شه‌فه‌ق نيوز/ ئاوايى "متێبيجه" له پاريزگاى سه‌ڵاحه‌دين ئاڵشت بويه ئه‌را لوغزيگ و سه‌رگه‌ردان هيزه‌يل عراقى كردگه، ئه‌ويش ئه‌وه‌سه ئه‌و ئاوايه ك مه‌ردمه‌گه‌ى چووڵى كردن بويه‌سه ناوه‌نديگ ئه‌را په‌لاماره‌يل له‌ناكاو له‌لايه‌ن ريكخرياگ ترۆريستى داعش ئه‌را بان باقى ناوچه‌يل تر پاريزگاى سه‌ڵاحه‌دين.
به‌سانن ده‌روازه و شوونه‌يل ده‌رچگن شاره‌گه‌و ڕى وبانه‌يلى وه ريككه‌فت وه‌ل زيايبوين خاڵه‌يل وشكانن شه‌و و رووژ جموجويل خسته‌سه جاده‌يلى و سه‌ياره‌يل مه‌ده‌نى و سه‌ربازى وه چه‌كداره‌يل ئه‌شايره‌و بوينه‌سه گرينگترين ديارده‌ى ئاشكرايگ ئه‌را ماوه‌ى دو مانگه وه تايبه‌ت له ناوچه‌يل خوه‌رهه‌ڵات سه‌ڵاحه‌دين.
چه‌كداره‌يل داعش جاريگتر وه هيزه‌و هاتنه‌سه‌و ئه‌را ئه‌و ناوچه‌يله، ئه‌ويش له‌وه‌ر ئه‌نجامداين په‌لاماره‌يل كاريگه‌ر و له‌ناكاو ك هيزه‌يل ئاسايشى و پياوه‌يل ئه‌شاير تيكه‌ڵ وه حه‌شد شه‌عبى بگرنه ئامانج و پشت وه سروشت جوگرافى به‌سانه‌و هيمان بڕيگ له ناوچه‌يل كويه‌ى حه‌مرينيش ها ژير ده‌سڵاتيان.
ناوچه‌يل باشوور و خوه‌رهه‌ڵات سامه‌ڕا و ناحيه‌ى ئه‌لعه‌له‌م بوينه‌سه خه‌ته‌ريگ ئاشكرا وه‌ل دوباره‌كردنه‌وه‌ى په‌لاماره‌يل ئه‌و ريكخرياگ ترۆريستيه تا ره‌سێده په‌لاماره‌يل كه‌مترين له يه‌ك كيلۆمه‌تر له ناوه‌ند قه‌زاى ئه‌لدۆر(25كم له باشوور خوه‌رهه‌ڵات تكريت)و له هه‌مان وه‌خت ده‌سڵاتيش ديرن له‌بان ئاوايه‌يليگ جوور ته‌ل گسيبه و ئه‌لره‌بيع و ئه‌لحه‌سان و ئه‌لسه‌لابخه‌و ئه‌لعيس و متێبيجه‌و غالبيه، ك ئه‌و په‌لاماره‌يليشه له ناوچه‌يل كويه‌ى حه‌مرينه‌و ئه‌نجام ئه‌دريه‌ن.
متێبيجه، ئه‌و ئاوايه‌سه ك كه‌فته‌سه دويرى 35كم خوه‌رهه‌ڵات زڵوعيه له كنار ده‌رياچه‌ى عزێم له‌بان مه‌رزه‌يل جياكه‌ر ناونى هه‌ردوگ پاريزگاى سه‌ڵاحه‌دين و دياله‌و يه‌كيگه له‌و ئاوايه‌يله ك فيشترين په‌لاماره‌يليگ له‌تيه‌و ئه‌نجام ئه‌دريه‌ێد، ئه‌ويش له‌وه‌ر سروشت كشتوكاڵى و چاڵ و به‌رزى جوگرافى ناوچه‌گه.
ئاوايه‌گه پڕه له كارخانه‌يل كوچگ و رمڵ و بنگه‌يل ئاوبه‌ره‌و ئه‌را ماوه‌ى دو ساڵێشه مه‌ردم له‌تى نيه‌و بويه‌سه گرينگترين شوونه‌يل ريكخرياگ ترۆريستى، ك هه‌رچه‌نى هيزه‌يل ئاسايشى چوار جار په‌لامار پاكسازيكردنى دانه، وه‌لێ ئه‌و هيزه‌يل هويچ گرده‌وبوينيگ ئه‌و چه‌كداره‌يل داعشه وه‌دى نه‌كردن، ك يه‌يش ماناى ئه‌وه‌سه ئه‌و چكداره‌يله له وه‌خته‌يليگ په‌لاماريان بدريه‌ێد تواناى واين ديرن.
مه‌ردم ئه‌و ناوچه پيكهاتنه له هووزه‌يل ئه‌لبو عيسا، ك وه‌بوونه‌ى فريه‌يى په‌لاماره‌يل سه‌ربازى ئه‌و چوونه چووڵ كردن و له ده‌ورگرد سامه‌ڕا جيگير بوينه له‌لاى قه‌وم وخيشه‌يليان، وه‌ل ئه‌وه‌يشا ئى ئاواييه جوور ئه‌وه‌گ زياد خه‌ڵه‌ف پۆليس ئويشێد تويش داگيركارى هات.
