ئی خەوەر خوەشە لە وەختیگ گرنگ تیەێد، لە وەختیگ ئاسکەیل لە رخ فەوتیانیان لە عراق ئاگادار کریەن، ئەوەیش رووشنایی خەێدە بان گرنگی تەقەلای مقیەتیکردن  و زاوزیکردن ئی جویرە.

 ناوچەی سروشتی شیناگە، کە کەفێدە ناوچەیگ دارستانی ٦٠ کم لە باکوور خوەرئاوای کەرکوک، وە یەکیگ لە یەدەگەیل پیشەنگ لە عراق دانریەێد، یەدەگەگە دەیان ئاسک لەی جویرە یان هاناوی.  سەرکەفتن زاوزی ئاسک گلەو خوەێد ئەرا زیایبوین گرنگیدان یەدەگەگە وە مایەیل، کە نیرەیلی ئەرا جفتبوین کیشا و شمارەی ئاسکەیل لە عراق زیایکرد.

 لە  قسەیل تایبەت ئەرا ئاژانس شەفەق نیوز، ئەحمەد توما، وەرپرس بەش دارستان لە پارێزگای کەرکوک، دووپات کرد کە “یەدەگ ئاسکەیل ڕیم لە شیناگە یەکیگە لە یەدەگە پیشکەفتگەیل عراق، و کارکەیمن ئەرا مقیەتیکردن ئی جویرە لە فەوتیان کە شمارەی لە عراق سنووردارە.

 توما وتیش: “ئەو یەدەگە ژینگەیگ سروشتی جیاواز ئەرا ئاسکەیل دابین کەێد، ئەوەیش وەمدوو سەوزایی و دارەیل ناو دارستانەیل دووبز، و تەقەلا دەیمن  لەڕی بەرنامەی جفتبوین و زاوزیکردن شمارەی ئاسکەیل زیای بکەیمن”.

 توما باس ئەوە کرد کە یەدەگەگە ئمساڵ زایین سێ بەچکە ئاسک وەخوەی دی، بیجگە لەوەگ ساڵ گوزەشتە پەنج زایین بوی، نزیکەی 13 نیر و 12 ما لە چوارچیوەی پرۆگرام زاوزایی.

 لە چوارچیوەی ئەو تەقەلا کە ئامانجی خاسترکردن ژینگەی ئاسکەیلە، توما وتیش؛ “زەڕێوەبەرایەتییەگە کار لەبان کاڵین نەمامەیل پاوڵۆنیا لە دارستانەیل کەێد ئەرا دابینکردن شوین سەوزایی کە وەگەرد رەوش کەشوهەوای عراق بگونجێد، و ئەرا بەرزکردن ژینگەی لەوەڕ ئەرا ئاسکەیل”.

 جی باسە کە بەرهەم ساڵح، سەرۆک وەرین کۆمار،  لە مانگ حوزەیران ساڵ 2022، بڕ 100 ملیۆن دینار عراقی بەخشیە ناوچەی سروشتی ساوە لە پارێزگای موسەنا، دوایی ئەوەگ خەوەریگ ئاژانس شەفەق نیوز لە باوەت رخ فەوتیان ئاسک ڕیم عراقی بڵاو کرد.

 ناوچەی سروشتی میسان نزیکەی ٣٥٠ ئاسک ریم هاناوی، لە وەختیگ شمارەی ئی جویرە لە بیاوان ئەنبار و بیاوان موسەنا و دارستانەیل دیالە لەوەر ڕاوکردن و قڕکردن لە دویای پەلامار ئەمریکا وەبان عراق لە ساڵ ٢٠٠٣ زیان فرەیگ وەپییان رەسیە.

 فازڵ غەراوی سەرۆک ناوەند ستراتیجی ماف مرۆڤ دووپات کرد کە لەوەر ئاڵشتیوین کەشوهەوا فرە لە ئاژەڵە کویەییەیل و ئاویەیل لە عراق کەفتنەسە ژیر هەڕەشەی فەوتیان.