وه گووره‌ى ئه‌و ديمانه‌و ديداره‌يله ك له‌بان ماڵپه‌ره‌يل په‌يوه‌ندى كومه‌لايه‌تى ئاشكرا ئه‌كريه‌ێد، له‌تى ده‌يه‌ها جه‌نگاوه‌ر له سوپاى نيشتمانى و هيزه‌يل تايبه‌ت بيجگه له جه‌نگاوه‌ره‌يليگ له حه‌شد شه‌عبى و هيزه‌يل پێشمه‌رگه‌يش له‌ى مانگه‌يل دوياخره كووچ كردنه وه‌ره‌و ئۆرپاو له‌ليانيش هه‌س ئه‌خوازن له‌ى نزيكه‌يله ڕى بگرنه وه‌ره‌و ئه‌را ئۆرپا.
ئى سه‌ربازه‌يليشه له چوارچيوه‌ى ئه‌و مه‌ردمان مه‌دنيه‌سه ك له عراق ده‌رچينه‌و شماره‌يان فيشتره له 50 هه‌زار كه‌س مه‌ده‌نى له‌ى سێ مانگ دوياخره وه‌گووره‌ى ئه‌و ئاماره‌يله ك نه‌ته‌وه‌يل يه‌كگرتگ ئه‌نجامى داگه له چوارچيوه‌ى كووچكردن له ناوچه‌يل كيشمه‌كيشدار له خوه‌رهه‌ڵات ناوين.
له‌ى باوه‌تيشه‌و، قسه‌كه‌ر وه‌ناو وزاره‌ت وه‌رگرى عراقى ئه‌وه ده‌رخست ك سوپا كووچكردن ئه‌و سه‌ربازه‌يل نگه‌رانى ناكا ك شماره‌يان وه ده‌يان كه‌س مه‌زه‌نه كرد له هيزه‌يل ئاسايشى ئه‌وه‌نه‌ى شماره‌ى ئه‌و مه‌ردمه‌يل مه‌ده‌نيه ك شماره‌يان وه ده‌يه‌ها هه‌زاره.
عه‌ميد ته‌حسين ئبراهيم له‌ى باوه‌ته‌و وت: هيزه‌يل چه‌كداره ئه‌ركه‌يل خوه‌ى جيوه‌جى ئه‌كاو هه‌وه‌جه وه نگه‌رانى نه‌يرێد.
وه‌لى له‌لايگ تره‌و سه‌عيد كاكه‌يى راوێژكار وه‌زير هيزه‌يل پێشمه‌رگه له هه‌رێم كوردستان وت: ئه‌و شماره مايه‌ى نگه‌رانيه ك هه‌رچه‌نى شماره‌ى دياريكرياگيگ باس نه‌كرد ئه‌را ئه‌و پێشمه‌رگه‌يله ك واز له خزمه‌ت هاوردنه.
كووچكردن سه‌ربازه‌يل رووشنايى ئه‌خاده بان ئحساس وه دڵته‌نگى ناونى فريه‌يگ له عراقيه‌يل دوياى فيشتر له‌ساڵيگ له داگيركارى داعش له‌بان سێكوتى رويوه‌ر وڵاته‌گه‌و هه‌ڕه‌شه‌يلى ئه‌را داگيركردن به‌غداى پايته‌خت و ئعلانكردن ده‌وڵه‌ت خه‌لافه‌ت ئسلامى.
ئمجا هه‌رچه‌نى داعش له بريگ له ناوچه‌يل ده‌ركريانه، وه‌لى وه‌ل ئه‌وه‌يشا هيزه‌يل ئاسايشى باس له كووچكردن ئه‌كه‌ن، چوينكه وه‌قسه‌ى خوه‌يان له‌لايگه‌و رووژانه روى وه‌ڕوى جه‌نگ داش بوونه‌وه‌و له‌لايگيشه‌و له‌وه‌ر وجوود تون وتيژى تايفى و خراوبوين بار ئابوورى.
له هه‌مان وه‌خت چه‌كداره‌يل فريه‌يگيش له پياوه‌يل هيزه‌يل ئاسايش ئحساس وه داوه‌زين مه‌عنه‌ويات ئه‌كه‌ن له‌وه‌ر ئه‌وه‌گ ئه‌وان له به‌ره‌يل جه‌نگ وجوود ديرن و وه‌رپرسه‌يليش هويچ گرنگييگ وه‌پيان نايه‌ن و خه‌ريك گه‌ناته‌كارى خوه‌يانن.
