شەفەق نیوز/ لەو وەختەو مەسعود پزیشکیان سەرۆک نوو ئیران دەسکردە سەردان تایبەتی ئەرا هەولێر، گامەیل جیاوازی جویر بەرهەم کار دیبلۆماسی نووڕیەێد کە نێچیروان بارزانی سەرۆک هەرێم کوردستان لە ساڵەیل فرەیگ رەنج ئەرای دا.
ئەو "ئەزموون ئیرانیە" کە نێچیروان بارزانی زاتێدەی بیگومان لە بنەمایل سەرەکیە کە هەمیشە کەشوهەوا وەرد نەهێڵن نەرمەو کرد، و پڕەوکردن چاڵەگە وەگەردی، تەنانەت هەناێ کەشوهەوا ژاوەژاو و هەستیاری و ناکۆکی بوی، و دانایی و توانای لە سیاسەت دەرەیل واز کرد، کە هیشت وەزوی یەکلاییکردن و ئارامردن ئەرا گشت ناکۆکیەبل پەیا کرد.
ئەو بار ئیرانیە، سەختییگ ئاسایی نییە، و ڕووەک تەقەلا دەێد هاوکیشە لەبان کڕەیل جویلەی سیاسی ناوەین تەهران و بەغداد و هەولێر و ئەنقەرە وەدەس بارێد، توانایایگ جیاواز خوازێد، لە سەرکردەیگ کە خاس زانێد کلیل دەرە بەسیاگەیل هانە کوو.
لەلای کەمەو شەش سەردان ئەرا سەرۆک نێچیروان بارزانی لەماوەی ١٠ ساڵ گوزەشتە ئەرا تەهران بویە، دویاتریان بەشداریکردن وەشیوەی کەسایەتی نشانەیل گەورەیگ لەلای ئیرانیەیل دیرێد، لە پرسەی سەرۆک ئیبراهیم ئیبراهیم رەئیسی لە ٢٢ ئایار گوزەشتە، و لە مانگ تەمموز گوزەشتە لە ئاهەنگ وەرگردن پۆستەگەی پزیشکیان ئامادە بوی.
وەرجە گام پرسەگە، سەردانیگ فەرمی لە ٨ ئایار ئەنجام دا، مە یەکەم بوی لە وەختیگەو لە سەرەتای ساڵ ٢٠٢٤ ئیران گورزیگ وەبان هەولێر وەشان، و پەیوەندییەیل شیویان، کە بارزانی ئەوە پەسەن کرد باوەتەیل قەیرانەگە و پەیوەندییە ئاڵووزەیل و کلیلەیلی وەگەرد خوەی هەڵگرێد، و دەر تەهران بکوتێد، ئەرا چارەسەرکردن دویچکەیل ناکۆکیەیل، و عەلی خامەنەئی ریبەر باڵای ئیران دەرەیل واز کرد، و ئیبراهیم رەئیسی و عەبدوللاهیان و علی ئەکبەر ئەحمەدیان ئەمیندار گشتی ئەنجومەن باڵای ئاسایش نەتەوەیی و محمد باقر قالیباف سەرۆک پەرلەمانیش هەمیش وەیجویرە کردن.
تەهران شوین و کاریگەریی تایبەت خوەی لەلای کورد و کوردستان دیرێد، کە لەلای نێچیروان بارزانییش وەیجویرەس، کە بەشیگ لە ژیانی لەورا وەسەربرد، کە بویە بەشیگگ لە ژیاننامەی، هەمیشە دەسمیەتیی دەێد لە نەرمکردن کەشوهەوا، و دڕاکردن تەنافەیل پەیوەندی و لەیەکفامسنن وەرد سەرکردەیل ئیران، و ئەراوە هەمیشە دەرەیل تەهران لەرویی واز بوین.
ئەراوە، چەودیاریکەرەیل ئویشن؛ سەروک نوو ئیران مکیس نێچیروان بارزانی ئەرا سەردانکردن هەرێم کوردستان وەجی تیەرێد، لە چوارچیوەی سەردان دەرەکی یەکەمی لە وەختیگەو قەسەم دەستووری جویر سەرۆک کۆمار خواردیە لە ٦ تەمووز گوزەشتە، کە واتەیل فرەیگ ئەرا هەرێم کوردستان و سەرکردایەتی ئیران هەڵکرێد، و هەمیش ئەرا حکومەت فیدراڵی لە بەغدادیش، وەتایبەتی کە مکیسەگەی بارزانی ئەرا رەئیسی بوی وەرجە وەرجە کەفتن کۆپتەرەگەی.
