ئۆباما تا ئيسه گشت ده‌سميه‌تيگ گه‌ورا ئه‌را كورد ره‌ته‌و كردگه وه‌بوونه‌ى سياسه‌ت "عراق يه‌كگرتگ"ك له‌لايه‌ن وزاره‌ت خارجيه‌و چه‌وديرى ئه‌كريه‌ێد، يه‌يش بيجگه مه‌ترسى واشنتۆن له‌وه‌گ كوردستان بدێده ده‌وڵه‌ت بته‌ويگ و روى وه‌ڕوى سوپاى عراقى بدێد له‌بان مه‌سه‌له‌ى ناوچه‌يل كوردستانى ده‌يشت هه‌رێم، يا مه‌سه‌له‌ى سه‌روه‌خوه‌يى.
له حاڵ حازر ريكخرياگ ترۆريستى داعش سياسه‌ت "عراق يه‌كگرتگ" نه‌يشتگه‌و نزيكه‌ى سێ به‌ش له‌خاك عراق ها ده‌سيه‌و، ك هه‌رچه‌نى سوپاى عراقى فريه‌جار خوه‌ى ده‌رئه‌خا ئه‌را كوشتار و روى وه‌ڕوى بوينه‌وه‌ى ئه‌و ريكخرياگه فيشتر له‌و هيزه‌يله ك له رومادى واين له مانگ ئايار، وه‌لى هيمان وه‌ل ئه‌وه‌يشا هه‌وڵ ئه‌وه ئه‌يه‌ن ئه‌و خاكه‌يل بارنه‌و ك داعش ده‌سڵات گرته‌سه بانى.
يه‌يش وه چه‌واشه‌ى هيزه‌يل پێشمه‌رگه، چوينكه پێشمه‌رگه‌ى كوردستان ناچار چه‌كداره‌يل ريكخرياگ داعش كردن خوه‌يان بكيشنه‌و له‌وه‌رده‌م په‌لاماره‌يليان و وه‌و خاتريشه 1500 شه‌هيد دانه‌و فيشتر له 7000 زه‌خمدار، يه‌يش ئاشكراس ك ريكخرياگ داعش مه‌ترسى له پێشمه‌رگه ديرێد و هه‌ر له‌وه‌ر ئه‌وه‌يش خوه‌ى كيشاوه‌و چه‌ك كيمياوى هاورده كار.
ئه‌و ده‌سكه‌فته‌يله ك كورد هاورده‌ى ده‌س جيا بوى وه‌و پشتگيرى كه‌م ئه‌مريكا، چوينكه ئه‌مريكاو هاوپه‌يمانه‌يلى چه‌ك كويه‌نه دانه كورد وه‌ل بڕيگ زريپووش كويه‌ن وه‌بى ده‌بابه. هووكار ره‌ته‌وكردن ده‌سميه‌تداين كوردستانيش وه چه‌ك پيشكه‌فتگ له‌وه‌ر يه‌ك هووكار بوى، ئه‌ويش له‌وه‌ر ئه‌وه‌گ جه‌نگاوه‌ره‌يل كورد تا ئيسه مه‌شق ته‌ماميگ نه‌كردنه‌و له هه‌مان وه‌خت ريكخرياگ داعش وه‌بى هويچ رينماييگ فه‌رمى ئه‌و چه‌كه‌يل پيشكه‌فتگه ئه‌يه‌رێده كار ك له‌سوپاى عراقى كه‌فته‌سه ده‌سى.