پۆليسيگ له هيزه‌يل تايبه‌ت باس له‌وه كرد ك دوياى كوشيان براگه‌ى له جه‌نگ له نه‌فتپاڵوو بێجى بريار كووچكردن داگه، چوينكه وه‌قسه‌ى خوه‌ى عراق شايسته‌ى ئه‌وه‌سه وه‌رگرى له‌لى بكريه‌ێد، وه‌لى حكومه‌ت شايسته‌ى وه‌رگريكردن نيه، له‌وه‌ر ئه‌وه‌گ هويچ گرينگييگ وه پييان نايه‌ێد.
ئه‌و پۆليسه هه‌ميش وت: شكه‌ست حكومه‌ت به‌غدا له پشتگيريكردن سه‌ربازه‌يلى بويه‌سه هووكار زه‌ره‌د فريه‌يگ، ك بايه‌س بوى هه‌ر له زويه‌و هساو ئه‌را سه‌ربازه‌يل بكردياد ئه‌را روى وه‌ڕوى بوينه‌وه‌ى گشت مه‌ترسييگ.
دوياى ئه‌وه‌يش به‌غدا ده‌سكرده هه‌ڵمه‌ت ئه‌را هاوردنه‌وه‌ى ئه‌نبار دڵ نفوز سنى دوياى رميان رومادى پايته‌خته هه‌رێميه‌گه‌ى له ئايار گوزه‌يشت تا ئه‌و باقى به‌شه‌گه‌ى بمينێد وه‌ده‌س هيزه‌يل حكومه‌ته‌و، وه‌لى جه‌نگ وه‌ره‌و داوڕيان رويكرد و نگه‌رانيه‌يل تايفى فيشتره‌و بوى و هيزه‌يل زه‌مينى په‌كيان كه‌فت وه‌بوونه‌ى ئه‌و ته‌قينه‌وه‌يله ك ترۆريسته‌يل داعش ئه‌نجامى دان له‌بان جاده‌يل و له‌ناو ماڵه‌يل.
هه‌ر له‌ى باوه‌تيشه‌و كابرايگ له هيزه‌يل تايبه‌ت له رومادى وت: ته‌نيا يه‌كه‌يگ سه‌ربازى تايبه‌ت بويه‌سه هووكار كووچكردن فيشتر له 100 جه‌نگاوه‌ر ئه‌را ئۆرپا له‌ى شه‌ش مانگ دوياخره.
وه‌ل ئه‌وه‌يشا سه‌ربازه‌يل فريه‌يگ له‌وانه‌گ وڵات هيشتنه‌سه‌جى ره‌سم خوه‌يان له‌قه‌ى لاپه‌ڕه‌يليان له‌بان فه‌يسبوك ئالشت كردنه ك وه چه‌كه‌و گرتوينه‌ى له‌بان ده‌بابه‌و له مه‌يدانه‌يل جه‌نگ و ئيسه ره‌سمه‌يليگ تر له‌شوونيان داوه‌زاننه له‌ناو باخچه‌و شوونه‌يل گشتى نه‌مسا و ئه‌ڵمانيا و فنله‌ندا.
دى هه‌رچه‌نى عراقيه‌يل له‌تاو خراوى حوكم و تون وتيژى و كيشه‌يل ئابوورى كووچ ئه‌كه‌ن وه‌ره‌و ئۆرپا، وه‌لى له‌هه‌مان وه‌خت له‌ى مانگه‌يل دوياخريشه سياسه‌ته‌يل ئۆرپى له‌يوا كرد ده‌رفه‌ت تازه‌يگ بياده جايه‌ڵ جوانه‌يل ئه‌را ده‌رچگن له وڵات خوه‌يان.
مه‌ردمان فريه‌يگ بريار كووچكردن دان وه هه‌ڵه‌په‌ڵه‌و نه‌ته‌وه‌يل يه‌كگرتگيش مه‌زه‌نه‌ى ئه‌و كووچكه‌ره‌يله وه سه‌دان هه‌زار كردگه ك له مانگه‌يل ئاينده له عراقه‌و كووچ ئه‌كه‌ن وه‌ره‌و وڵاته‌يل ئۆرپا.
وه‌لى ئه‌و سه‌ربازه‌يله ك ره‌سينه‌سه ئۆرپا تويش ئاينده‌ى نادياريگ ئه‌يه‌ن و هه‌ر وه‌و خاتريشه قسه‌كه‌ر وه‌ناو كومسيار نه‌ته‌وه‌يل يه‌كگرتگ ئه‌را كاروبار په‌نابه‌ره‌يل وت: ئه‌وانه‌گ ك زويتر جه‌نگاوه‌ر بوينه ماف په‌نابه‌رى ئه‌رايان زه‌حمه‌ته.