شەفەق نیوز/ حوسێن خەدیدا بڕیار داشت لە ری سنوور بیلاڕووسیا کووچ بکەێد ئەرا ئەڵمانیا، باوجی جاریگتر ئەرا ناو کەمپ لەوەر نائومیدی لە رەسینی گلەو خوارد، دۊیای ئەوگ سنوور پۆڵەندا وەتەواوی بەسیا.
خەدیدە وە ئاژانس شەفەق نیوز راگەیان، مردن وە خوەم دیم لە دۊیای گومبۊینم چەن رووژیگ لە دارستانەیل بیلاروسیا لە سنوور پۆڵەندا و باسکرد؛ کۆچبەرەێل وەلایەن پۆلیس بیلاڕووسیاوە پەلامار دریانە.
وتیش: "ئیمە لە جیاوازی سیاسییەێل نیوان بیلاڕووسیا و پۆڵەندا بیخەوەر بۊیمن، بیلاروسیەێل بازرگانی وە کۆچبەرەێل کردن وە دەڵەکناێنیان ئەرا رەد کردن سنوورەگە ئەرا ناو خاک پۆڵەندا و مەوقەی بەربەسەگە رەد ئەکردین نوامان ئەگردن لە گلەوخواردنمان وەی جۊرە.
خەدیدە باسکرد، ئیمە چەن رووژیگ رۊیوەرۊی ورسگی و تینگی بۊیمنە، ئاو و خورما و نان شاردبۊمنەو، باوجی بەش نەکرد، ئێمە خوەراک و ئاو هەڵگردۊیمن وەگەرد ئیە جارەیلیش ئەرا ماوەی دو رووژ بی ئاو و نان مەنیمن.
دۊیایی نائومیدی لە رەدبۊینی ئەرا ئەڵمانیا خەدیدە بڕیار گلەوخواردن دەێد، و ئۊشێد" ناو ئەرا گلەوخواردن نۊیسایمن و کلکردنمان ئەرا پایتەخت بیلاروسیا و ئیجا وەرەو هەولێر وە بی تیکت فڕۆکە و وەشکین و هیچ کرایەیتر نەیایمنە".
شانی خەڵات خان داڵگ خەدیدا باس لە گرفتاری خوەی لە بیلارۆسیا کرد وە شەفەق نیوز وت: " ئەو رووژەێلە ک لە دارستانەێل مابەێن سنوور بیلاروسیا - پۆڵەندا گوزەرانی کردیمن، ئەو رووژەێلە هاوردە هۊیرم هەنای داعش پەلامار شار شەنگال دا، مەوقەی ئاوارەبۊینمان و رۊیوەرۊی ورسگی و تینگی بۊیمن.
شانی وتیش؛ " ئیمە 20 هەزار دۆڵار ئەرا گواستنەوە و شۊینمان و خوەراک و نووشین خەرج کردیمنە ئیسە نیه‌زانیمن چە بکەێمن".
رووژ پەنجشەممە (ی18 تەشرین دۊیەم ) زیاتر لە 430 کووچبەر ک لە سنوور ناوبەین بیلاڕووسیا و پۆڵەندا گیرکردۊین رەسینە فڕوکەخانەێل هەولێر و بەغدا.
لە مانگ ئاب گوزەشتە دەسڵاتدارەێل عراق وەجی چووڵکردن 690 هاوڵاتی راگەیانن ک چەن هەفتەیەگە لە سنوور بیلاروسیا و لیتوانیای خوەرئەڵات گیرهاتنە.
لە مانگ ئاب گوزەشتە وڵاتەیل یەکێتی ئەوروپا ک هاوسنوورە وەگەرد بیلاروسیا (لیتوانیا، لاتڤیا و پۆڵەندا) داوای دەسمیەتی لە وڵاتەیل یەکێتی ئەوروپا کردن، لە مابەێن بەرزەوبۊین وەرچەویگ لە شمارەی کووچبەرەێل نا یاسایی ک لە عراق و ئەفغانستان و سوریا هاتنە.
حکوومەتەێل ئێ سێ وڵاتە ئەلێکساندەر لوکاشینکۆی سەرۆک بیلاروسیا وەوە توومەتبار کردن وە فرەزانی "گەشتیار" ئەرا وڵاتەگەی مکیس کردیە، و ئاسانکاریی ئەرا کووچکردن نایاسایی کردگە.
سەرۆک بیلاروسیا راگەیان ک وڵاتەگەی ریگری لە رەسین کووچبەرەێل وە وڵاتەێل یەکێتی ئەوروپا لە ری خاکەگەی کەێد.
لەو مانگ گوزەشتە عراق رەدکرد لە وەکارهاوردن هاوولاتیەێلی خوەی لە مەرافەێل ناودەوڵەتی ئەوان دۊرن و دووپاتکرد کووچبەرەێل عراقی ک وەرەو سنور لیتوانیا لەوڵات بیلاڕووسیاوە چگنە، شایستەی مقەیەتیکردن هەردگ وڵاتەگەن.