شه‌فه‌ق نيوز/ كاره‌ساتيگ، خوه‌شى خيزانى به‌غدادى له ساڵ تازه هه‌ڵگه‌ردانه‌و ئه‌را ناخوه‌شى و دڵته‌نێ، ئه‌ويش له‌شوون ئه‌وه‌گ گوله‌ى وێڵيگ ژيان دويه‌ته بيتاوانه‌گه‌يان برد.
ژيان هاجه‌ر كووتايى وه‌پى هات، ك هيمان ته‌مه‌نى وه يانزه ساڵ نه‌ڕه‌سوێد، ئه‌ويش له‌وه‌خت ئاهه‌نگه‌يل سه‌ر ساڵ زايينى له به‌غداى پايته‌خت، ك گوله‌يگ وێڵ كڕكڕه‌ى پشتى بڕى له دويا رووژ ساڵ گوزه‌يشت.
باوگ هاجه‌ر، باس له كوشيان دويه‌ته‌گه‌ێ ئه‌كا، ك وه‌ل باقى مناڵه‌يل تر له قه‌وم و خيشه‌يليان له نزيك ماڵه‌گه‌يان چه‌وه‌ڕێ هاتن ساڵ تازه كرديان.
باوگ هاجه‌ر باس له‌وه كرد، وه‌رجه ده‌سوه‌پيكردن يه‌كه‌م چركه‌يل له ساڵ تازه، مناڵه‌يل وه خوه‌شييه‌و ده‌رچين ئه‌را دوينستن وازيه‌يل ئاگرين له ئاسمان شه‌و به‌غدا له نزيك ماڵ، ئمجا وه‌ل ئه‌وه‌گ سه‌عات بويه دوانزه‌ێ شه‌و، چه‌وم كه‌فت دويه‌ته‌گه‌م كه‌فته‌سه بان زه‌وێ و منيش تاو دام وه‌ره‌و لاى و ديمه‌ێ خوين له لويتى رشيه‌ێد و هووشى نه‌مه‌نگه.
باوگ هاجه‌ر وت: يه‌كسه‌ر باوه‌ش كردمه پياو بردمه‌ى ئه‌را نزيكترين نه‌خوه‌شخانه و هوير له‌وه كردم لويتى شكياوێد، وه‌لێ راپۆرت پزيشك پڕ شۆك بوێ ئه‌رام و ئيشاعه‌گه‌ێ ئه‌وه ده‌رخست ك گوله‌يگ چيه‌سه ناو سه‌ر هاجه‌ر وه‌ره‌و كڕكڕه‌ێ پشتى و يه‌كسه‌ر كووتايى وه ژيانى هاوردگه.
تا ئيراو عه‌باس باوگ هاجه‌ر، بيده‌نگه‌و بوێ و دێ نه‌تويه‌نست قسه بكاو هويچ چشتيگ له مناڵه بويچكه‌گه‌ێ ئه‌را وه‌جى نه‌مه‌ند بيجگه ره‌سمه‌گه‌ێ و جانتاى مه‌دره‌سه‌و وازيه‌يلێ.
وه‌لێ داوا له‌گشتلايگ كرد واز له گوله ته‌قانن بارن ك شايه‌ت گيان بيتاوانه‌يل بكاده ئامانج جوور ئه‌وه‌گ له هاجه‌ر روێدا.
"زوورم ته‌قه‌كه‌ره‌يل له كارمه‌نده‌يل پۆليسن"
له‌لاى خوه‌يه‌و، مامه‌ى هاجه‌ر داوا له ده‌سڵاته‌يل ئه‌منى كرد مامڵه‌ێ جددى وه‌ل ته‌قه‌كه‌ره‌يل بكه‌ن و ياسا ده‌رهه‌قيان جيوه‌جێ بكه‌ن و وت: لايه‌نه‌يل په‌يوه‌نديدار چوين له‌و ته‌قه‌كه‌ره‌يله خوه‌ش بوون.
هه‌ميش وت: زوورم ئه‌و كه‌سه‌يله ك ته‌قه ئه‌كه‌ن له به‌غدا له كارمه‌نده‌يل پۆليس و وه‌زاره‌ت ناوخوه‌يين، ك وه‌ى كرده‌وه‌يليانه ئه‌زره‌ت و ژيان بيتاوانه‌يل رفنن.
وه‌ل ئه‌وه‌يشا وه‌زاره‌ت ته‌ندروستى عراقى، له به‌ياننامه‌يگ ئاشكرا كوشيان هاجه‌ر عه‌باس كرد بيجگه زه‌خمداربوين نزيكه‌ى 77 كه‌س تر له پاريزگايه‌يل جياجاى عراق له‌ئاكام ته‌قه‌و گوله‌ى وێڵ.
وه‌زاره‌ت ناوخوه‌يى عراقييش زويتر وشدارى دا له‌باره‌ى ته‌قه‌كردن هه‌ڕه‌مه‌كى و وت: له حاڵه‌تيگ كه‌سيگ وه‌و بوونه‌وه ده‌سگير بكريه‌ێد تومه‌ت تيرۆر ئه‌خريه‌ێدى پاڵى و سزاى زيندانيكردن و جورم دارايى ده‌رهه‌قيان جيوه‌جێ ئه‌كريه‌ێد.