له تازه‌ترين وه‌رزه‌يل دوسيه‌يل گه‌ناته‌كاری ك هيزه‌يل عراقی خستنه‌ی ڕوی، ده‌نگ په‌رله‌مان عراقی بوی، ئه‌ويش له سه‌ندنه‌وه‌ی متمانه له زێباری وه زوورم ده‌نگ ئه‌ندامه‌يل په‌رله‌مان دويای تومه‌تباركردنی وه گه‌ناته‌كاری.
ئه‌نجومه‌ن نوێنه‌ره‌يل عراقی وه زوورم ده‌نگ ئه‌ندامه‌يل ئاماده‌بوی متمانه له وه‌زير دارايی سه‌نده‌و، هه‌ر له‌وه‌ر ئه‌وه‌يش ١٥٨ ئه‌ندام ده‌نگ له‌بان سه‌ندنه‌وه‌ی متمانه له زێباری دان له‌وه‌رانوه‌ر ٧٧ ده‌نگ ك سه‌ندنه‌وه‌ی متمانه له‌لی ره‌ته‌و كردن.
زويتريش په‌رله‌مان ميوانداری زێباری كرد ك سه‌ركرده‌يگه له پارت ديموكرات كوردستان وه سه‌رۆكايه‌تی مه‌سعود بارزانی سه‌رۆك هه‌رێم كوردستان، ئه‌ويش له ئاكام تومه‌تباركردنی وه دوسيه‌يل گه‌ناته‌كاری په‌يوه‌س وه خه‌رجه‌يل وزاره‌ته‌گه له‌بان پاسه‌وانه‌يلی و كارمه‌نده‌يلی.
له‌لايه‌ن خوييشه‌و، زێباری تومه‌تبار نوری مالكی سه‌رۆك وه‌رين وه‌زيره‌يل كرد وه ده‌سداشتن له‌و ميوانداريه ك ئه‌نجام دريا له په‌رمان و له‌تی وشداری دريا له‌باره‌ی گرتنه‌ئامانج كه‌سايه‌تيه‌يل كورد و كاريگه‌ريی له‌بان په‌يوه‌نديه‌يل ناونی به‌غداو هه‌ولێر.
خود مالكی خوه‌ی يه‌كيگه له‌و كه‌سه‌يله ك فيشتر وه گه‌ناته‌كار تومه‌تبار كرياگه، هه‌ر ئه‌وه‌يش بويه هووكار لاوردنی له ته‌خت سه‌رۆكايه‌تی وه‌زيره‌يل، وه‌لێ نفوزه سياسيه‌گه‌ی وه هيزه‌و وجوود ديرێد وه بوونه‌ی ئه‌و هيز فراكسيۆن په‌رله‌مانی فراوان‌و ئه‌و په‌يوه‌ندی بته‌وه ك ديرێدی وه ئيرانه‌و.
لالاوردن زێباری له‌شوون لاوردن عوبێدی ئه‌نجام گرت له وه‌ختيگ ك هه‌ڵمه‌تيگ سه‌ربازی له‌لايه‌ن سوپای عراقيه‌و دژ ريكخرياگ ترۆريستی داعش وجوود ديرێد، ئه‌ويش جوور ميوانداری كه‌سه‌يل تر له په‌رله‌مان وه پلان فراكسيۆن ئئتلاف ده‌وڵه‌ت ياسا وه سه‌رۆكايه‌تی نوری مالكی و هاوپه‌يمانه‌يلی.
ئه‌و قه‌يرانيشه ك له‌شوون ميوانداری عوبێدی كه‌فته‌و بويه مايه‌ی ئه‌وه‌گ بڕيگ نوێنه‌ر زاڵ بوونه بان ئه‌نجومه‌ن و ئعلانكردن لاوردن سه‌ليم جبوری سه‌رۆكی وه‌شيوه‌يگ ناياسايی، ك يه‌يش راده‌ی سته‌مكاری و كيشمه‌كيش سياسی ده‌رخست له‌بان وه‌سيله‌يل ته‌شريعی ياسايی دژ گه‌ناته‌كاری.
ئه‌نجامداين ئی كرده‌وه‌يليشه بويه هووكار كزه‌وبوين حكومه‌ت عراقی ك له‌بان بنه‌مای به‌شبه‌شايه‌تی تايفيه له‌ناونی پيكهاته‌يل سياسی، ك يه‌يش توانای ريگری له گه‌ناته‌یكاری نه‌يرێد وه شيوه‌يگ پيشه‌يی.
له‌يرا چه‌وديره‌يليگ باوه‌ڕيان ئه‌وه‌سه ك مالكی خاوه‌ن گه‌وراترين دوسيه‌يل گه‌ناته‌كاريه له مێژوو عراق و ته‌مای ئه‌وه ديرێد له‌نوو باێده‌و ئه‌را ته‌خت ده‌سڵات و نه‌ف وه‌ربگرێد له شيوايشيوو سياسی و ته‌شريعيه، ئه‌ويش وه‌و ئوميده ك ئاكام خاستر بياشتوود ئه‌ڕای له‌ڕی فراكسيۆن ئئتلاف ده‌وڵه‌ت ياسا له هه‌ڵوژاردنه‌يل ئاينده.
زێباری باس له سه‌ندنه‌وه‌ی متمانه‌ی كرد و وت: فراكسيۆن مالكی گرتنه‌سه‌مه ئامانج وه ره‌زايه‌تی سه‌ليم جبوری سه‌رۆك په‌رله‌مان عراقی وه ئامانج ئنتقامكردن و رمانن حكومه‌ت ئيسه‌ی عبادی.
زێباری يه‌يش ده‌رخست ك مالكی كار له‌بان رمانن حكومه‌ت حه‌يده‌ر عبادی ئه‌كاو هه‌وڵ ئه‌وه ئه‌ياد بار ناونی به‌غداو كوردستان عراق خراوتر بكا، ك هه‌ر وه‌و خاتريشه زێباری تاريف مالكی وه كينه‌ت له‌دڵ كرد.