شايه‌ت به‌خت ژيان تازه‌يگ ئه‌ڕاى نويساوێد دوير له شيوازه‌يل مه‌شق وه‌رده‌وام ك ئه‌ياده تويش سه‌دان هه‌زار مناڵ له ناوچه‌يل ژير ده‌سڵات ريكخرياگ ترۆريستى له سوريا و عراق، ك فريه‌جار وه ته‌قاننه‌وه‌ى خوه‌يكوشتن كووتايى وه‌پى ئه‌يه‌ێد.
وه شماره‌يش، كرده‌وه‌يل سه‌ربازى وه‌رده‌وام له زيايبوين بوى له مه‌سه‌له‌ى وجوود مناڵه‌يل يا جايه‌ڵه‌يل له‌ناونى ڕزه‌يل ريكخريگ ترۆريستى، ئه‌ويش ئه‌وه‌گ له يه‌ناير2016 ريژه‌ى به‌شدارى مناڵه‌يل و جايه‌ڵه‌يل سێ ئه‌وه‌نه‌ى تر زياى بوى له‌چه‌و هه‌مان مانگ له ساڵ 2015، يه‌يش بيجگه ئه‌وه‌گ نزيكه‌ى 40% له خاوه‌ن سه‌ياره‌يل مينڕيژكرياى يا شاحنه‌يل ئاماده‌كرياگ وه ته‌قينه‌وه‌يل له ته‌مه‌ن مناڵى بوينه‌و ريكخرياگ ترۆريستى له‌يوا وه‌پيان كردگه خوه‌يان بته‌قننه‌و له‌ناو بنگه‌يل سه‌ربازى و شوونه‌يل تر ئاسايشى.
له‌ئاكام راپۆرتيگ ك له‌لايه‌ن "ميا بلوم وجون هورغان" له زانكۆى George Stateبڵاو كريا، ئاشكراى وه‌رده‌وامى فشار سه‌ربازى كرد له‌بان ريكخرياگ ترۆريستى داعش وه ئه‌وه‌گ ئه‌و ريكخرياگه فيشتر له كرده‌وه‌يل ته‌قينه‌وه‌و كاره‌يل خوه‌يكوشى مناڵه‌يل ئه‌يه‌رێده كار.
له‌يرا دوير نيه ناوه‌يل فريه‌يگ ئه‌را مناڵه‌يل سورياو عراق دابنريه‌ێد، هه‌ر له‌وه‌ر ئه‌وه‌يش نه‌وه‌ى تازه‌يگ ده‌ركه‌فت و ناويان نريا"ئه‌شبال ئه‌لخلافه"، يه‌يش دوياى ئه‌وه‌گ نه‌وه‌يگ تر بوى وه‌ناو"ئه‌شبال ئه‌لئه‌سه‌د" يا "ئه‌شبال سه‌دام حسێن"له عراق.
ئى نه‌وه وه‌ل گشت ئه‌و شيوازه‌يل ته‌دريس په‌يڕه‌وكرياگ و مه‌ژگ شووردنه ك ئه‌قڵ مناڵه‌يل بردگه، هويچ له ژيانى نازانێد بيجگه جواودانه‌وه‌ى ته‌نيا دو پرسيار، ك ئه‌ويش ئه‌وه‌سه چوين دوشمنه‌گه‌د كوشێد؟ و چوين لايه‌نگرى ئه‌را سه‌ركرده‌د پيشكه‌ش ئه‌كه‌ێد؟.
زويتر له ئمساڵ وه‌گووره‌ى شايه‌تى مناڵه‌يل ئه‌را رووژنامه‌ى "ئه‌ندبندنت" بريتانى، ئه‌وه ده‌ركه‌فت ك سێ به‌ش له سوپاى داعشى وجوود ديرن: سوپاى ئه‌لده‌وله، سوپاى ئه‌لخلافه‌ت، سوپاى ئه‌لعه‌دنان.
ئى هه‌رسێ سوپا سه‌ربازگه ئه‌را ئه‌شبال ئه‌لخلافه‌ت ديرن و له‌تى ريڕه‌وه‌يل ده‌روينى و عه‌قائدى نيشانينان دريه‌ێد له‌بان په‌يڕه‌و دوباره‌كردنه‌وه‌و كاڵين فكره له ئه‌قڵ مناڵه‌يل، ئمجا مناڵه‌يل هه‌ناى چه‌ويان ئه‌كه‌فيده ئه‌و كرده‌وه‌يله وه ده‌نگ به‌رز هاوار ئه‌كه‌ن و ئويشن: ئه‌خوازيم ئه‌و كاره‌يله ئه‌نجام بيه‌م و بوومه خوه‌يكوش.
ئى سه‌ربازگه‌يله دابه‌ش بوون ئه‌را سێ ئاست جياجيا له مه‌شق:
يه‌كه‌م: مه‌شق ئايينى، ك ئه‌يه خه‌ته‌ره‌و له‌تى مناڵه‌يل هووكاره‌ى فكر جيهادى ئه‌كريه‌ن و له‌وانه‌يش ئاماده‌كردنيان ئه‌را جيوه‌جيكردن كاره‌يل خوه‌يكوشى جوور گيانفيدا ئه‌را ده‌وڵه‌ت.
دويه‌م: مه‌شق كردوه‌يى، ك يه‌يش جووريگه له مه‌شق جه‌سه‌يى سه‌ختيگ و ده‌رسيان له‌بان شيوازه‌يل وه‌كارهاوردن چه‌ك ئه‌دريه‌ێد.
سێيه‌م: مه‌شق ده‌روينى، ك له‌تى مناڵه‌يل بريه‌ن ئه‌را مه‌يدانه‌يل گشتى له‌وه‌ر به‌شداريكردن له سه‌ربڕين يا ئه‌را ياوه‌رى پۆليس ئايينى وه‌خاتر بته‌وكردن ئحساسيان له سه‌ركه‌فتن.
دياره ئه‌و سياسه‌ته ئه‌را بته‌وكردن لايه‌نگرى، له‌بان جياكردنه‌وه‌ى مناڵه‌يل له كه‌س وكاريان ئه‌نجام ئه‌گرێد جوور ئه‌وه‌گ عوسمانيه‌يل ئه‌نجامى ديان له كووتايه‌يل سه‌ده‌ى 14 هه‌ناى ك ئنكشارى له‌بان رفانن مناڵه‌يل كار كردياد و ناچاريان كرد ريره‌وه سه‌ربازيه‌گه‌ى په‌يڕه‌و بكه‌ن ك بنه‌مايگ بوى ته‌نيا له‌بان فكره‌ى لايه‌نگرى ئه‌را ده‌وڵه‌ت.
ئمڕوويش ئه‌وه‌سه گشت جه‌هان مه‌ترسى ئه‌وه ديرن ئه‌شبال ئه‌لخلافه‌ت له دونيا بڵاو بدێ و بوونه ناپاڵ قورمشكرياگ و له هه‌ر وه‌ختيگ و له هه‌ر وڵاتيگ بته‌قێده‌و، ئمجا فريه‌يگ له شيه‌وكه‌ره‌يل ئه‌و متمانه په‌يا بوى له‌لايان ك جه‌نگ ئه‌دێده مه‌سه‌له‌ى نه‌وه‌يل و شايه‌ت 20 تا 30 ساڵ ديريژه داشتوود له حاڵه‌تيگ ئه‌گه‌ر وه زويترين وه‌خت داعش بنبڕ نه‌كريه‌ێد.