شەفەق نیوز/ سیبان خەلیل، دوێەتیگە ئەیزیدی، لە ساڵ ٢٠١٤ داعش لە ئاوایەگەی خوەی لە قەزای شەنگال رفانەی، تا ٧ ساڵ لەەسوەسەری لە چنگ داعش کوزەران بکەێد.
سیبان دەر بەختەگەی واز بوی، و لە دەس داعش قورتار بوی، ک وەرجە یەک مانگ وەرەو ئاوایەگەی گلەو خوار، وەلی چەوی کەفتە قەورەگی خوەی.
کەسوکارەیل سیبان پرسەی دوێەت خوەیان دانان، ک مەزەنە کردن ئی دوێەتیانە لە گوزیگ ئاسمانی لە سوریا کوشیاگە، و تەرمەگەی بیسەروشوین بوی، ئەراوە لە شان قەور قوربانیەیل ریخریاگ داعش لە ئاوای کۆچەر قەوریگ ئەرا ئەویش دروس کردن.
سیبان ئەرا ئاژانس شەفەق نیوز وت: هەنای وەرانوەر قەورەگەی خوەی وسیا، و ناو خوەی لەبانی خوەنستمەو، زانستم ک دویای قورتاربوینم، قەوریگ لەناو ئاوایەگە دیرم، باوجی هەنای سەردان قەورەگەم کردم، یەک هەس ئەڵاجەوییگ کردم.
وتیش: ئی هەستە، لە یەکەم رووژ رفاننم سەختتر بوی، ک هەستیگ فرە سەخت بوی، و هویرەو کردم ک خوەمیش یەکیگم لەی قوربانیەیلە.
سیبان خوەی نەگرد، و دەسکردە گریە، هەنای نووڕستە وینەیل باوانەگەی، ک وەدەس ریخریایەگە کوشیان.
سیبان، پیرەکە دووشەممە، وەگەرد دوێەتەیلیگ تر لە ئەیزیدیلیە ک رزگار بوینە، لە ئاوای کۆچەر، چەوی کەفتە موستەفا کازمی سەرۆک وەزیران عراق.
سیبان وت: داوا کردیمن دەفتێ نفوس ئاوای ئەیزیدیەیلە لە بەعاج بارنە مووسڵ و شەنگال، چوینکە چگنمان وەرەو بەعاج سەختە، و نێخوازیمن جاریگ تر بکەفیمنە رەر ئەوانەگ لە داعشەیلە جینۆسایدمان کردن، و پەیمان ئەوە وەپیمان داد.
وتیش؛ داوا لە کازمی کردم ک حکومەت عراق واژوو لەبان جینۆسایدکردن ئەیزیدیەیلە بکەێد، دویای ئەوە ک دەوڵەتەیلیگ ئەوروپایی ئەوە کردن، و هەمیش پشتگیری دوێەتە رزگاربویەیلە بکریەێد، و خزمەتگوزاری و ئاوەدانی لە ناوچەیل شەنگال بوود.
سیبان یەکیگ بوی لە نزیکەی ٦ هەزار دوێەت و ژن و مناڵ ک ریخریاگ داعش لەمەوقەی داگیرکردن شەنگال لە ساڵ ٢٠١٤ رفانەیان، ئەوەیش دویای ئەوە ک چەکدارەیل ریخریایەگە هەزاران لە پیاوەیل کوشتن.