شه‌فه‌ق نيوز/ ئئتلاف نيشتمانى هيزه‌يل شووڕش و ئۆپۆزسيۆن سوورى، وت: ته‌هران هه‌وڵ بڵاوكردنه‌وه‌ى زووان فارسى ئه‌ياد له‌ناونى رووڵه‌يل سه‌ر وه‌ناوچه‌يل دێره‌زۆر هاومه‌رز عراق.
ئئتلافه‌گه له به‌ياننامه‌يگ ك له‌بان ماڵپه‌ڕه فه‌رميه‌گه‌ى بڵاويه‌و كرد وت: هه‌وڵ ئيران ئه‌را بڵاوكردنه‌وه‌ى زووان فارسى له‌ناونى مناڵه‌يل دێره‌زۆر، هه‌وڵيگه ئه‌را چه‌سپانن رووشنهويريه تايفيه مه‌زه‌ويه‌گه‌ى
به‌ياننامه‌گه شماره‌يگ مناڵ سوورى ده‌سنيشان كردگه له‌وانه‌گ چينه‌سه خوه‌ندنگايه‌يل ئيرانى ئه‌را يايگرتن زووان فارسى له پاريزگاى دێره‌زۆر و وت: هووكاره‌يل ره‌سانن ناوچه‌يى باس له‌وه كردنه 250 مناڵ سوورى په‌يوه‌ندى كردنه‌سه ئه‌و خوه‌ندنگايه‌يله‌و ته‌مه‌نيان هاو ناونى 8 و15 ساڵان.
به‌ياننامه‌گه‌ى ئئتلاف ئۆپزسيۆن داوا له ريكخرياگه‌يل ماف ئاده‌ميزاد و ده‌زگايه‌يل سه‌ر وه نه‌ته‌وه‌يل يه‌كگرتگ كرد مقه‌يه‌تى له‌و مناڵه‌يل بكه‌ن و تاوانه‌يل ئيران گير بيه‌ن و باس له‌وه‌يش كردن ك شووردن مه‌ژگ مناڵه‌يل و ئاڵشتكردن شيواز هويره‌وكردنيان وه شيوه‌يگ تايفى و ئاماده‌كردنيان تا بوونه جه‌نگاوه‌ر له ئاينده تاوانه‌يليگ تازه‌ى جه‌نگه ك له‌سوريا ئه‌نجام ئه‌گرێد دژ ملله‌ت سوورى.
وه‌ل ئه‌وه‌يا يه‌كيگ له گه‌وراترين ده‌زگايه‌يل ئيرانى له سوريا وه‌ناو "ئه‌نجومه‌ن باڵاى جه‌عفه‌رى" چالاكيه‌يل فريه‌يگ دى له‌ى دوياخره له مانگ ره‌مه‌زان و ئه‌و چالاكيه دقه‌ت له‌بان مناڵه‌يل پاريزگاى حومس كرد ك ها ناوڕاس وڵاته‌گه.
له‌ى باوه‌تيشه‌و، شێخ حسێن دره‌يع وه‌رپرس نويسينگه‌ى ئه‌نجومه‌ن باڵاى جه‌عفه‌رى له سوريا، سه‌رپه‌رشى ئه‌و چالاكيه كرد ك ئه‌را ماوه‌ى 25 رووژ دريژه داشت له مانگ ره‌مه‌زان گوزه‌يشت و مناڵه‌يل ته‌مه‌نن بويچگ له‌تى گرده‌و كرد و ده‌وره‌يگ ركابه‌رى قورئانى و رووشنهويرى ئه‌رايان واز كرد و بڕێگ پويليش به‌خشا پييان.
حسێن دره‌يع، بريكار سه‌رۆك ئه‌نجومه‌ن باڵاى ئسلاميه له سوريا له ناوچه‌ى حومس ك ناسرياگه وه محه‌مه‌د ئه‌لمسكى، ئايا محه‌مه‌د ئه‌لمسكى كييه؟
محه‌مه‌د ئه‌لمسكى، دامه‌زرنه‌ر و سه‌رۆك ئه‌نجومه‌ن باڵاى جه‌عفه‌ريه له سورياو له رووڵه‌يل ديمه‌شق پايته‌خت ئه‌و وڵاته‌سه‌و له‌يوا باس ئه‌كه‌ن ك خه‌ڵك ناوچه‌ى "ئه‌لساڵحيه"س.
