وه‌گوره‌ی هه‌واڵێگ ڕووژنامه‌ی (باس)، پارت دیمۆكرات كوردستان ئه‌ڕا چاره‌سه‌ركردن قه‌یران ناونی هه‌رێم‌و به‌غدا، هاته‌ما پێشنیار كۆنفدراڵی ئه‌ڕا هه‌رێم كوردستان بخاده‌ڕوی، سه‌ركرده‌یگ كۆمه‌ڵ ئسلامیش جه‌خت له‌وه ئه‌كاده‌و، كۆمه‌ڵ ئسلامی پشتگیری له‌هه‌ر هه‌نگاوێگ ئه‌كا ك بارودۆخ هه‌رێم وه‌ره‌و نوا بواد.
(زانا سه‌عید ڕۆستایی) ئه‌ندام ئه‌نجومه‌ن شورای كۆمه‌ڵ ئسلامی كوردستان، سه‌باره‌ت وه‌كۆنفدراڵی ئويشێ: كۆمه‌ڵ ئسلامی پشتگیری له‌هه‌ر هه‌نگاوێگ ئه‌كا، ك بارودۆخ هه‌رێم كوردستان وه‌ره‌و نوا بواد و له‌سه‌روه‌خۆیی سه‌رتاسه‌ری نزیكه‌و بكاده‌و، هه‌ر كارێگیش له‌و چوارچێوه وه‌ڕاوێژ‌و گفتوگووی ناونی لایه‌نه‌يل سیاسی بكريه‌ێد، پلان‌و به‌رنامه‌ی تایبه‌ت ئه‌ڕاێ دابنريه‌ێد، وه‌دڵنیایيه‌و كۆمه‌ڵ ئسلامیش پشتگیری له‌لێ ئه‌كا.
وتیش: "وه‌رجله ساڵ (2003) هه‌رێم كوردستان له‌ڕوی ئیدارییه‌و فره له‌ئيسه خاستربويه، چوينكه له‌و وه‌خته كوردستان جوورێگ له‌سه‌روه‌خۆیی داشت، وه‌لێ له‌شوون (2003) هه‌رێم كوردستان له‌ڕوی ئیداریه‌و ملكه‌چ عێراق بويه، وه‌وخاتريشه هه‌رێم كوردستان پاشه‌كشه‌ی وه‌رچه‌ویگ وه‌خوه‌يه‌و ديیه له‌گشت بواره‌گان، وه‌يخاتره ئيسه گشت ئه‌گه‌ره‌گان ئه‌وه ئسبات كه‌ن، ك چاره‌نويس كورد وه‌ل عێراق نیه، هه‌رچه‌نێگ كورد له‌عێراق نزيك بوود، چاره‌نويس كورديش كه‌فێده خه‌ته‌ر، له‌وه‌رئه‌وه كۆمه‌ڵ ئسلامی هاوه‌ل هه‌ر هه‌نگاوێگ ك وه‌شێوه‌ی خاسێگ خوه‌ندنه‌وه ئه‌ڕاێ كرياويد و وه‌یه‌كڕزی نیشتمانی ئه‌نجامبدريه‌ێد، كۆمه‌ڵ ئسلامی پشتگیری له‌لێ ئه‌كا".
باوه‌ت ئعلان كردن كۆنفدراڵی ئه‌ڕا هه‌رێم كوردستان، هه‌وه‌جه وه‌یه‌كڕزی نیشتمانی‌‌و ڕاپرسی جه‌ماوه‌ری ديرێ، ئه‌ڕا ئه‌وه‌گ له‌دوياڕووژ پاشگه‌زه‌وبوين له‌تێ نه‌ود.
