو یاسایی لە 16ی کانوون دۊەم دەس وەپی کرد، وەختیگ سەرۆک ئەحمەد شەرع مەرسووم شمارە 13 ئەرا ساڵ 2026 دەرکرد، کە هاووڵاتییەیل سوریی کورد چۊ بەشیگ بنەڕەتی و رەسەن لە گەل سوریا هەژمار کرد، و ناسنامەی فەرهەنگی و زوانەوانییان چۊ بەشیگ لە ناسنامەی نیشتمانی سوری دانا.
هەمیش مەرسوومەگە زوان کوردی چۊ "زوانیگ نیشتمانی" هەژمار کرد، و ری دا وە فێرکردنی لە مەکتەوەیل حکومی و تایبەت لەو ناوچەیلە کە کوردەیل ریژەیگ وەرچەو لە دانیشتگەیل هەن.
وەلی مەرسوومەگە شیوەی "زوان فەرمی" وەپی نەیا.
ناوەین ئی دوو شیوە یەکیگ لە گرنگترین خاڵەیل باس کوردی لە سوریا کەفێد.
دانپیادانان وە کوردی چۊ زوانیگ نیشتمانی خەێدەی ناو چوارچیوەی ناسنامەی فەرهەنگی ئەرا دەوڵەتەگە، لە وەختیگ پەسەنکردنی چۊ زوانیگ فەرمی دۊەم ئامادەبۊنیگ فراوانتر لەناو ئیدارەیل و دامەزراوەیل و خزمەتگوزارییەیل گشتی لەلق کەفێدەو.
عەبدولحەکیم بەشار، ئەندام ئەنجومەن گەل و ئەندام پارت دیموکرات کوردستان، ئەرا ئاژانس شەفەق نیوز ئۊشێد کە ئاڵشتبوین کوردی "لە قۆناغ قڕکردن و رەتکردن و قەیەغەکردن ئەرا دانپیادانان وەپی چۊ زوانیگ نیشتمانی" ئاڵشتکارییگ میژووییە، وەلی گامەگە وە ناتەواو دانا.
بەشار وت "هەژمارکردن زوان کوردی چۊ زوانیگ نیشتمانی بیگومان گامیگ ئەرێنی و گرنگە، وەلی ئەرا جیوەجیکردن داواکارییە زوانەوانی و فەرهەنگییەیل کورد ناتەواوە".
و دۊنێد کە لە بانان بایەسە شیوەی زوان فەرمی دۊەم لەشان عەرەبی لە ناوچەیل کوردی بیەێد وە کوردی، تا لەناو فێرکردن و ئیدارەیل گشتی و دامەزراوەیل دەوڵەت وەکار باریەێد.
بڕیارە فێرکاری نووەجە شوین زوان کوردی لەناو مەکتەو فراوان کەێد، وەلی رەوش دەستوورییگەی ئاڵشت نیەکێد. ئەو هێمان "زوانیگ نیشتمانی"یە، و زوانیگ فەرمی دۊەم نییە.
لەوەر یەیش سیاسەتمەدارەیل کورد داوا کەن کە مافەیل تەنیا بەسیای وە مەرسوومەیل و بڕیارەیل جیوەجیکردن نەمینن، بەڵکم لەناو دەستوور ئایندە بچەسپیەن.
هۊریگ دریژتر لە پرۆگرامەگە
فامستن ناسکەیل زوان کوردی لە سوریا دویر لە میژوویگ کە ئەرا چەن دەیەیگ دریژەو بوود سەختە.
لە ساڵ 1962، سەرژمێرییگ نائاسایی لە پارێزگای حەسەکە بۊە مدوو ماڵین نزیکەی 120 هەزار کورد لە وڵاتینامەی سوری، وەپای بەڵگەدارکردن ریخریاگ "هیومەن رایتس وۆچ"، و شوینەوارەیل نەۊین وڵاتینامە دۊاتر وەرەو نەوەیل ئەو خیزانەیل رەسین.
وڵاتینامە تەنیا جی ناکۆکی نەۊ، کە ریخریایەجە پەڵپەیلیگ لەبان وەکارهاوردن زوان کوردی، و قەیەغەکردن چاپکریاگەیل وەپی، و تەنگەوکیشانن لەبان چالاکییەیل فەرهەنگی و ئاهەنگەیل کوردی بەڵگەدار کرد، لەشان سیاسەتەیلیگ کە دەس وە ناسنامەی فەرهەنگی کورد رەسانن.
وەگەرد رەسین پارت بەعس ئەرا دەسەڵات لە ساڵ 1963، لە ماوەی دەیەیل دۊاتر سیاسەتەیل وەعەرەبکردن و دویرەوخستن فەرهەنگی و زوانەوانی چەسپیان، و بەشیگ گەورە لەلیان لە سەردەم بەشار ئەسەد وەردەوام بۊ.
نویسەر خەلدون قەتلان دۊنێد کە خستن کوردی وەناو پرۆگرامەیل نیەتۊەنریەێد لەی میژووە جیاوە بکریەێد.
