شەفەق نیوز/ وەگورەی ئامار فەرمی لەلایەن وەزارەتی پلانسازی عراق، زیاتر لە نیمەی دانیشتوەیل پارێزگای موسەنا لات و نەدارن، ک ٥٢٪ لە خەڵک ئەو شارە زیان نەداری وەخوەیان دوینن، و هەمیش پارێزگایل دیوانیە زیاتر لە ٤٨٪ ، و میسان زیاتر لە ٤٥٪.
رووبەر پارێزگای موسەنا رەسێدە ٥١٤٠٢ کێلومەتر چوارگووشە، واتە ١١،٩٪ لە بەش عراقە، و ١٢ کەرت ئیداری و ٥ قەزا دیرێد.
شایستە داراییەیلە
لەی باوەتە،حامد حەسانی جیگر پارێزگار موسەنا ئەرا ئاژانس شەفەق نیوز وت: وەداخەو ک رێژەی نەداری وەگورەی وەزارت پلانسازی لە ٥٢ لەسەد زیاترە، و لە ساڵەیل گوزەیشتە ئەو شایستەیل داراییە ک بڕیار دەریان لەلایەن حکومەت فیدڕالی جیوەجی نەکریان.
حەسانی وتیش؛ موسەنا خاوەن قەزا و ناحیەیل دویر دویریگە، ک خوەی دوویەم گەورەترین پارێگاس و هەڵمەت ئاوەدانکردنەوەی گەورە لە ریوبانەیل خوازێد.
کارەساتیگ ئابووری
لەلاییگ تر پسپۆر ئابووری جەلیل لاکی وت: بەرزەوبوین رێژەی هەژاری لە عراق وە تایبەت لە ناوڕاس و باشوور نوقڵانەی کارەسات گەورەیگ دەێد.
لامی نشان دا ک زیاتر لە نیمەی خەڵک ئەو پارێزگایلە خانە خوار ئاست هەژاری، و داوا لە حکومەت کرد ریکارەیل ئابووری زوییگ ئەرا چارەکردن ئی قەیران ئابووریە جیوەجی بکەێد.
کۆچبردن و کار
لەلای خوەییش ئەحمەد، یەکیگە لە خەڵک شار سەماوە ئەرا ئاژانس شەفەق نیوز داد کرد و وت: دەرفەت کار لە پارێزگای موسەنا نییە، و منیش دەسفروەشی کەم لە کەربەلا.
ئەحمەد دیاری کرد ک لاتی و نەداری ناچارم کرد خیزانەگەم بیلمە گی تا بتوێنەم نانیان لە دویرەو درارم، چوینکە دەرفەت کار لە موسنا پەیا نێەوود.