(محه‌مه‌د ئه‌حمه‌د) ئه‌ندام مه‌كته‌ب سیاسی یه‌كگرتوی ئسلامی كوردستان ئويشێ: یه‌كگرتووی ئسلامی باوه‌ڕ وه‌سه‌روه‌خۆيی تهواو ديرێ ئه‌ڕا كوردستان، ئيسه ئعلان كردن كۆنفدراڵی جوور هه‌نگاو یه‌كه‌م ئه‌ڕا سه‌روه‌خۆیی كار خاسێگه، وه‌لێ كۆنفدراڵی هه‌وه‌جه وه ئاماده‌كاری تهواو و نه‌خشه‌ڕێ ديرێ، ئه‌ویش له‌ڕوی سیاسی، ئابووری، كومه‌ڵایه‌تی، په‌یوه‌ندیه‌يل ديپلۆماتی و ڕاپرسی جه‌ماوه‌ری، چوينكه ئه‌وه پرسێگ نه‌ته‌وه‌ییه‌‌و بايه‌د ڕاێ هاووڵاتیه‌یل كوردستان له‌تێ وه‌ربگيريه‌ێد.
(محه‌مه‌د ئه‌حمه‌د) وتیش:"ئيمه جوور یه‌كگرتووی ئسلامی هايم وه‌ل ئه‌وه‌يا ك ڕووژێگ له‌ڕووژان خه‌و دروسبوين ده‌وڵه‌ت سه‌روه‌خوه‌ی كوردی باێده دی و كورد وه‌مافه‌يل ڕه‌واێ خوه‌ی بڕه‌سێ".
پێشنیار كۆنفدراڵی ئه‌ڕا كوردستان ك پارت دیمۆكرات كوردستان هاته‌ما بخه‌ێده‌ێ ڕوی، باوه‌تێگ هه‌ستیاره‌‌و په‌یوه‌ندی وه‌وڵاته‌یل ناوچه‌گه‌‌و هه‌رێمیه‌وه ديرێ، په‌رله‌مانتارێگ فراكسیۆن یه‌كيه‌تی نیشتمانیش جه‌خت له‌وه ئه‌كاده‌و، باوه‌ت كۆنفدراڵی هه‌وه‌جه وه‌دو بنه‌مای سه‌ره‌كی ديرێ ئه‌وانه‌یش سه‌قامگیری‌‌و وه‌رده‌وامیه.
(گۆران ئازاد) ئه‌ندام په‌رله‌مان كوردستان له‌فراكسیۆن یه‌كيه‌تیی نیشتمانی كوردستان ئويشێ: باوه‌ڕ نيه‌كه‌م له‌په‌رله‌مان كوردستان وه‌ئاسانی باوه‌ت كۆنفدراڵی ده‌نگ له‌بانێ بدريه‌ێد، چوينكه ئه‌و باوه‌ته په‌یوه‌ندی وه‌ناوچه‌گه‌‌و ده‌وڵه‌ته‌يل هه‌رێمیه‌و ديرێ، وه‌ل ئه‌وه‌يشا هویچ كه‌سێگ نیه له‌كوردستان، دژ كۆنفدراڵی هه‌رێم كوردستان‌و خواست نه‌ته‌وه‌ی كورد بوود، وه‌لێ باوه‌ت وه‌ده‌وڵه‌ت بوين كوردستان هه‌وه‌جه وه‌دو بنه‌مای سه‌ره‌كی دێرێ، ك ئه‌وانه‌يش سه‌قامیگری‌‌و وه‌رده‌وامین، ك دوو بنه‌مای سه‌ره‌كین ئه‌ڕا دروسبوين هه‌ر وڵاتێگ سه‌روه‌خوه‌ێ.
په‌رله‌مانتاره‌گه‌ی یه‌كيه‌تی زياتريش ئویشێ:"كۆنفدراڵی فره گرنگه ئه‌ڕا نیشته‌جايه‌یل كوردستان، وه‌يخاتره بايه‌د به‌شداری له‌و باوه‌ته بكه‌ن، چوينكه شايه‌د وه‌ره‌و خوه‌شگوزه‌رانی‌‌و ئارامی یا له‌ناوچين بچن، وه‌يخاتره بايه‌د له‌هه‌ردو حاڵه‌ته‌گه پشتیوانی جاماوه‌ری‌‌و نه‌ته‌وه‌یی ئه‌ڕا ئه‌و باوه‌ته وجوود داشتوود".
NNA
ا. ج