قەتلان ئەرا ئاژانس شەفەق نیوز ئۊشێد، کە گامەگە وەپشسەرنانە لەوەگ رێکاریگ پەروەردەیی بوود تا بوودە "کاریگ راسەوکردن" لە چوارچیوەی دەیەیل گوزەشتە، کە هۊرمان گلەو دەێد ئەرا ناسنامەیلیگ کە گوما کریانە، و هەمەجۊری فەرهەنگی و زوانەوانی پیشکەش کەێد وە هەژمارکردنی چۊ بەشیگ لە یەکڕزی نیشتمانی نەک هەڕەشەیگ لەبانی.
وەلی لە خود وەخت هوشداری دەێد لەوەگ کە بەهای بڕیارەگە یەسیای وە شیواز جیوەجیکردنی مینێد.
ئامادەکردن پرۆگرامەیلیگ خاوەن ئاستیگ ئەکادیمی، و ئامادەکردن شمارەیگ بەس لە ماموستایەیل کە کوردی و رێزوانەگەی خاس بزانن، لە دیدگەی ئەو تاقیکردنیگ بنەڕەتی نوێنەرایەتی کەن، و هوشداری دا کە کەمیکردن کادرەیل شایەت وانە نووەیل ئاڵشت بکەێد ئەرا "تەنیا رووکاریگ شیوەیی کە هیچ بەهایگ پەروەردەیی نەیرێد".
دۊای ساڵ 2011، هاوکیشەگە لە بەشەیل فراوانیگ لە باکوور خوەرەڵات سوریا ئاڵشت بۊ.
وەگەرد کەمەوبۊن دەسەڵات دیمەشق، وەکارهاوردن زوان کوردی فراوانتر بۊ، دۊاتر بۊە زوانیگ فێرکاری لەناو ئەو سیستمە کە ئیدارەی زاتی پەرە وەپی دا، و نەوەیگ لە خوەنەوارەیل دروس بۊن کە ئەرا ساڵەیل یەک لەشۊن یەک وەپی خوەنستنە.
وەلی ئەو سیستمە لە دەیشت رێکخستن فەرمی ئەرا دەوڵەت ناوەندی مەنەو، و پرۆگرامەیل و بڕوانامەیل و دانپیادانان وەپیان لەلایەن دیمەشقەو مەنە جی ناکۆکی.
عەبد عیسا ئەرا شەفەق نیوز ئۊشێد کە شوینەوار دەیەیل گوزەشتە تۊەنریەێد وە ئاشکرا ناوەین نەوە نووەیل بوینیەێد.
فرەیگ لە گەنجەیل، وەپای قسەی ئەو، وە کوردی قسە کەن وەلی خوەنستن و نۊسانن وەپی خاس نیەزانن، لە ئەنجام نەۊینی ئەرا ماوەیگ دریژ لەناو فێرکردن فەرمی.
هەمیش ئۊشێد "ئەوەگ خوازیاگە پرۆگرامەیل قایم، و ماموستایەیل لیهاتگ، و پاڵپشتی فەرمی و فەرهەنگییە تا زوانەگە شوین سروشتی خوەی لە نیشتمانمان سوریا گلەو بخوەێد".
چوودە دویرتر لە مەکتەو و ئۊشێد "گرفتەگە لەکوورەس کە کۆلێژیگ ئەرا ئەدەبیات کوردی لە زانکۆیەیل سوری هەسەو بوود، تەنانەت بەرنامەیل ئەرا دکتۆرا وە زوان کوردی چۊ هەر زوانیگ ترەک؟".
کوردی لە کوو خوەنیەێد؟
وەپای لێدوانەیل وەزیر پەروەردە محمد عەبدولڕەحمان ترکۆ، نەبایەس تاقیکردنەگە تەنیا لەبان پارێزگای حەسەکە یا ئەو ناوچەیلە کە فرەیی کوردی دیرن سنووردار بوود.
ترکۆ وت کە فێرکردن وە کوردی بایەسە بڕەسێدە ئەو ناوچەیلە کە کورد لەناوی هەس، جۊر حەڵەب و دیمەشق و حومس و حەما، بیجگە لە عەفرین، کە وت وەزارەتەگە کار کەێد لەبان وازکردن فێرکردن وە کوردی لەناوی و ئامادەکردن ماموستایەیل.
وەلی لەلای کادر ماموستایەیلەو، بڕیارەگە نۊسان کە تۊەنریەێد ماموستایەیل لەناو میلاک وەزارەت یا لە دەیشتیا بارن، وەگەرد خستنەژیر ئەو کەسەیلە کە پیشکەش کەن ئەرا تاقیکردنیل نۊسیاگ و زارەکی ئەرا دڵنیابۊن لە زانستن زوانەگە، و رێکخستن بەرنامەیل مەشق و ئامادەکردن ئەرايان.
شایەت یە یەکەمین تاقیکردنەیل کرداری ئەرا بڕیارەگە بوود، چۊنکە سیستم فێرکاری ناوەندی، ئەرا چەن دەیەیگ، پرۆگرامەیل کوردی بەرهەم نەیاورد یا ماموستایەیل ئەرا زوانەگە وەو فراوانییە کە ئیسە خوازیاگە ئامادە نەکرد.
