له‌ی باوه‌تيشه‌و يه‌كيگ له به‌شداربويه‌يل ئه‌و دانيشتنه باس له‌وه كرد ك بارزانی له‌و دانيشتنه جه‌خت له‌بان پشتگيری بته‌و هيزه‌يل ناوده‌وڵه‌تی كردگه له وه‌خته‌يليگ ك مه‌ردم كوردستان بڕيار سه‌روه‌خوه‌يی بيه‌يد.
مه‌سعود بارزانی له دويا دانيشتنی وه‌ل لايه‌نه‌يل سياسی كوردستان مه‌سه‌له‌ی ئه‌نجامداين راپرسی و ده‌وڵه‌ت سه‌روه‌خوه‌يی كوردستان خسته‌سه ڕوی و داوا له‌ليان كردگه هه‌ر لايه‌نيگ پرووژه‌يگ تايبه‌ت خوه‌ی له‌باره‌ی نه‌خشه‌ڕی وه‌ره‌و سه‌روه‌خوه‌يی و پيكهاوردن غورفه‌يگ هاوكاری پيشكه‌ش بكه‌نه سه‌رۆكايه‌تی هه‌رێم كوردستان تا له‌وه‌ر فكره‌ی گشت هيزه‌يل سياسی گام وه‌ره‌و ئاينده‌ی كوردستان بنريه‌يد.
دياره فريه‌يگ له وڵاته‌يل گه‌وراهيز جه‌هانيش پشتگيری خوه‌يان ئه‌را بارزانی له‌ی باوه‌ته‌و نيشان دانه، ك ئه‌گه‌ر بايگ و مه‌ردم كوردستان هه‌ر بڕياريگ بيه‌ن، ئه‌وان دگان وه‌پی ئه‌نه‌ن.
ته‌نانه‌ت فريه‌يگيش له‌و وڵاته‌يليشه ك له‌ڕی چه‌كه‌و ئه‌را جه‌نگ داعش هاوكاری پێشمه‌رگه كردنه، په‌يام دگانناين وه سه‌روه‌خوه‌يی كوردستانيش دانه‌سه ده‌س بارزانی، وه‌لی ئه‌و مه‌سه‌له هه‌وه‌جه وه نه‌خشه‌ڕی و گامناين سياسيانه ديريد.
له‌ی باوه‌تيشه‌و نوێنه‌ر يه‌كيگ له حزبه‌يل كوردستانی ك به‌شداری دانيشتنه‌گه كرد ئه‌وه ده‌رخست ك بارزانی له‌و دانيشتنه وته‌سه لايه‌نه‌يل سياسی كوردستان هه‌ر لايه‌نيگ و له‌باره‌ی مه‌سه‌له‌ی سه‌روه‌خوه‌يی و ئه‌نجامداين راپرسی ئه‌را ناوخوه‌يی كوردستان و ناوچه‌يل مادده‌ی ١٤٠ پرووژه‌و فكره‌ی خوه‌ی پيشكه‌ش بكا تا له‌بان ئه‌و بنه‌ما غورفه‌ی هاوكاری دامه‌زريه‌يد و كار له‌بان ئه‌و پرووژه‌يله بكريه‌يد ئه‌را سه‌روه‌خوه‌يی كوردستان.
نوێنه‌ره‌گه هه‌ميش وت: بارزانی جه‌خت له‌وه كردگه ك كورد له‌ی قوناغه پشتگيری بته‌و ناوده‌وڵه‌تی ديريد و فريه‌يش له وڵاته‌يل گه‌وراهيز پشتگيری له بڕيار مه‌ردم كوردستان ئه‌كه‌ن و يه‌يش ده‌رخست ك بارزانی له‌و دانيشتنه جه‌خت له‌وه‌يش كردگه ك ئه‌و بڕياريشه هه‌وه‌جه وه ريكخستن ناوماڵ كورد ديريد و هه‌ر لايه‌نيگ و بايه‌سه خوه‌ی وه‌خاوه‌ن مه‌سه‌له‌گه بزانيد تا ده‌س ده‌ره‌كی توانای تێكداين يه‌كڕزی كورد نه‌ياشتوود.
له‌لايه‌ن خوه‌ييشه‌و ئاژانس هه‌واڵ ئه‌نادۆڵ توركييش له راپۆرتيگ تايبه‌ت وه ده‌وڵه‌ت سه‌روه‌خوه‌ی كوردستان نويساگه: هه‌رچوينيگ بوود كورد هه‌ر له كووتايی ئاشكرای ده‌وڵه‌ته‌گه‌ی خوه‌ی ئه‌كاو ده‌وڵه‌ته دوياخرياگه‌گه‌ی كورد ده‌وڵه‌ته دروسكرياگه‌گه‌ی ئنگليز لاوه‌يد.
ج . أ