مونته‌داگه له‌ژێر ناو ”په‌ێاكردن چوارچێوه‌ێگ هه‌رێمایه‌تی تازه ئه‌ڕا په‌ره‌وه‌پێداين و ئاشتی و هاوكاری له‌ناونی كه‌رت گشتی وكه‌رت تایبه‌ت” كاره‌یلێ ده‌سوه‌پێكرد. له‌تێ پانێڵ دريژ ئابووری و، پانێل سیاسی تایبه‌ت ئه‌ڕا قسه‌كردن له‌باره‌ێ كێشه‌یل ناوچه‌گه وه‌ڕێه‌و‌بريه‌ێد. وه‌تایبه‌ت كێشه‌یل عێراق وسوریا.
سایت جه‌زیره وه بایه‌خه‌و باس له‌به‌شداری سه‌رۆك هه‌رێم كوردستان له‌و مونته‌دا كردگه‌و، نويساس:” له‌ناو سه‌ركرده‌يل سیاسی،هه‌ریه‌ك له سه‌رۆك مسر عه‌بدولفه‌تاح سیسی، سه‌رۆك فه‌له‌ستین مه‌حمود عه‌باس، سه‌رۆك هه‌رێم كوردستان مه‌سعود بارزانی به‌شدارن، بێجگه له ئه‌یاد عه‌لاوی جێگر سه‌رۆككۆمار عێراق”.
له‌میانه‌ی وتارێگ له‌سه‌ره‌تاێ كۆڕبه‌نده‌گه، پادشاێ ئۆردن “عه‌بدوڵای دويه‌م” جه‌خت له‌وه كرده‌و ك ناوچه‌گه له‌قه‌یرانه‌یل ده‌رباز نيه‌ود، ئه‌گه‌ر پشت نه‌وه‌سێده خاڵه‌يل وه‌هێز خوه‌ێ. دووپاتیشیه‌و كرد ك: ” گرژی و ئاڵۆزییه هه‌رێمایه‌تییه‌گان، له‌ئامانجه‌يلمان سه‌ردمانه‌و نيه‌كه‌ن”.
پادشاێ ئۆردۆن له‌ئه‌نجامداين مونته‌داگه له‌وڵاته‌گه‌ێ پێشوازی كرد. له‌بان ئه‌و باوه‌ڕيشه بوی ك:” سووده‌يل ئه‌و كاره ته‌نيا ئه‌ڕا ئۆردۆن نييه، ئه‌را گشت ناوچه‌گه‌س”.
وتیش: ” وه‌خت ئه‌وه هاتگه هاوبه‌شایه‌تی تازه‌ێگ له‌ناوبه‌ێن كه‌رت تایبه‌ت و گشتی دروس بوود”وه‌ئاماریش وت:” قه‌رز ئۆردۆن داوه‌زیاس ئه‌ڕا 15% . ڕێژه‌ێ گه‌شه‌يش ڕه‌سيه‌سه 3% و چه‌وه‌ڕێ كريه‌ێد بڕه‌سێده 4%. ئه‌وه‌يش ئاماژه‌ێ پۆزه‌تیڤه”.
پرۆژه‌يل نه‌ته‌وه‌یی
له‌لاێ خوه‌یه‌و، سه‌رۆككۆمار مسر وتارێگ پێشكه‌ش كردو،وت: ” خول ئاينده‌ێ مونته‌دا له‌مسر وه‌ڕێه‌و چوود، ك له‌مانگ ئایار/2016 وه‌رپاكريه‌ێد. پانێله‌گانیشێ سه‌باره‌ت وه‌كێشه‌یل ڕووژهه‌ڵات ناوین و، باكوور ئه‌فریقاس”.
باس له‌وه‌يشكرد ك وڵاته‌گه‌ێ له‌بوار خاستره‌وكردن ئابووری مسر گامه‌يل خاسێگ ناس. له‌ڕێ ئه‌نجامداين چه‌نه‌ها پرۆژه‌ێ نه‌ته‌وه‌ییه‌و. جوور: نۆكه‌ند سویس نوو. سێگووشه‌ێ ته‌ڵايی. په‌ره‌وه‌پێداين ڕۆخه‌یل باكوور، پرۆژه‌ێ ڕووژهه‌ڵات عوینات، دروسكردن پرۆژه‌ێگ لۆجستی ئه‌ڕا هه‌ڵگردن گه‌نم”.
چه‌وه‌ڕێ كريه‌ێد سه‌رۆك هه‌رێم كوردستان به‌شدارییگ كارا بكا له پانێل و وتوێژه‌يل مونته‌داگه، بارودۆخ هه‌رێم كوردستان و ئاسووه‌یل ئاینده بخاده ڕوی.
مونته‌داێ ئابووری جه‌هان، ڕێكخرياگێگ ناوده‌وڵه‌تی سه‌روه‌خوه‌ێه، ساڵ 1971 دامه‌زرياس، كارئه‌كا ئه‌ڕا خاستره‌وكردن بارودۆخ جه‌هان له‌ڕێ هاوكاری كردن ناوبه‌ێن هه‌ردو كه‌رت گشتی وتایبه‌ت. له‌تێ سه‌ركرده‌يل گرنگ جه‌هان به‌شداری كه‌ن له داناين ئه‌جێنداێ سیاسه‌ت هه‌رێمایه‌تی و ناوده‌وڵه‌تی.
ساڵانه له‌شار “داڤۆس” سویسرا كۆنگره‌گه به‌سريه‌ێد، يه 9یه‌مین جاره كۆنگره‌گه له ئۆردۆن به‌سريه‌ێد. دیارترین ته‌وه‌ره‌یل كۆنگره‌گه يانه‌ن: ” پیشه‌سازییه‌يل و ڕكابه‌ری به‌رهه‌مهاوردن، وه‌كارخستن، حكوومه‌ت و دروسكردن دامه‌زراوه‌گان، هاوكاری ئابووری له‌ناوچه‌گه”.
بێجگه له‌وه‌يش له‌ی كۆڕبه‌نده، باس له‌بڕێگ له‌كێشه‌یل ناوچه‌گه كريه‌ێد، وه‌تایبه‌تی كێشه‌یل خوه‌ندن، وه‌گه‌ڕخستن جوانه‌يل، ژێرخان ستراتیژی جه‌هانی”.