شەفەق نیوز/ ڕۆژنامەی (زا تابلیت) کاتۆلیکی ئەمریکی وت: شایەت سەردانەگەی پاپا ئەرا عراق بوودە دەرفەتیگ ئەرا بتەوکردن پەیوەندیەیل کلیسەی کاتۆلیکی وەگەرد هاوپەیمانە ئیسلامییەگە ک خوەی شیعەس.
ڕۆژنامە ئەمریکیەگە لە راپۆرتیگ ك ئاژانس شەفەق نیوز وەرگێڕانی کرد، دیاری کرد ک وەگەرد دەسکردن وە سەردانەگەی پاپا ئەرا عراق، ئەوەسا جوور کەشتیگ ئەرا ڕێزلێنان یاد شەهیدە مەسیحیەکان نووڕیەێدە پی ک زیان لە نەهامەتەیل گەورایگ لە شوون داگیرکردن هاماری نەینەوا له لایه‌ن داعش وەخوەیان دین لەناوبەین ساڵەیل ٢٠١٤ و ١٠١٦.
رۆژنامە ئەمریکیەگە وت: ئەرا موسوڵمانان، نووڕیەێدە سەردانەگە جوور هەڵمەتیگ نزیکەوکردن وەگەرد باڵ شیعەگە، وەتایبەت لە شەش ئادار، هەنای پاپا ئەرا دیدار عەلی سیستانی مەرجع باڵا سەردان نەجەف کەێد، و ئاماژە کەێد ک رێژەی شیعە هالە ناونی ١٠ تا ١٥ لەسەد لە موسوڵمانان جهان، و ژمارەیان وە نزیکەی ٢٠٠ مەلیۆن کەس مەزەنە کریەێد.
وتیش؛ لەوە گرنگتر، شیعە لە ئیران زۆرینەن، ک خوەی دەوڵەتیگە خاوەن دەوریگ یەکلاوەکەر لە ئەمن جهانی و دویارووژ خوەرهەڵات ناوڕاس دوێنێ، و هەمیش لە دەوڵەت عراق ک ئیسە سەردانی کەێد شیعه خاوەن زۆرینەن.
و دویای ئەوە ئاماژە کرد ک بەشیگ لە موسوڵمانە سوننیەکان وە چەن هووکاریگ توومەتبار شیعە وە گەزافی کەن، لەلیان جەختکردنیان لەبان ئیمام عەلی و باوەڕییان وە ١٢ ئیمام، و چەن باوەتیگ تر، وتیش؛ فرە لەلیان لە خوەرئاوایش وە هووشیاری نووڕنە شیعەکان، لەوەر یادەیل شۆڕش ئیران، و هەڵوێست دژایەتی محمد ئەحمەدی نەجات سەرۆک وەرین ئەرا خوەرئاوا، وەلی هەمیش ئاماژە ئەرا سەید عەلی سیستانی کرد لە شیعە ک مەسیحیەکان لە عراق کاندیدی ئەرا خەڵات نۆبڵ ٢٠٠٥ ئەرا ئاشتی کردن.
وتیش؛ راپۆرتە رۆژنامەوانیەکان ئاماژە کەن ک سیستانی واژوو لەبان بەڵگەنامەی «برایەتی مرۆیی» ناکەێد ک پاپا فرانسیس لە سەردانەگەی ئەرا ئیمارات لە ساڵ ٢٠١٩ وه‌گه‌ر ئەزهەر باڵاترین دەسەڵات سوننی لە جهان واژووی کرد.
په‌یوه‌س ونه‌ی باوەتە ، رۆژنامە ئەمریکیەگە وت: ری ئەرا بۆچون گونجیاگیگ هەس بخریەێدە وەردەس ک موسڵمانە شیعەکان لە جهان ئیسلامی لە کاتۆلیک نزیکترن، و ڤاتیکان هالە هەڵوێست بینەزیریگ وە تیکڵابوین وەگەرد زۆرینە شیعەگە.
