شەفەق نیوز/ دەیان خیزان لە ئاوای سحاجی باشوور خوەرئاوای مووسڵ لەوەر نەوین ئاو نووشین، ناچار بوینە ماڵەیلیان بیلنەجی.       

قەیران ئاو        

شێخ مشعەل عوبەیدی موختار ئاوایەگە باس ئی قەیرانە ئەرا ئاژانس شەفەق نیوز کەێد و ئۊشێد: تینگی فرە مەینه‌تیان دا و ئاو بیرەیلیش ئاست کبریتی بەرزەو بوی، لەوەر کەم وارانی، و دی ئەرا نووشین ئاژەڵیش وەکار نیەتیەێد نەگ ئەرا ئایەم.       

عوبەیدی وتیش: گرفت نەهامەتی راسی تەنیا ها ئەو ئاو نووشینە ک یە دەیان ساڵە لە تانکرەیل سیننەی، ک شمارەی دانیشتگەیل سحاجی رەسێدە زیاتر لە ٦٠٠٠ کەس، وەگەرد ئەوەیش حکومەت خۆجێی تا ئمڕوو پڕۆژەیگ ئاو ئەرایان دروس نەکردیە.      

پەیمانەیل دروکانی       

وتیش: هەیتاهەیت حکومەت خۆجێی پەیمان پەیاکردن چارەیگ وەپیان دا، باوجی لەڕاسی هویچیگ نەکریا، و بایەت بوی فڕۆکەخانەی ناودەوڵەتی سحاجی لەی ناوچە بویاتاد ک چەنای چەنیگ حکومەت باس لەلی کردیە، وباس پەیمانەیل بیناکردنی کردیە، ک گوایە بوودە فڕۆکەخانەیگ جویر دەروازەیگ ئابووری ئەرا عراق وەگەرد جەهان، چوینکە شوینەگە ستراتیژیە، باوجی ئی فڕۆکەخانە نیەسەی، ک ئەوان ئاو وەزوور کەفێدە دەسیان دی چوین فڕۆکەخانەی گەپیگ لەی ناوچە دروس کریەێد.        

زیان زیابوییگ      

یاسین نایف، یەکیگە لە خەڵک سحاجی، لە قسەیلی ئەرا ئاژانس شەفەق نیوز وت: دەسکردمە مینەی ماڵیگ وەکرا لەناو مووسڵ تی ئی شوینە بیلمەجی، ک ژیانمان ئەوە هەڵنیەگرێد وەبی ئاو نووشین ناچار بویمن، و تا چەنیگ هەر ئاو لە تانکەر بسینیمن. نایف دیاری کرد ک نەدارەیلیگ هەس توانای سەنین ئاو فرەیگ نەیرن، ئەراوە وەگورەی خوازینیان ئەرا نووشین ئاو سینن، وئەگەر بخوازن سناو بکەن ناچار ئاو بیر بوون، ک ئەوەیش پڕە لە بوو کبریت.      

لەلای خوەییش، سامر ئەحمەد ئەرا ئاژانسەگە وت: ئەو کارە ک زیانیان فرەوە کرد خوەی هشکەوبوین بیرەیل بوی، ک ئەوسا ئاوەگەی ئەرا ئایەم وەکار هات، و ئەو ئاوە ک ئیسە لەناو بیرەیل مەنیە، پڕە لە کبریت، و ئیسە تانکەریگ ئاو وە ٥٠ هەزار دینار سینن، وئەوەگ توانا نەیرێد خوەی وهاوساگەی یەک تانکەر سینن.       

ئەحمەد وتیش: تاوسان نزیکە وئەوەسا وەکارهاوردن ئاو فرەترەو بوود، و مەردمەگە نیاز دەرچگن دیرن، ک لەجیای ئەوە وە ١٠٠ هەزار دینار ئاو بسینن، خو مینەی ماڵیگ وەکرا کەن لەناو شارەگە، ولەی زیانە قورتار بوون.     

سامر دووپات کرد ک حکومەت خۆجێی خستەیانە پشتگووش، وهویچ وەرپرسیگ لەساڵەیل گوزەشتە سەردانیان نەکردیە، هەر چماێ یانە خەڵک پارێزگاگە نیین، وکاریگ وەپیان نەیرن، وئۊشن پڕۆژەی ئاویگ هەس، وەلێ هویچیگ بیجگە پەیمان نییە، ونیەزانیمن کەی ئاو وەپیمان رەسێد.       

وەرانوەر ئەوە، مەحمود تارق قسەی فرەیگ نەکرد هەنای ئاژانس شەفەق نیوز چەوی لەلی کەفت، و وەکوڵبڕی وت: "گشت خەومان ئەوە بوی لەناو ماڵ خوەمان ئاویگ بنووشیمن، ئەوەسا لەتینگی مرم وهیمان ئاویگ لەناو ماڵ نەنووشیمە".     

لەلای خوەییش، حکومەت خۆجێی نەینەوا لەبان باوەت ئی ناوچە وەزوان رەعەد عەباسی یاوەر پارێزگار هاتە دەنگ ک وت: ئمساڵ دیرن کار لەبان تەواوکردن پڕۆژەی ئاو سحاجی کەن، وهویچی نەمەنیە وئەوەسا ئەوپەڕی وەگەرد کۆتایی ئی ساڵە یا ساڵ ئاینە تەواو بوود.    

لەبان پەیمانەیل حکومەتی، باوجی خەڵک ناوچەگە دووپات کردن ک دی بڕوایان وە پەیمان ووتارەیل نەما، ک ساڵەیل تینگی ئومید لەناودڵیان کوشت.