ماڵپەڕ "تەلە ڤیژوئال" بەریتانی کە تایبەتە وە فیلمە تەلەفزیۆنی و سینەماییەیل، لە ڕاپۆرتیگ کە ئاژانس شەفەق نیوز ئەڵگەردانی کرد وت: "فڕۆکەی شمارە ١٤٩ لە فڕۆکەخانەی ناودەوڵەتی کوەیت نیشتەو، چەن ساعەتیگ دویای لەشکرکیشی سەدام حسێن لە ٢ ئاب ١٩٩٠".

 وەگورەی ڕاپۆرتە بەریتانییەگە، فیلمەگە وەدویاچگن ئەرا رویداوەیل کاروانیگ  کەێد لە لەندەنەو وەرەو شار کوەیت هاتیە کە زیاتر لە 385 پیاو و ژن و مناڵ لەناو فڕۆکەگە بوین.

 لە راپۆرتەگە ئاشکرا کردیە کە چوین وەگەرد داگیرکردن کوەیت، سەدام حسێن ئەرا جەهان راگەیان کە سەرنشینەیل فڕۆکەگە بوینەسە "میوان" ئەو، و ری  وە دەرچگنیان نەیا، و لە گشت عراق لە ژیر رووشنایی قەیرانیگ ناودەوڵەتی کردەیانە  قەڵغان مرۆیی کە وەزوی کەفتە وەرچەو مەردم جەهان.

وەپەی راپۆرتەگەی بەریتانیا، تا ماوەی پەنج مانگ، چیرووکیگ لەباوەت بارمتەیل لە ژیر چەو جەهان شیوەی خوەی گرێد، لە وەختیگ سەرەکی میژوو جیۆسیاسی  کە پەیوەندی خوەرئاوا وەرد خوەرهەڵاتی ناوڕاس تا هەمیشە ئاڵشت کەێد.

 لە راپۆرتەگە وتيە: "بارمەتەیل  گیر خواردن لە دەس دیکتاتۆریگ بیبەزەیی، لەوەختیگ فڕۆکەگە پڕ بوی لە سیخوڕ بەریتانیا، حکومەت بەریتانیا تەقەلا دا ئەو باوەتە بپووشێد".

راپۆرتەگە باس کرد کە "بارمتەیل تویش  ورسگی و لەسێدارەدان و دەستدرویژی درووکانی هاتن، یەیش لەوەر رووشنایی ئەو رخ وەردەوامە کە دی نیەتوەنن ئەرا وڵاتەگەیان گلەو بخوەن".

 دویای 33 ساڵ لەی رویداوە، بڕیگ بارمتە سکاڵا لەبان حکومەت بەریتانیا و کڕ ئاسمانی بەریتانی توومار کەن جویر بەشیگ لە تەقەلایان ئەرا دادپەروەری و راسیەیل، لە وەختیگ لەلایان ئەڵاجەویە کە ئەڕا چە ری وە فڕۆکەگە دریایە لە کوەیت بنیشێدەو، هەرچەن حکومەت بەریتانیا زانێد کە کوەیت کەفتیەسە وەر داگیرکردن، سروشت ئەو نهێنییە چەس کە حکومەت بەریتانیا هیمان بڕیارداگە بشارێدەوەی، و ئایا رووژیگ تیەێد بتوەنن لاپەڕەی تاقیکردنەوەگەیان واز بکەن؟.

 لە راپۆرتەگە دەسنشان کەێد کە "ئەو فیلمە دیکۆمێنتارییە شایەتحاڵ گشت لایەیەیل چیرووکەگە لەخوەی گرێد، لەوانەیش خود بارمتەیل، سیاسەتمەدارەیل هەردوگ دیم زەریای ئەتڵەسی، بیجگە لە ئەندامەیل ئەو ژن و پیاوەیل وەرخودان کوەیتە کە ژیان خوەیان خستنە مەترسییەو تا بارمەتەیل بشارنەو."

وەگورەی راپۆرتەگە، فیلمەگە باس ئەو کەسەیلە کەێد کە سەدام حسێن ناسینە و "روانگەیگ ناوازە لە دەریونناسی دیکتاتۆر لە مەوقەی خراوبوین پەیوەندییەیلی وەرد خوەرئاوا" خەێدە وەرچەو.

 راپۆرتەگە لە زوان ئەندی هۆڵاند سەرۆک دارم ستۆدیۆ کە بەرهەم فیلمەگە کەێد، هەنای کۆمپانیای بەرهەمهاوردنی لە ساڵ 2021 دامەزرانیە، راگەیانیە “ئەرک ئیمە بەرهەمهاوردن فیلم ناچارکەر بویە کە قورسایی سووزدارییان بوود، هەرلیوا رووشنایی بخەیمنە بان ئەو چیرووک مرۆییە راسیە کە بایەسە بنووڕیەێد”.

 هەرلیوا لە راپۆرتەگە لە زوان بۆبی دیکسۆن، دەرهێنەر فیلم سکای فیلم هاتیە، “لە چوارچیوەی ئەزموونە هەمەچەشن و فرەجار ترسناکەیل بارمتەیل و بەشداربویەیل ترەک لەی قەیران چەن چیرووکیگ ئەڵاجەوی هەس”، کە ئەوە نشان دەێد کە فیلمەگە  قایم و پاڵنەر بوود ئەرا هویرەوکردن.