پزیشکیان کە داڵگی کوردە، شەوەکی چوارشەممە، لە جیوەجیکردن مکیسیگ فەرمی وەلایەن محمد شیاع سودانی سەرۆک وەزیرەیل عراق رەسیە بەغدای پایتەخت، کە هەمیش چەوی کەفتە عەبدوللەتیف رەشید سەرۆک کۆمار، و موحسن مەندلاوی سەرۆک پەرلەمان وە جینشینی، و فائق زەیدان سەرۆک دادوەری باڵا، وەگەرد بڕیگ لە ریبەرەیل سیاسی.
هەناێ لە ٨ ئایار گوزەشتە بارزانی سەردان تەهران کرد، زانستیاد کە ئەو بنەمایانە کە پشت وە دانوسەنین بەسانە، ئەوانەن کە توەنن چارەی ریشەی ژاوەژاو بکەن، وەتایبەتی ئەوەگ لە پشت پەلامارەیل لەشوینیەک هاتن وەلایەن سوپای پاسداران وەبان شوینەیلیگ لە هەرێم کوردستان، کە وتیاد وەبان گرووپەیل ئۆپۆزسیۆن کورد ئیران چەکدارە، کە وەرپرسیگ ئیرانی مەوقەی پیشوازیکردن خامەنەئی لەی وت: سەردانیگە پایەی کورد عراق لەلای ئیرانیەیل نشان دەێد، لە وەختیگ بارزانی وەزوان فارسی لە پۆستیگ لەبان ئێکس نویسان؛ کە دووپات کرد لەبان ئارەزوو هەرێم کوردستان وە قایمکردن پەیوەندییەیل وەرد ئیران لە گشت چینەیل.
چەودیاریکەرەیل ئویشن: ئی سەردان بارزانیە دەسمیەتی دا لە ڕێککەفتن ئەمنی ناوەین بەغداد و تەهران لە ساڵ گوزەشتە، وەتایبەت ئەوەگ پەیوەندی وە کۆنتڕۆڵکردن سنوور و دویرخستن چەکدارەیل گرووپەیل ئۆپۆزسیۆن کورد ئیرانی لە سنوور هاوبەش دیرێد، کە گامیگە بیگومان دەسمیەتی دا لە بڵاوکردن کەشوهەوای دڵنیایی گەورەتر ناوەین تەهران و هەولێر و بەغدا، کە هەمیش هەست هاوڵاتیەیل هەرێم کوردستان دڵنیا بوون لەبان بیوەیی و ئارامی خوەیان، لە وەختیگ چەودیاریکەرەیل ئیرانی سەردانەگەی نێچیروان بارزانی خستنە چوارچیوەی "وازکردن لاپەڕەی نوو" ناوەین هەولێر و تەهران، و تەقەلا بەسانن ناکۆکییەیل جارانی.
سەرۆک ئیران لەناو هەولێر، یە سیمایگ ئاسایی نییە لە سیمای هەرێمی، کە نێچیروان بارزانی بتوەنێد وەجی بارێد، دووپات لەبان توانای سەرکردایەتیی کەێد لە چگن وە کاروان سەرۆکایەتی لەناوڕاس زریانەیل وەرەو هشکایی ئارامی، و مەزەنە کەن کە سەرۆک هەرێم کوردستان توانادار بوود ئەرا چاپکردن کڕەیل پەیوەندی خوەشیگ وەرد پزیشکیان کە وە سێیەم سەرۆک "چاکسازیخواز" لە ئیران ناسیاس، کە لە هەڵمەت هەڵوژاردنی، ئیجا لە دویای وەرگردن سەرۆکایەتی، دووپات کرد کە سیاسەت دەرەکیی کە لەناو لیست وازبوین وەگەرد هاوسا و برادەرەیل وەشیوەیگ سەرەکی تیەێد، و تەقەلای خاسەوکردن پەیوەندییەیل وەرد خوەرئاوا، ئەرا چارەکردن باوەت ناکۆکی ئەتۆمی.
زانیاس کە نێچیروان بارزانی خاوەن ناو خاسیگە لەناو پایتەختەیل سەرەکی خوەرئاوایی، جویر پارییس و لەندەن و واشینتۆن و پەرلین، و پەیوەندییەیل قایمیگ وەرد وەرپرسەیلیان دیرێد، کە وە گرنگیدان ئی پایتەختەیلە وە ئارامی و بیوەیی هەرێم کوردستان باس کریەن، و وەی واتە، کوتان پزیشکیان ئەرا دەرەیل هەولێر جویر هاوسایگ میوان، هاتێ دەنگ لە دویرەو بەێدەو.