ئه‌حمه‌د ئه‌لجبورى پاريزگار سه‌ڵاحه‌دين داوا له حه‌يده‌ر عبادى سه‌رۆك وه‌زيره‌يل عراقى و سه‌ركرده‌ى گشتى هيزه‌يل چه‌كدار كرد ده‌خاڵه‌ت بكا له مقه‌يه‌تيكردن ناوچه‌يل خوه‌رهه‌ڵات پاريزگاگه‌و له‌لێدوانه‌يليگ ئه‌را رووژنامه‌يل ناوچه‌يى وت: ناوچه‌يل خوه‌رهه‌ڵات دجله و قه‌زاى ئه‌لدۆر له خوه‌رهه‌ڵات سه‌ڵاحه‌دين ناڵنن وه‌ده‌س زنجيره په‌لاماره‌يل وه‌رده‌وام داعش و فيشتر له 600 خيزان كووچكردنه وه‌ره‌و شوونه‌يل تر نزيك له ئه‌لدۆر و تكريت و سامه‌ڕا.
وه‌ل ئه‌وه‌يشا چه‌كداره‌يل داعش له په‌لاماره‌يلى بنگه‌يل ئاسايشى ئه‌گرنه ئامانج و ڕى تكريت – كه‌ركوك بڕن له شوونه‌يليگ جياجياو ئه‌را چه‌ن جاريگيش ئه‌نجامى دانه له هه‌ردوگ مانگ يه‌ناير و فبرايه‌ر گوزه‌يشت، ئه‌و كرده‌وه‌يليشه ئه‌و ريكخرياگه ئه‌نجامى داگه بنگه‌ى پۆليس ئه‌لبو خدۆ له خوه‌رهه‌ڵات سامه‌ڕا گرته ئامانج و شه‌ش پوليس كوشت و بنگه‌گه‌يش سزانن و دوياى ئه‌وه‌يش بنگه‌ى پۆليس ئاوايى ئه‌لنايب گرتنه ئامانج و له‌ڕى خوه‌يكوشيگيش باره‌گاى فه‌رمانده‌يى خوه‌رهه‌ڵات دجله‌يش گيريا ئامانج و 33 كه‌س كوشتن له هيزه‌يل ئاسايش و 12 بورج جيوازكردن وزه‌ى كاره‌ه‌بايش ته‌قاننه‌و ك بويه هووكار بڕيان كاره‌با ئه‌را فيشتر له يه‌ك هه‌فته له‌بان ناوچه‌يل ئه‌لدۆر و خوه‌رهه‌ڵات تكريت و ئه‌لعه‌له‌م.
جاسم ئه‌لجه‌باره سه‌رۆك ليژنه‌ى ئاسايشى له ئه‌نجومه‌ن پاريزگاى سه‌ڵاحه‌دين وت: داعش له شوونه‌يليگه‌و په‌لاماره‌يلى ئه‌نجام ئه‌گرێد ك هيمان بۆشاييگ ئاسايشى وه‌پيانه‌و دياره‌و جوور بنگه‌يليگه ئه‌رايان له كويه‌يل مه‌كحول له باكوور بێجى و حه‌مرين و خوه‌رهه‌ڵات پاريزگاگه.
ئه‌لجه‌باره هه‌ميش وت: ئازادكردن ئه‌و ناوچه‌يله هه‌وه‌جه وه په‌لامار زه‌مينى و ئاسمانى ديرێد ئه‌را ويرانكردن شانه‌ى ئه‌و ريكخرياگه ك له‌و ناوچه‌يله شوون خوه‌يان قايم كردنه، وه‌تايبه‌ت ئه‌و ناوچه‌يله ك كه‌فتنه‌سه ناونى هه‌ردوگ پاريزگاى سه‌ڵاحه‌دين و دياله‌و ناوه‌نديگن ئه‌را ئه‌نجامداين په‌لاماره‌يل ئه‌و ريكخرياگ ترۆريستيه.
له‌و هووكاره‌يليشه ك له‌يوا كرد ناوچه‌يل متێبيجه و به‌رزايه‌يل حه‌مرين و كويه‌يل مه‌كحول بوونه شوونه‌يليگ ئه‌مان ئه‌را كرده‌وه‌يل ئه‌و ريكخرياگه، ئه‌ويش سروشت جوگرافى سه‌خت ئه‌و شوونه‌يله‌سه ك ناوچه‌يليگ به‌رز و نزمى و سه‌ختن و رويوه‌ر فراوانيگ ديرن و دريژه‌و بوون تا چه‌ن پاريزگايگ وه‌ل وجوود چه‌كداره‌يليگ سه‌ر وه داعش ك خه‌ڵك هه‌مان ئه‌و ناوچه‌يله‌نه، ك يه‌يش ماناى ئه‌وه‌سه ئه‌وانه خاس ئه‌و ڕى وبانه‌يله ناسن و يه‌يش ريخوه‌شكه‌ره ئه‌را په‌لاماره‌يل داعش له‌و ناوچه‌يله‌و تا شوونه‌يل تر بگرنه ئامانج.