شه‌فه‌ق نيوز/ وه‌ل وه‌ره‌ونواچين بوار گه‌شتیاری له‌هه‌رێم كوردستان، وه‌و جووره‌گ شاره‌زایه‌یل ئه‌و بواره باسێ ئه‌كه‌ن، كێشه‌و گرفته‌یل په‌یوه‌نديدار وه‌و بواره ساڵانه ڕوی له‌زیاێبوين كه‌ن، به‌ش فره‌ێگ له هاووڵاتیه‌یل هه‌رێم كوردستان ناڕه‌زایی‌و گله‌یی خوه‌ێان له وه‌رانوه‌ر ئه‌و كارگه‌ر و كارمه‌نده‌يل بێگانه نيشان ده‌ن، ك له‌شوونه‌يل گه‌شتیاری كار كه‌ن، وه‌قسه‌ی ئه‌و هاووڵاتیه‌يله به‌ش فره‌ێگ له‌و كارمه‌نده‌يله ناتويه‌نن وه‌زووان كوردی قسه بكه‌ن، ئه‌وه‌يش جوور كێشه‌ی گه‌ورايگ نیشان ده‌ن.
(نادر ڕۆستی) قسه‌كه‌ر وه‌ناو ده‌سه‌ی گه‌شتوگوزار هه‌رێم كوردستان له‌و باره‌‌وه‌باس له‌وه ئه‌كا، داناين كارمه‌نده‌یل بێگانه له‌شوينه‌يل گه‌شتیاری خواست ئه‌وان نیيه، وه‌لێ جوور ڕێ چاره‌یگ ئه‌ڵته‌رناتیڤ په‌نا ئه‌ڕاێان بريه‌ێد، وه‌قسه‌ی (نادر ڕۆستی) خه‌ڵك هه‌رێم كوردستان خوه‌یان ئاماده نین بچن له‌و شوونه‌يله كار بكه‌ن، له‌وه‌ر ئه‌وه‌يش ناكريه‌ێ ئه‌و شوونه‌يله بێ كارمه‌ند بمێننه‌و.
شاره‌زایه‌یل بوار گه‌شتیاری ئويشن، لوه‌ل ئه‌وه‌گ بايه‌سه كارمه‌نده‌یل شوونه‌يل گه‌شتیاری شاره‌زای زووانه‌يل بێگانه بوون، هاووه‌خت بايه‌د زووان داڵگی ئه‌و شوونيشه وه‌خاسی بزانن ك كار له‌تیان كه‌ن، وه‌قسه‌ی ئه‌وان مۆرك‌و شێواز هه‌ر وڵاتێگ دۆنیا وه‌زووان‌و مامه‌ڵه‌ی كه‌سه‌یل شوونه گه‌شتیاریه‌گان ناسريه‌ێده‌و، ڕاسه له‌دیمێگ شايه‌د ئه‌وه یه‌كێگ له‌حاڵه‌ته‌يل ئه‌رێنی بوود، ك ڕێژه‌ی فره‌ێگ گه‌شتیار ساڵانه سه‌ردان هه‌رێم كوردستان كه‌ن، وه‌لێ ناكريه‌ێ و نادێ له‌وه‌رخاتر ئه‌و ڕێژه گه‌شتیاره، زووان داڵگی نه‌ته‌وه‌ی كورد له‌هويره‌و بچوود و پشتگووش بخريه‌ێد.
له‌شوون ئه‌وه‌گ هه‌رێم كوردستان كريانه‌وه‌ی دیارێگ له‌بوار كه‌رت گه‌شتیاری وه‌خوه‌یه‌و دييه، ڕێژه‌ی فره‌ێگ ڕیستۆرانت‌و هۆتێل‌و مۆتێل جووراو جووريش له‌هه‌رێم واز كريان، ئه‌و گه‌شه‌كردنيشه فره‌جار جوور ئه‌وه‌گ وه‌دیئه‌كريه‌ێد جوورێگ له بێ به‌رنامه‌یی وه‌پێه‌و دیاره، به‌شێگ له‌شاره‌زایه‌یل بوار گه‌شتیاری هانه بان ئه‌و باوه‌ڕه، داين هه‌ساره وه‌شوونه‌يل گه‌شتیاری هه‌وه‌جه وه‌چه‌نه‌ها بنه‌ماو مه‌رج ديرێ، چه‌نه‌ها پێوه‌ر ناوده‌وڵه‌تی هه‌س ك بايه‌د له‌داين هه‌ساره‌گان له‌وه‌رچه‌و بگيريه‌ن.
وه‌رپرسه‌یل گه‌شتوگوزار له‌هه‌رێم كوردستان له‌و باره‌‌وه ڕاێ جیاواز دێرن و ئاماژه وه‌وه كه‌ن، ساڵانه وه‌ل زیاێه‌وبوين ڕێژه‌ی گه‌شتیاره‌يل، پلان‌و به‌رنامه‌ی نوو دێرن و ته‌قالا كه‌ن، خزمه‌تگوزاری‌و پێشوازی له‌گه‌شتیاره‌يل په‌ره وپێ بيه‌ن‌و چه‌نه‌ها شوون تازه‌ێ گه‌شتیاری له‌هه‌رێم واز بكه‌ن، شاره‌زایه‌یل ئابوریش له‌و باره‌‌وه ئويشن، كه‌رت گه‌شتیاری له‌هه‌رێم بايه‌د جوور یه‌كێگ له‌پایه‌يل سه‌ره‌كی داهات هه‌رێم كوردستان ته‌ماشا بكريه‌ێد، له ئاينده باێه‌د كه‌رت گه‌شتیاری له‌شان داهاته‌یل تر هه‌رێم حساوێگ جدی ئه‌ڕاێ بكريه‌ێد.
(نادر ڕۆستی) ئاماژه وه‌وه ئه‌كا، ساڵ له‌شوون ساڵ كه‌رت گه‌شتیاری له‌هه‌رێم كوردستان وه‌ره‌ونواچين زیاتر وه‌خوه‌ێه‌و دوينێ، له‌وه‌رانوه‌ر ئه‌و زیاێكرنيشه ئه‌وان جوور ده‌سه‌ی گه‌شتوگوزار پلان ستراتیژی و نوو دێرن
.
NNA
ا. ج