“مه‌سعود بارزانی سه‌رۆك هه‌رێم كوردستان چه‌ن مانگێگه له ناو “كه‌ره‌ڤان”ێگ نیشتگه‌و، سه‌ركردایه‌تی جه‌نگه‌گان ئه‌كا. ئه‌وه‌يش نزیكترین خاڵه ك هه‌ر سه‌ركرده‌ێگ سه‌ربازی بتويه‌نێد له‌تێ بوود ئه‌ڕا سه‌رپه‌رشتی كردن جه‌نگه‌گه.
هه‌ركه‌سێگ بخوازێ سه‌ردان بارزانی بكا ك گشت ئه‌ركه سیاسییه‌گانێ له هه‌ولێر هيشتگه‌سه جێ ئه‌ڕا حكوومه‌ت و، بڕیاریداس بچووده ناو جه‌نگه‌گه، بايه‌د جنگه‌يل قورس بكاده وه‌ر و، له‌و شوونه بمێنێده‌و، باره‌گاێ ئه‌و ڕابه‌ر كورده، هویچ هۆكارێگ خوه‌شگوزه‌رانی له‌تێ نییه.
ئه‌و كه‌سه‌يله ك هان وه‌لێا ئويشن: ” ئه‌و هووكاره‌ێ ئه‌و جووره ژینگه‌سه. كوڕ ئه‌و ژینگه‌سه. باوگیشێ (مه‌لا مسته‌فاێ بارزانی) ك ڕابه‌ر شۆڕش ڕزگاریخواز كوردبوی، له ژینگه‌ێ سه‌ختتر و بارودۆخ فره ناهه‌موارتر ژیاس، له كويه دوير ده‌سه‌گان”.
وه‌ناويه‌كاچين جوگرافی له ناوچه‌یل باكوور موسڵ، ك به‌نداو موسڵ هاتێ فره وه‌ئاشكرايی دياره، ئه‌و به‌نداويشه ماوه‌ێگ له‌يه‌ووه‌ر هێز پێشمه‌رگه وه‌هاوكاری ته‌ياره‌يل هاوپه‌یمانه‌يل له داعش ڕزگارێ كرد.
پێشمه‌رگه، دووربین ده‌نه میوانه‌يلیان تا له‌لێه‌و جموجويله‌یل داعش بوينن. داعش له‌و ئاواييه‌يله ك هانه باو‌ش كويه‌گان و هه‌ميش له چه‌م دجله‌و زه‌ویه كشتوكاڵیه پان وبه‌رینه‌گان، ئه‌وره وه‌كار تێرێد ئه‌ڕا هاتوچووكردن و دروسكردن هێڵ ته‌ماس و دروسكردن فه‌ن و فێڵ سه‌ربازی.
یه‌كێگ له‌سه‌ركرده سه‌ربازییه‌گان پێشمه‌رگه له به‌نداو موسڵ له وه‌ختێگ ئاماژه ئه‌ڕا جموجويله‌یل داعش له داوان یه‌كێگ له كويه‌گان كردياد وه سايت ”مۆنیتۆر” وت: ” سه‌ركه‌فتن ته‌واوه‌تی له‌بان داعش له موسڵ، ئه‌گه‌رێگ له‌وه‌ر ده‌سسه، وه‌لێ سه‌ختییه‌گه ها له چوينيه‌تی پارێزگاری كردن له‌و زه‌ویه‌يله‌گ ئازاد كريه‌ن. پێشمه‌رگه له ئازاد كردن ئه‌و ناوچه‌يل پان و به‌رینه ك داعش له ماوه‌ێ گوزه‌يشته داگیریان كردويد، پشت وه نيشته‌جايه‌يل ناوچه‌گان به‌سێ. ئه‌وه‌يش لێوا كردياد ك پێشمه‌رگه تواناێ مرۆیی داشتوود ئه‌ڕا پێشڕه‌وی‌كردن وه‌ره‌و ناوچه‌یل تر. وه‌لێ فراوانتر كردن ئه‌و ناوچه‌يل ئازادكرياگه، هه‌وه‌جه وه ئاماده‌سازی زیاتر دێرێ له‌بان زه‌وی”.
چه‌ن ئه‌فسه‌رێگ فه‌رمانده‌یی ئۆپه‌راسیۆنه‌یل پێشمه‌رگه، ئاماژه وه‌وه دان: ”هاوكاری هه‌ليكۆپته‌ر ئه‌مریكی له جوور ئاپاچی و، دروس‌كردنی ڕووپووشێگ ئاسمانی، تويه‌نێد بووده هاوكاری گه‌وراێگ ئه‌ڕا پرۆسه‌ی ڕزگاركردن موسڵ”.
