ئه‌يه بوی ك رووژنامه‌ی غارديان بريتانی له راپۆرتيگی ك باس له‌وه كرد يه‌كيگ له وه‌رپرسه‌يل ئۆرپی چه‌وديری رۆڵ ئيران كردياد له گشت جه‌نگه‌يليگ وه دريژايی په‌نج ساڵ گوزه‌يشت و جه‌خت له‌وه كرد ك وه جددی كار له‌وه‌ر ئی ئامانجه كرديان.
رووژنامه‌گه هه‌ميش وت: ئی مه‌سه‌له ئه‌را ئيران جوور شانازيه، ك توانای ئه‌وه ديرن مه‌ردم و ده‌سميه‌ت جيواز بكه‌ن له‌ناونی ده‌ريای چه‌رمگ ناوين و ته‌هران له هه‌ر وه‌ختيگ ك بخوازن.
راپۆرته‌گه وت: ديدار وه‌ل وه‌رپرسه‌يل هه‌رێمی و خاوه‌ن نفوزه‌يل عراقی و مه‌ردم باكوور سوريا له‌ماوه‌ی چوار مانگ گوزه‌يشت ئاشكرا بويه‌و ئه‌و توله‌ڕی زه‌مينيه له‌ساڵ ٢٠١٤ تائيسه وه‌ئارامی دامه‌زرياگه‌و يه‌يش ده‌رخست ك ڕييگه سه‌خت ك ديم عه‌ره‌بی له‌ه عراق ئه‌وڕێد و وه باكوور سوريا گوزه‌ر ئه‌كاو تا باكوور خوه‌رهه‌ڵات سورياو باكوور حه‌له‌ب ك ئيران و هاوپه‌يمانه‌يلی له‌بان ئه‌و زه‌ويه بڵاو بوينه‌سه‌و.
ئه‌و تويله‌ڕييه له‌و خاڵه‌يل وه‌ناوچگنه‌و ده‌س وه‌پی ئه‌كا ك ئيران وه‌كاريان ئه‌يه‌رێد ئه‌را كلكردن ده‌سميه‌ت و هيزه‌يل به‌شه‌ری ئه‌را عراق وه دريژايی ١٢ ساڵ گوزه‌يشت، ك هه‌مان ئه‌و ڕيه‌يله‌سه فه‌يله‌ق قودس هاورده‌يانه كار له جه‌نگ جاده دژ هيزه‌يل ئه‌مريكی له‌وه‌ختيگ عراق داگير كرد و ئه‌و هه‌ڵمه‌ته‌سه ك هه‌مان ميليشيايه‌يل عراقی دژايه‌تيی كردن و دوياخر تيكه‌ڵ بوين له جه‌نگ داعش.
ئه‌و ڕييه وه باقووبه‌ی پايته‌خت پاريزگای دياله گوزه‌ر ئه‌كا ك ئه‌كه‌فێده نزيكه‌ی ٦٠ ميل له باكوور به‌غدا، دياله‌يش ئه‌را سه‌دان ساڵه ناوچه‌يگ تيكه‌ڵه له سنی و شيعه‌و يه‌كيگه له ناوچه‌يل پڕ له كيشمه‌كيش تايفی له ماوه‌ی جه‌نگ ئه‌هلی له عراق، ئمجا ئه‌و ڕييه وه‌رده‌وام ئه‌دێ وه دريژايی ئه‌و ريه‌يله ك ميليشيايه‌يل ئه‌منيه‌تی كردنه ك ناسريانه وه‌ناو يه‌كه‌يل حه‌شد شه‌عبی، دويای ئه‌وه‌يش ڕييه‌گه ئه‌ياد وه‌ره‌و باكوور خوه‌رئاواو ئه‌و ناوچه‌يله ك مانگه‌يل گوزه‌يشت وه‌ده‌س داعشه‌و بوين.
ئيسه‌يش شماره‌ی فريه‌يگ ميليشا له شار شه‌رقات وجوود ديرن و ئاماده‌ن ئه‌را جموجويل وه‌ره‌و ديم خوه‌رئاوا له موسڵ و ئه‌را خاڵيگ ك ئه‌كه‌فێده نزيكه‌ی ٥٠ ميل له باشوور خوه‌رهه‌ڵات شه‌نگاڵ، ك يه‌يش له‌ی قوناغه ئه‌دێده ويستگه‌ی ئاينده له تويله‌ڕييه‌گه، هه‌ر وه‌و خاتريشه يه‌كيگ له وه‌رپرسه‌يل گه‌ورای هه‌واڵگری وت: ويستگه‌ی ناونی ته‌لعه‌فه‌ر و شه‌نگاڵ چشت خواستيگه ئه‌را پلان.
راپۆرته‌گه يه‌يش خسته‌ڕوی و له‌زووان عه‌لی خزێری ك راوێژكار گشت باڵوێزه‌يل وڵاته‌يل يه‌كگرتگ له عراق و سه‌ركرده‌يل سه‌ركردايه‌تی ناوه‌ندی ئه‌مريكی بوی له‌ناونی ساڵه‌يل ٢٠٠٣ و ٢٠١١ وت: زه‌مانه‌تكردن خه‌ت ده‌ريای چه‌رمگ ناوين جوور سه‌ركه‌فتنيگ ستراتيجيه له ئيران.
هه‌ميش وت: ئه‌و خه‌ته بته‌وكردن زاڵبوين ئيران له‌بان عراق و شام ده‌رئه‌خا، ك يه‌يش ئه‌وه‌سه له‌لايه‌ن خوه‌يه‌و جه‌خت له هه‌وڵه‌يليان ئه‌كا ئه‌را هه‌يمه‌نه‌ی هه‌رێمی.
راپۆرته‌گه دوياخريش وت: ئی مه‌سه‌له بايه‌سه ناڕه‌حه‌ت گشت سه‌ركرده‌يل خوه‌رئاوايی و هاوپه‌يمانه‌يل هه‌رێميمان بكا، چوينكه ئه‌يه له‌يوا ئه‌كا ئيران جورئه‌ت فيشتر بكا له وه‌رده‌وامی فراوانكردن وه‌ره‌و ده‌وڵه‌ته‌يل كه‌نداو، ك يه‌يش ئامانجی بوی و ئاشكرا باسی كرديان، ئه‌ی دی له‌وه‌ر چه پيشبينی ئه‌كه‌يم واز له‌ی وازيه بارن ئه‌گه‌ر ده‌يه‌يگ وه ته‌مامی قانجازه‌يليان دو وه‌رانوه‌ر ئه‌كه‌ن؟.