رۆژنامەگە هەمیش وت؛ لەماوەی ساڵەیل، پەیوەندیە کاتۆلیکی- ئیسلامیەگە مەیلی وەرەو سوننەکان بوی، و ئاماژە کرد ک خوەی وە شیوەیگ لە شیوەکان تیکڵابوین ئەڵاجەوییگ بوی، و سوننەکان هاوشیوەی لایەنگرەیل مەزهەب کالفینیین (مەزهەبیگە لە سەدەی ١٦ لە کلیسە جیاوە بویە) فرەتر لە کاتۆلیک.
وەرانوەر ئەوە، فالی نەسر تۆێژینەوەکار ئێرانی لە کتاوەگەی (زنیکردن شیعی) لە ساڵ ٢٠٠٦ لە وێنەیل هاوشیوەیی ناوبەین شیعە و کاتۆلیک باس لە جەختکردن لەبان دەسەڵات ئاینی، و ڕەفتارکردن وەگەرد قورئان لەناوبەین پیرووزی و کەلتووری، و دڵسوزی ئەرا بنەماڵە پیرووزەگە ( لەلای شیعە پەیوەندی خوین وەگەرد محمد پەیغەمبەر)، و باوەڕی وە پیاوە پیرووزەکان (لەلای شیعە ١٢ ئیمام)، و ئەو لاهووتە ک باوەڕ وە قوربانی دیرێد، لەڕی ئیمام حسێن ک لە کەربەلا شەهید بوی، و باوەڕی وە خوازین ئازاۆ، و ئەو مەزارەیلە ک بیماری خاسەو کەن، و شیوەیل رەفتار هەستی جەماوەری جوور عاشورا.
ڕۆژنامەگە لە زووان رزا ئەسڵان نووسەر ئیرانی ئووشێد؛ شیکردنەوەی شەریعەت ئیسلامی لەلایەن پیاوە ئاینیە شیعەکان جاروبار نەرمترە لە سوننیەگە، و ئاماژە کەێد ک ئەو کۆمەڵگایلە ک وە هویرکردن شیعە کاریگەر بوینە، شایەت زیاتر پەسەن دیموکراتی و ماف مرۆڤ و ڕەنگاوڕەنگی بکەن، هاوشیوەی بۆچوون کۆمەڵایەتی کاتۆلیکی.
هەمیش لە زووان پاپا مارک سبرنا ک لە ساڵ ٢٠٠٦ نووسان باس کەێد ک وە بەراوردی وەگەرد موسوڵمانان لە سوننە، موسوڵمانە شیعەکان هاوبەش گفتوگۆی سرووشتی ئەرا کاتۆلیک و راهبەکانن، و فرە هاوشیوەی له ناونییان هەس، جوور رێزگردن لە پیرووزیەکان وەتایبه‌ت مەریم عەزڕا، و جەختکردن لەبان گەوراترین باوەتەیل مەغز لە باوەتەیل باوەڕی و لە تۆێژینەوە فەلسەفی و لاهووتیەکان.
ئەراوە، روزژنامەگە ئووشێد: ئەیە وەگشتی، زەوی نەختیگ ئەرا گفتوگۆی کاتۆلیکی- شیعە دروس کەێد، و ئاماژە کرد لە هەسی کاتۆلیک لە کۆمەڵگایلیگ شیعە لە لوبنان وەکلدانی لە عراق و هەمیش ئەرمەن و کلدانی لە ئیران، و ئەوانە وە زووان ئەو وڵاتەیلە قسە کەن و وەکەلتووریان رەفتار کەن.
لە کۆتایی وت: مێژوو دەرفەتیگ تایبەت ئەرا کاتۆلیک لە دروسکردن پەیوەندیەیلیگ وەگەرد شیعە ئامادە کرد، و سەردانەگەی پاپا دەرفەتیگ مێژووی بینەزیریگ وەپی دەێد ئەرا سوودگردن لەی بۆچوونەیلە.