ئه‌لمسكى وه‌پى ئويشن "ئايه‌توڵڵا" و "سه‌يد"، جوور ئه‌ميندار گشتى ميليشيايه‌يل حزبوڵڵا، ئه‌نجومه‌ن باڵاى جه‌عه‌فه‌رى له‌ساڵ 2012 دامه‌زران، ئه‌ويش دوياى ساڵيگ له به‌رپابوين شووڕش له‌بان رژيم ئه‌سه‌د و ئه‌و رژيميشه دگان وه‌و سفه‌ته ئه‌نه‌ێد ك ئه‌لمسكى ديرێده‌ى و له هووكاره‌يل ره‌ساننيش وه‌و سفته‌و باس كريه‌ێد.
باره‌گاى ئه‌نجومه‌ن باڵاى جه‌عفه‌رى كه‌فته‌سه ناوچه‌ى سه‌يده زه‌ينه‌ب له ريف ديمه‌شق پايه‌خت سوورى، ك ناوچه‌يگه ئيران گشت ميليشيايه‌يل و هيزه‌يلى ك ره‌وانه‌يانه كردگه ئه‌را سوريا له‌لى ئه‌وه‌ێده ڕييه‌و ئه‌را وه‌رگرى له به‌شار ئه‌سه‌د سه‌رۆك رژيم سوورى و بته‌وكردن نفوزى له‌ورا.
موهه‌نه‌د حاجى عه‌لى، نويسه‌ر و سياسه‌تمه‌دار سوورى ئويشيد: له ساڵ 2012ه‌وه په‌ره‌سه‌ندن شيعه له‌ئاست ده‌زگايى ده‌ركه‌فت، ئه‌ويش له‌ڕى بڕيگ گامه‌يل جوور ده‌سوه‌پيكردن حه‌ره‌كه‌يل ئاشكراى خومه‌ينيانه له حومس و ديمه‌شق تا ره‌سيده دامه‌زرانن ده‌سڵاتيگ ئايينى وه‌ناو ئه‌نجومه‌ن باڵاى ئسلامى جه‌عفه‌رى له سورياو سه‌رۆكه‌گه‌ى "ديمه‌شقى" بوێ.
حاجى عه‌لى وت: ئه‌و ده‌زگايه‌يله وه‌ل ده‌خاڵه‌ت ئيرانى و حزبوڵڵا ده‌ركه‌فت له كيشه‌ى سوورى و جه‌خت له‌وه كرد ئيران ده‌ور بنه‌ڕه‌تييگ داشتگه له دامه‌زرانن ئه‌و ئه‌نجومه‌ن باڵاى جه‌عفه‌ريه له سوريا ك شايه‌ت مه‌رام له دامه‌زراننى جوه‌يجيكردن نموونه‌ى لوبنانى بويه ئه‌را يه‌كه‌وخستن هيزه‌يل شيعه له سوريا له وتاريگ لايه‌نگرى خومه‌ينى.
دى وه‌و جووره ئه‌لمسكى له‌ناونى ميليشيايه‌يل له سوريا جيواز ئه‌دێ و خوه‌ى له باره‌گايه‌يلى ده‌رئه‌خاو ره‌سم ئه‌گرێد وه‌ل چه‌كدار و سه‌ركرده‌يلى، وه‌تايبه‌ت وه‌رجه په‌لاماره‌يليگ و دوياى په‌لاماره‌يليگ ك له‌لايه‌ن رژيم ئه‌سه‌د ئه‌نجام دريا ئه‌را بان غۆته‌ى رۆژهه‌ڵات له ديمه‌شق.
ئه‌لمسكى وه وه‌رده‌واميش سه‌ردان شاره‌يل ئيرانى ئه‌كا ئه‌را ئاماده‌بوين و به‌شداريكردن له له كۆنگره‌يليگ ك له‌لايه‌ن حكومه‌ت ئيرانييه‌و رێك ئه‌خريه‌ێد، يا سه‌ردانه‌يليگ تايبه‌ت له‌ناونى ماوه‌يگ و ماوه‌يگ تر ئه‌را ئه‌و وڵاته و جار له‌يوايش هه‌س ماوه‌ى فره‌يگيش له ئيران مينێده‌و، وه‌تايبه‌ت له ماوه‌ى جه‌نگه‌يل ئيسه‌ى سوورى.