هه‌رێم كوردستان جوور شوونيگ نموونه‌ييه ئه‌را گه‌شتياره‌يل وه‌تايبه‌ت له وه‌رز وه‌هار و تاوسان، ئه‌ويش له‌وه‌ر شوونه‌يل تايبه‌ت وه داشتن مه‌ی و شه‌راو و بڕيگ يانه‌يل شه‌وانه، يه‌يش بيجگه فيشتر له ٢٠٠ ميوانخانه‌ی گه‌شتياری ك فيشتر له ١٠ ميوانخانه‌يان په‌نج ئه‌ساره‌ن و شماره‌ی گه‌ورايگيش له ئاشخانه‌و كافتريا، ك زوورميان شه‌راو له‌تی پيشكه‌ش ئه‌كه‌ن.
وه‌لێ قه‌يران ئابووری ئی دوياخره و ئه‌و په‌لاماره‌يله ك ترۆريسته‌يل ريكخرياگ داعش ئه‌نجاميدا له ده‌ورگرد كوردستان وه‌شيوه‌ی گه‌ورايگ كاريگه‌ری كرده بان جموجويل گه‌شتياری له گشت كوردستان.
ئه‌را نموونه‌يش له هه‌ولێر پايته‌خت هه‌رێم كوردستان، شاريگ جوور عه‌ينكاوا ك زوورم مه‌ردمه‌گه‌ی مه‌سيحيه، بڕيگ له يانه‌يل شه‌وانه‌ی موڵه‌ت وه‌پيدرياگ و ناياسايی له‌تی وجوود ديرێد.
له‌ی باوه‌تيشه‌و، وه‌رپرسيگ له ليژنه‌ی گه‌شتياری كوردستان ئه‌را(شه‌فه‌ق نيوز)وت: ته‌نيا ١٣ شوون تايبه‌ت وه خواردنه‌وه‌ی مه‌ی وشه‌راو له ده‌يشت ناحيه‌ی عه‌ينكاوا موڵه‌ت وه‌پيان درياگه، وه‌نا شوونه‌يليگ تر هه‌ن له‌هه‌مان ناحيه‌گه وه‌ناياسايی واز ئه‌كه‌ن.
وه‌ل ئه‌وه‌يشا شماره‌يگ له‌مه‌ردم و گه‌شتياره‌يل فريه‌يگ، شار عه‌ينكاوا وه "بلاس فيغاس" ئه‌مريكی تاريف ئه‌كه‌ن ك يانه‌يل شه‌وانه و شوونه‌يل قوماركردن و شه‌راوخواردن ديرێد.
له هه‌مان وه‌خت مه‌ردمانيگيش له مه‌ردم ناحيه‌گه‌و بڕيگ له پياوه‌يل ئايينی له هه‌ولێريش له‌ی دوياخره خوه‌ينيشانداينيگ ناڕه‌زايه‌تی ريكخستن و له‌تی داوا له حكومه‌ت هه‌رێم كوردستان كردن شوونه‌يل مه‌ساجكردن و يانه‌يل شه‌وانه داخريه‌ێد.
هێرش حسێن نوێنه‌ر پاريزگای هه‌ولێر و وه‌رپرس ليژنه‌ی باڵا ئه‌را چه‌وديری ياساشكنی و سه‌رپيچيه‌يل له پاريزگاگه ئه‌را(شه‌فه‌ق نيوز)وت: ليژنه‌گه ك ئه‌ندامه‌يليگ له ئاسايش و پۆليس و باجداين گرته‌سه خوه‌ی وه فه‌رمان وزاره‌ت ناوخوه‌يی ده‌سكرده‌سه داخستن شماره‌يگ له شوونه‌يل مه‌ساجكردن و قومارخانه‌و دوكانه‌يل فرووشتن مه‌ی وشه‌راو.
وه‌رپرسيگيش له گه‌شتياری كوردستان باس له‌وه كرد ك مه‌سه‌له‌گه له‌ده‌س پاريزگای هه‌ولێر ده‌رچيه‌و حكومه‌ت ده‌سكرده‌سه له‌وه‌رگرتن ڕی وشوون جددييگ ئه‌را مه‌رزناين له بڵاوبوينه‌وه‌ی گورج ئی ديارده.
ئه‌و وه‌رپرسه له گه‌شتياری كوردستان ئه‌را(شه‌فه‌ق نيوز)وت: حكومه‌ت ده‌سكرده‌سه له‌وه‌رگرتن ڕی وشوون تونيگ له‌بان يانه‌يل سه‌نديكا له هه‌ولێر جوور هه‌وڵيگ ئه‌را مه‌رزناين له مه‌سه‌له‌ی پيشكه‌شكردن مه‌ی وشه‌راو، يه‌يش بيجگه ئه‌وه‌گ له‌وه‌رانوه‌ر واوكردن هه‌ر شوونيگ ئه‌را شه‌راوخانه ٢٥ مليۆن دينار وه‌رئه‌گرێد ئه‌را ساڵ يه‌كه‌م و هه‌ر تازه‌كردنه‌وه‌يگيش ١٣ مليۆن دينار وه‌رئه‌گرێد.
يه‌يش له‌وه‌ختيگه ك زوورم شاره‌يل هه‌رێم كوردستان له ٢٠١١ ناڕه‌زايه‌تيه‌يل فريه‌يگ له‌تيان روێدا وه پشتگيری و سه‌رپه‌رشتی پياوه‌يل ئايينی ئه‌را داخستن و به‌سانن و ويرانكردن چه‌نه‌ها شوونه‌يل مه‌ساجكردن و دوكانه‌يل فرووشتن شه‌راو.
وه‌رپرسه‌گه‌ی گه‌شتياری كوردستان باس له‌وه‌يش كرد ك راده‌ی فروشتن تايبه‌ت له گشت جووره شه‌راويگ وه‌گووره‌ی ئامار وه‌ی جووره‌سه: 30% ويسكى، 20% فودكا، 20% بيره، 20 شه‌راو جياجيا. يه‌يش له‌وه‌ختيگ وه‌ل قه‌يران ئابووريش هيمان تائيسه‌يش نزيكه‌ی ١٠% گرينگی ئه‌يه‌نه شه‌راو جه‌هانی.
يوسف ك كابرايگ مه‌سيحيه ئه‌را(شه‌فه‌ق نيوز)وت: زوورم ئه‌و كه‌سه‌يله ك روی له شوونه‌يل و يانه‌يل شه‌وانه ئه‌كه‌ن له پياوه‌يلن و ريژه‌ی ئافره‌ته‌يل له‌تيان كه‌مه‌و بيگانه‌ن يا له ده‌يشت شاره‌يل كوردستانن.
هه‌ر له‌ی باوه‌تيشه‌و مزهر عه‌لی ك شاره‌زايگ ئابووريه ئه‌را(شه‌فه‌ق نيوز)وت: بايه‌سه له‌بان حكومه‌ت هه‌رێم له‌وه‌رخاتر قه‌ره‌بووكردن قه‌يران ئابووری و داوه‌زين نرخ نه‌فت گرينگی فريه‌يگ بيه‌ێده يانه‌يل شه‌وانه‌و دامه‌زرانن شوونه‌يل تايبه‌ت ئه‌را مه‌يلداره‌يل ئی مه‌سه‌له، چوينكه يه‌يش پرووژه‌يگ وه‌به‌رهاوردنه.