كورد ئيسه ئه‌زانن ك ئاسانترين شيوازيگ ئه‌را ده‌سكه‌فتن ته‌قه‌مه‌نيه‌يل پيشكه‌فتگ ئه‌مريكى ئه‌وه‌سه ك له په‌لامارداين ريكخرياگ ترۆريستى داعش بارنه‌ى ده‌س، يه‌يش بيجگه كه‌مى له ته‌مويلكردن، چوينكه فريه‌يگ له پێشمه‌رگه‌يل وه وه‌خته‌يل به‌شبه‌ش جه‌نگ ئه‌كه‌ن، چوينكه مووچه‌يليان كه‌مه‌و به‌شيان ناكا، هه‌ر له‌وه‌ر ئه‌وه‌يش سه‌ركرده‌يگ له وزاره‌ت پێشمه‌رگه ئه‌وه ده‌رخست و وت: ئه‌گه‌ر پێشمه‌رگه ئه‌را ماوه‌ى يه‌ك مانگ له به‌ره‌ى نوايين جه‌نگ بمينن ناتويه‌نن مه‌عيشه‌ت خيزانه‌يليان دابين بكه‌ن.
سياسيه‌يل كورد ده‌سميه‌ت پێشمه‌رگه ئه‌يه‌ن، ئه‌وانيش هه‌ردوگ له هه‌ردوگ حزب سه‌ره‌كى پارت ديموكرات كوردستان و يه‌كێتى نيشتمانى كوردستان، ك له ساڵه‌يل نه‌وه‌د جه‌نگ كه‌فته ناونيان و هه‌رێم دابه‌ش كردن ئه‌را دو حكومه‌ت، وه‌لى ئه‌گه‌ر سياسه‌ت ئه‌مريكا راسگوو بدێ، بايه‌سه له‌بانى ده‌سميه‌ت كوردستان بيه‌ێد ئه‌را ريكخستن و مه‌شقداين و ئاماده‌كردن سوپايگ كوردستانى ناسياسى، ك يه‌يش فريه نيه ئه‌را ئه‌مريكاو ئه‌تويه‌نێد پشتگيرى به‌رنامه‌ى وزاره‌ت پێشمه‌رگه بكا ئه‌را دامه‌زرانن يه‌كه‌يليگ ناحزبى.
ئمجا له‌وه‌ر ئه‌و ده‌سكه‌فته‌يل كرده‌وه‌ييه ك كورد ئه‌نجامى داگه، دروسكردن سوپايگ كوردستانى مه‌شقدرياگ و ئاماده وه‌شيوه‌يگ راسكانى زه‌ره‌د گه‌ورايگ ئه‌ڕه‌سنێده ريكخرياگ ترۆريستى داعش، ك يه‌يش ئه‌ركى ئه‌وه‌سه ڕى نه‌ياد ريكخرياگ داعش زاڵ بدێده بان باكوور خوه‌رئاواى عراق و فشار له‌بان حكومه‌ت عراقييش كه‌مه‌و بكا، گرينگتريش له‌وه ئه‌وه‌سه ك ئى مه‌سه‌له ئه‌را حه‌يده‌ر عبادى دابين بكريه‌ێد ك هه‌وه‌جه وه خاسسازى و دوباره بنياتنانه‌وه‌ى هيزه‌يلى ديرێد وه‌شيوه‌يگ راس و دروس.
دى وه‌ل ده‌خاڵه‌ت سه‌ربازى رووسى ك خه‌ريكه فيشتر ئه‌دێ له خوه‌رهه‌ڵات ناوين، سه‌رۆك ئۆبامايش هه‌وه‌جه وه بته‌وكردن هاوپه‌يمانێتى وه‌ل كورد ديرێد، ك كورد ئسپات پابه‌ندى خوه‌ى كرد له هه‌ڵمه‌تى دژ ريكخرياگ تريستى داعش له عراق.
وه‌ل ئه‌وه‌يشا سوپايگ كوردى ك تواناى روى وه‌ڕوى بوينه‌وه‌ى ريكخرياگ ترۆريستى داعش داشتوود وه شوه‌يگ جددى، ته‌نيا ڕييگه ئه‌را جيوه‌جيكردن سه‌ركه‌فتن وه‌بى كلكردن سه‌ربازه‌يل ئه‌مريكى ئه‌را مه‌يدانه‌يل جه‌نگ.