شه‌فه‌ق نیوز/ وەرپرسیگ ئەمنی لە پۆلیس ئەنبار ئەرا ئاژانس شەفەق نیوز ئویشێد: شوینەگە دیاری کریا و ریکارەیلیگ ئەمنی لەدەورگردی چەسپانن باوجی تا ئیسە هیچ ریکارەیلیگ ئەرا ئاشکراکردن ناسنامەی قوربانیەیل یا ئی قەورسانە هن کیە نەویە، و قەورسانەگە لەوەر کەشوهەوا و چاڵکەنین ئاژەڵەیل ئاشکرا کریا و بڕێ سوخان کەفتە بان زەویەگە.
وەرپرسە ئەمنیەگە دیاری کرد ک فەرماندەی پۆلیس چەوەڕی گامەیلیگ لەلایەن دامەزراو شەهەیدەیل و فەرمانگەی تەندروسی ئەنبار دەربارەی مقەیەتیکردنی ئەو قەورسانە کەێد.
ئی قەورسان نووە خوەی سێیەمە لەی جوورە ک لەماوەی دوو ساڵ ئاشکرا کریاگە، ک وەرجەیە قەورسانەیلیگ تر لە ئاوای ئەبو فەیاز و یەکیگ تر لە ناوچەی ردێنی لە خوەرهەڵات ئەنبار پەیا کریاگە.
نواگردن باڵیگ چەکدار خوازێ باێدە ناو
خود وەرپرسەگە دووپات کەێد ک تا ئیسە شوینەگە بەسیاگە، و نووڕستنیگ لەلی کریاگە و پڕتاڵەیل عەرەوی «دشداشە» و دڵنگەیل وەرزشی دیار دەێد، و هەمیش کەپووڵەیلیگ دیار دەن ک شوین کوناکردن هاپیان، ک نشان دەێد تیرواران قوربانیەیل کریاگە.
وەرپرسە ئەمنیەگە ک نەخوازێ ناوی ئاشکرا بوود نشان دەێد ک باڵیگ چەکدار ئەرا چەن جاریگ تەقەلا دا باێدە ناو قەورسانەگە، و دووپات کرد ک نەیشتن باێدە ناو تا بەڵگەیل نەشوینن و دەسکاری شوینەگە نەکەن.
وەرپرسە ئەمنیەگە جەخت کرد لە گرنگی زوی دەسناین دەسەڵاتەیل و تەندروسی گشتی لەبان قەورسانەگە و هەکاتی ئەو قەورسانەیل بخەێدەی ژیر چەو دادوەری تا دەسکاری سیمایل تاوانەگە نەکریەێد ک مەزەنە کرد شایەت تیرواران مەیدانی بوود.
لەلای خوەییش عومەر فەرحان وەڕێۆبەر ناوەند عراقی ئەرا تۆمارکردن تاوانەیل جەنگ وت: ئەو زانیاریەیلە ک دەربارەی شوین قەورسانەگە رەسین دووپات کەن ک خوەی سەنگەر پشتینەی چەن باڵیگ چەکدار بویە.
فەرحان ئەرا ئاژانس شەفەق نیوز ئویشێد: یەکیگ لەو باڵەیلە وەرجە چەن رووژیگ تەقەلا دا باێدە ناو قەورسانەگە، وەلێ هێزەیل ئەمنی ئاگاداریان کردن ک شوینەگە هالە مقەیەتیکردن دادوەری، و بایەتە بچنە دویا، وەبی ئاشکراکردن ناو باڵەگە.
فەرحان هەمیش ئاشکرا کرد ک جەختەیلیگ هەس شایەت خوازن تاوانیگ لەی شوینە بشارنەو، و داوا لە دەسەڵاتە ئەمنیەکان کرد زوی ئی باوەتە یەکلاوە بکەن، وەرجەیە دەسکاری روخسار قەورسانەگە بکریەێد.