شه‌فه‌ق نيوز/ چه‌ودێر عراقى ئه‌را مافه‌يل ئاده‌ميزاد باس له‌وه كرد ك نزيكه‌ێ 90 هه‌زار كووچبه‌ر له كه‌مپ ئومولجه‌رابيع له ناحيه‌ێ ته‌لعه‌بته(وه‌دويرى 73كم له شار موسڵ)له‌بان خاك وه‌بى خه‌يوه‌ت يا ده‌سميه‌ت و ته‌نانه‌ت خواردنيش نه‌يرن، ك له‌ناونيان مناڵيگ و پيره ژنيگ له تيه‌نگێ مردنه.
چه‌ودێره‌گه له راپۆرتيگ ئه‌را(شه‌فه‌ق نيوز)دوياى سه‌دانيكردنى وت: ئه‌و شوونه ك 90 هه‌زار كووچه‌به‌ر له‌تى وجوود ديرێد وه‌پى ئويشن كه‌مپ، وه‌لێ له‌ڕاسى بيجگه شوونيگ ته‌له‌به‌نكرياێ هويچ تر نيه‌و ته‌نيا 200 خه‌يوه‌ت يا كه‌متر گرته‌سه خوه‌ێ و خيزانه‌يليش له‌تى بى خوه‌راك و ئاون.
چه‌ودێره‌گه وت: بايه‌سه له‌بان هه‌ردوگ حكومه‌ت ناوه‌ندى و ناوچه‌يى له پاريزگاى نه‌ينه‌وا هه‌ڵه‌په‌ڵه بكه‌ن ئه‌را په‌ياكردن چاره‌سه‌ر و پيشكه‌شكردن ده‌سميه‌ت ئه‌را كووچبه‌ره‌يل له كه‌مپ ئومولجه‌رابيع و باوردوخ له‌ورا وه‌رگه‌ێ ده‌ياخستن ناگرێد و كووچبه‌ره‌يل وه‌بى خه‌يوه‌ت و خوه‌راك مه‌ندنه.
چه‌ودێره‌گه له زووان كووچبه‌ريگه‌و له كه‌مپه‌گه ك له‌ساێ سه‌ياره‌ێ گه‌ورايگ وه‌ل خيزانه‌گه‌ێ نيشتگه وت: كه‌مپه‌گه هويچ خزمه‌تگوزارييگ له‌تى نيه‌و كيشه ها له‌ورا ئيمه‌يش په‌س وپووڵه‌يلمان وه‌ل خوه‌مان هاورديمنه‌و هويچ ده‌سميه‌تيگ وه‌پيان ناڕه‌سێد، به‌ڵكوو ته‌نيا بڕيگ ته‌نكه‌ر ئاو پيس وه‌پيمان ره‌سيه‌و جى له‌ناو سه‌ياره‌يلمان خستيمنسه‌و تا مقه‌يه‌تى خوه‌مان له گه‌رمى خوه‌ر بكه‌يم.
وه گووره‌ى چه‌ودێره‌گه، يه‌يش ده‌ركه‌فت ك كووچبه‌ره‌يل له‌ورا له كومه‌ڵگه‌ێ ئه‌لسه‌گار و ئه‌لڕساله‌و قه‌زاێ ئه‌لبه‌عاج واينه، بيجگه ئاوايه‌يليگ مه‌رزى ك مه‌ردمه‌گه‌ێ واينه وه‌ره‌و لاى هيزه‌يل حه‌شد شه‌عبى.
له‌ى باوه‌ته‌و، پيره‌ژنيگ خه‌ڵك قه‌زاێ ئه‌لبه‌عاج وت: حاڵه‌ت مناڵه‌يل فيره مه‌ويسيه‌و شايه‌ت حاڵه‌ت مردنيش له ناونيان بوود له رووژه‌يل ئاينده‌و زويتري مناڵيگ و پيره‌ژنيگ له تيه‌نگێ گيان له‌ده‌سدانه.
وه‌ل ئه‌وه‌يشا چه‌ه‌ودێره‌گه باس له‌وه‌يش كرد له وه‌خت سه‌ردانى ئه‌را ئه‌و كه‌مپه هويچ ئه‌نداميگ له حكومه‌ت ناوچه‌يى نه‌كه‌فته‌سه وه‌رچه‌وێ و ته‌نانه‌ت هويچ كه‌سيگيش له حكومه‌ت ناوه‌ندێ و مه‌ردمه‌گه‌يش له‌ورا له چووڵه‌وانى مه‌ندنه‌و تكاو رجا ئه‌كه‌ن ئه‌را ئاو پاك تا بخوه‌نه‌ێ و هويچ ريكخرياگيگ هاناڕه‌سيش له‌ورا وجوود نه‌يرێد.
هه‌ر وه‌و خاريشه چه‌ودێره‌گه وه‌رپرسيارێتى سه‌ڵامه‌تى گشت شه‌و كووچبه‌ره‌يله له كه‌مپ ئومولجه‌رابيع خسته بان هه‌ردوگ حكومه‌ت ناوه‌ندێ و ناوچه‌يى له پاريزگاى نه‌ينه‌واو داوا له‌ليان كرد ڕى وشوون خواست له‌وه‌ر بگرن و جواو داواكارى مه‌ردم ئه‌و كه‌مپه بيه‌نه‌و وه‌ل خواست پيشكه‌شكردن ده‌سميه‌ت گورج ئه‌را 90 هه‌زار مه‌ده‌نى ك ئه‌را ماوه‌يگ چه‌ن رووژيگه وه‌بى ئاو و خواردن مه‌ندنه و هانه ناو شوونه‌يل ئازادكردياگ نه‌ك له ناوچه‌يل ژير ده‌سڵات ريكخرياگ ترۆريستى داعش.