ئه‌و ئه‌فسه‌ره‌يله ئاماژه وه خاڵێگ تريش كردن، ئه‌ویش ئه‌وه‌سه ك جه‌نگ وشكانی هه‌وه‌جه وه ڕووپووش هه‌وایی دێرێ، زياتر له‌وه‌گ هه‌وه‌جه وه بۆمباران ته‌ياره‌گان داشتوود. هه‌رچه‌ن بۆمبارانه‌گان گرنگی گه‌وراێگ دێرن له قورسه‌وكردن ته‌رازوی هێز له‌به‌رژه‌وه‌ندی پێشمه‌رگه”.
“مه‌سعود بارزانی” سه‌رۆك هه‌رێم كوردستان، ك وه‌ل خوه‌يا كوڕه‌گانێ و شۆماره‌ێگ له خزمه‌یلی و ئه‌و فه‌رمانده‌يل دێرینيشه هان وه‌لێا ك وه‌رجله‌يه له هێزه‌یل پێشمه‌رگه فه‌رمانده بوينه، وه‌وه‌رده‌وامی وه‌دريژایی هێڵه‌یل ته‌ماس وه‌ل داعش گه‌ردێده بان جه‌بهه‌گان.
ئه‌وانه‌گ له بارزانییه‌و نزیكن ئويشن، ئۆپه‌راسیۆن ڕزگار كردن شنگال، ك بارزانی خوه‌ێ له‌تێ به‌شداربوی چه‌ن چركه‌ساتێگ فره مه‌ترسیدار له‌تێ بوی، یه‌كێگ له مه‌ترسییه‌گان ئه‌و وه‌خته‌بوی، ك داعش ته‌قالا كردياد، له جويله‌ێگ بێ ئومێدانه، ئۆتۆمبیلێگ بۆمب ڕێژكرياگ كل بكه‌ێده ئه‌و شوونه‌گ بارزانی له‌تێ بوی. وه‌لێ وه‌رجله ئه‌وه‌گ بڕه‌سێده ئه‌و شوونه، له‌لایه‌ن پێشمه‌رگه‌وه ته‌قنريا‌وه.
بوين بارزانی له مه‌يدان جه‌نگ، كاریگه‌ری یه‌كلاكه‌ره‌وه له‌بان ئه‌و سه‌ربازه‌يله دێرێ ك “مۆنیتۆر” چه‌وێ كه‌فته پێيان. بڕێگ له‌و سه‌ربازه‌يله، باس له چه‌ن بڕیارێگ یه‌كلاكه‌ره‌وه و بوێرانه‌ێ مه‌یدانی كه‌ن ك بارزانی داسه‌ێان. بارزانی وه‌گوره‌ێ شاره‌زایی و ئه‌زموون خوه‌ێ له ئداره‌كردن ئه‌و جووره جه‌نگه‌يله، بڕیاره‌گانێ داس. وه‌بێ ئه‌و نه‌‌كرياد ئه‌و بڕیاره‌يله بدريه‌ن و ئه‌گه‌ر سه‌رچه‌وه‌ێ بڕیار له مه‌يدان جه‌نگه‌گه‌وه نزیك نه‌وياتاد، چوينكه ئه‌و مه‌يدانه چركه وه چركه ئاڵشت بوود.
پاداگری‌كردن ڕابه‌رێگ جوور بارزانی له‌بان ئه‌وه‌گ خود خوه‌ێ له مه‌يدان جه‌نگ بوود، بووده پاساو ئه‌وه‌گ ئه‌ڕاچه سه‌ركرده سه‌ربازی وسیاسییه‌گان هه‌رێم كوردستان ڕوی له مه‌يدانه‌يل جه‌نگ كه‌ن. هه‌ر ئه‌وه‌يش پاساو شه‌هید بوين چه‌نه‌ها فه‌رمانده‌ێ گه‌وراێ پێشمه‌رگه‌س له جه‌نگه‌گه.
هه‌رچه‌ن ئه‌و بارودودۆخه مه‌ترسیداریشه، وه‌لێ كاریگه‌ری پۆزه‌تیڤ ديرێ له پڕه‌وکردن كه‌لينه‌یل ناونی سه‌ركرده و سه‌ربازه‌گانێ. ئه‌و كه‌لينيشه یه‌كێگ بويه له‌و هۆكاره‌يله ك خه‌ریكه عێراقییه‌گان یه‌كڕابوون له‌بان ئه‌وه‌گ هه‌ڵه‌ێگ سه‌ره‌كی وهۆكارێگ گه‌ورا بويه و، لێواكردگه ك داعش وه‌خێرايی بخزيه‌ێده ناو شاره‌یل عێراق. چ له‌ناو سوپاێ عێراق وچ له ڕزه‌یل پێشمه‌رگه، له مانگه‌یل گوزه‌يشته.
س: monitor
ا. ج