و پشتگووخستن وەخت بڕیارەگە سەختە، کە رێککەفتن 10ی ئازار 2025 ناوەین شەرع و مەزڵووم عەبدی نۊسانۊد کە کۆمەڵگەی کوردی پێکهاتەیگ رەسەنە لە دەوڵەت سوری، و لەبان مسۆگەرکردن مافەیل دەستووریی و مافی لە وڵاتینامە، لەشان تیکەڵکردن دامەزراوەیل مەدەنی و سەربازی لە باکوور خوەرەڵات وڵاتەگە لەناو دامەزراوەیل دەوڵەت.
جیوەجیکردن رێککەفتنەگە ریگریکردن کەفتە نوای وەرجە ئەوەگ رێڕەوەگە لە ماوەی ساڵ 2026 بکەفێدە جۊلە.
لە 25 ئاب، عەبدی لە دیمەشقەو خەوەر دا لە کووتاییهاتن ئەرک "هەسەدە" و هەڵوەشاننی چۊ هیزیگ سەربازی سەروەخوەی، دۊای تەواوبۊن پرۆسەی تیکەڵکردنی لەناو دامەزراوەیل دەوڵەت.
دۊای دوو رووژ بڕیار فراوانکردن شوین کوردی لەناو پرۆگرامەیل دەرچگ، دۊاتر عەبدی چۊ راوێژکاریگ لای سەرۆکایەتی کۆمار دامەزریا.
و یەک لەشۊن یەک هاتن ئی رۊداوەیلە بەس نییە ئەرا چەسپانن بۊین پەیوەندییگ دانوسەنین راستەوخۆ ناوەینیان، وەلی سروشت قۆناغ نووەگە ئاشکرا کەێد.
وەگەرد ئاڵشتبوین سەنگ سەربازی و کارگێڕی ئەرا دامەزراوەیل دەوڵەت، باس کوردی وە شیوەیگ زیایبۊ ئاڵشت بوود ئەرا سروشت ئەو مافەیلە کە ئی دامەزراوەیلە مسۆگەریان کەن، و ئاست توانایان لەبان وەردەوامبۊن دۊای کووتاییهاتن رێکخستنەیل.
لەیرە خەلدون قەتلان دۊنێد کە سەختی راسگانی دەرچگن بڕیارەگە نییە ئەوەنەی کە وەردەوامبۊنیە.
پرسیاریش کەێد کە ئایا گامەیل ئیسە سەرەتایگ بوود ئەرا "سیاسەتیگ نیشتمانی گشتگیر کە دان وە هەمەجۊری سوریا وە گشت پێکهاتەیلی بنەێد"، یا بەسیای وە رەوشیگ سیاسی دیاریکریاگ مینێدەو.
تاقیکردن شەشەی ئەیلول
عەبدولحەکیم بەشار دۊنێد کە گام فێرکارییەگە، وەو گرنگیە کە دیرێدەی، وە تەنیا بەس نییە ئەرا مسۆگەرکردن مافەیل کوردی ئەگەر وە یاسایەیل ئاشکرا و چەسپانن دەستووری کە ریگری لە پەشیمانەوبۊن لەلی بکەێد لە بانان، پاڵپشتی نەکریاگ.
وەلی وەرجە رەسین ئەرا دەستوور، تاقیکردنیگ نزیکتر هەس کە وەگەرد وازکردن مەکتەوەیل لە شەشەی ئەیلول دەس وەپی کەێد.
لەو رووژە ئەو هۊردەکارییەیلە دەرکەفن کە بڕیارەیل وە تەنیا ئاشکرایان نیەکەن، لە شمارەی ئەو مەکتەوەیلە کە کوردی خوەنن، و ئامادەبۊن ماموستایەیل و کتاوەیل، تا رەسیەێدە ئەو شیوازە کە وانەیل لەناو خشتەگە خریەن و ئاست رۊکردن خوەنەوارەیل وەرەو پی.
و ئی هۊردەکارییەیلە ئەوانەن کە وە کرداری دیاری کەن، کە ئایا بڕیارەگە بنەما ئەرا رێڕەویگ فێرکاری داناگە کە شایستەی وەردەوامبۊن بوود، یا لە سەرەتایەو وەرەوڕۊ ئەو گرفتەیلە بوود لە جیوەجیکردن کە سیاسەتمەدارەیل و توێژەرەیل کورد هوشدارییان لەلی دانە.
ئەو ماموستا کە لە پەروەردە دەرکریا چۊنکە "وە کوردی خەنیە" دی تومەتەگەی نەمەنیە، و ئەو وەزارەتە کە دەریکرد ئمڕوو خەوەر دەێد کە هەوەجەی وە ماموستایلیگ چۊ ئەو هەس، و تاقیکردن زانستنیان ئەرا زوانەگە کەێد، و پرۆگرامەیلیش ئەرايان چاپ کەێد.
تەنیا ئەوە مەنێد کە خوەنەوارەیل لە ئەیلول لە نوايان بنیشن، و لە ئەیلول ئایندە گلەو بخوەن ئەرا خود پۆلەگە.