شەفەق نیوز/ کوشتن حەسەن نەسرولڵا ئەمیندار گشتی حزبولڵای لوبنان، پەیامیگ ئیسرائیل ئەرا عراق و ئیران و یەمەن و دەوڵەتەیل وەرخودان ئیسلامی داشت، کە ئویشێد: حکومەت نیتینیاهو "بانك ئامانجەیل" دیرێد، و توەنێد بڕەسێد ئەرا هەر کەسیگ بخوازێد، بە وەختیگ دەوڵەتەیل وەرخودان ئیسلامی دووپات کەن کە ئەوەسا وەردەوام بوون لە رویوەڕویبوین قەوارەی ئیسرائیل.
وەرانوەر ئەوە، کازم فەرتوسی، قسەکەر کەتائیب سەید شوهەدا وت: ئمڕوو چشتیگ ترەک گاڵ ئیمە دەێد تا جەنگ وەرد دوژمن بکەیمن، کە تووڵەسەنین نەسرولڵاس، ئەراوە جەنگەگە سەختترەو بوی، و و دەس ئەرا گشت چشتیگ لەناوی وازە، و پەلامارەیل نیەوسیەنەو، بەڵکم زیایەو بوون.
فەرتوسی لە قسەیلی ئەرا ئاژانس شەفەق نیوز وتیش: وەڵامدان ئیسرائیل وەگورەی رەوشەیل هونەری ئەرا هەر پەلاماریگ تیەێد، و چەوەڕی نەخشەی نوو ئۆپراسیۆنەیل کەیمن.
کوشتن حەسەن نەسرولڵا تاوانیگ گەورەس، جیاوازی گەورەیگ لە نووڕین جەنگەگە وەرد قەوارەی زایۆنیستی دروس کرد، و ئەوەگ لە شوینی تیەێد پابەند بوود وە ریسگایل جەنگ، ئەرا تەواوکردن ریەگە، وەتایبەتی حزبولڵا ری وەرەونواچگن گردەوەر، وەگورەی قسەی عەبدولجەلیل زوبەیدی، توێژەر سیاسی.
زوبەیدی لە قسەیلی ئەرا ئاژانس شەفەق نیوز وت: شەهیدبوین نەسرولڵا بیگومان زەرەدیگ گەورەس وە وەرخودان ئیسلامی و گەلەیل عەرەب، کە پشت وە هەڵوێست و ئازایی لە سەرکردایەتی بزووتنەوەی وەرخودان بەسیان، لە رویوەڕویبوین قەوارەی ئیسرائیل.
زوبەیدی داوا لە گەلەیل عەرەب کرد هەڵویستیگ لەی وەختە بیاشتوون، پەیام زەرەدەگە گەورەس، و تەنیا لەلای حزبولڵا و لوبنان نەوسیاس، بەڵکم هابان گشتی، ئەراوە، بایەسە دەنگیگ بوود بڕەسێدە دەنگەیل خوەرئاوا و ئیسرائیل نە ئی تاوانە جیوەجی کردن.
لەی مەوقە، مەهدی عەزیزی، وەڕیەوبەر دامەزریای نووڕین نوو ئەرا توێژینەوەیل و راگەیانن لە تەهران، وت: کوشتن نەسرولڵا پەیامیگ ئیسرائیلە ئەرا عراق و ئیران و یەمەن و وەرخودان، کە توەنیەێد ئەرا هەر ئامانجیگ بڕەسێد.
عەزیزی لە قسەیلی ئەرا ئاژانس شەفەق نیوز وت: وەرخودان پشت وە تەنیا سەرکردایەتی نیەوەسێد، وتیش: راسە کەسەیل گەورەیگ لەدەسمان چگ، وەلێ کۆتایی وە جیهاد وەرخودان نەهاتیە، وەلێ ئەوەسە وەرخودان ئیسلامی دژوە دوژمن ئیسرائیلی زیایەو بوود.
ئەگەریش بیلیمن ئیسرائیل هەرچەگ خوازێد بکەێد، خو وەرەو عراق و ئیران و یەمەن و ئەو دەوڵەتەیلیش جویلە کەێد، وتیش؛ هەزار نیتینیاهو نەخشەیگ لە نەتەوە یەکگرتگەیل بەرزەو کرد، ئی دەوڵەتەیلە لەناوی بوی، کە وەپییان وت: تەوەر شەڕ.
عەزیزی لە کۆتایی قسەیلی دووپات کرد کە وەرخودان هەر وەردەوام بوود، و هاوکیشەی نوویگ لە ناوچەگە بوودر وە رویوەڕویبوین ئیسرائیل تا بوودە نواگیریگ ئەرای.
هەر ئەوەیش وەلایەن حەسەن ئەولیان توێژەر سیاسی لە لوبنان، دووپات لەلی کریا، کە وت: مۆڕاڵ وەرخودانەیل ئەوەسا وەردەوام بوود، و لە مەیدان زیایەو بوود، و ئەوەسا وەڵامدان زیانبەخشیگ نشان دەن، کە توانا و ئامادەکاری وەرخودان بەرزە.
ئەولیان لە قسەیلی ئەرا ئاژانس شەفەق نیوز وت: حزبولڵا کەسیگ نییە، بەڵکم ری و رینمایگە وە میراتی ئاینی بەسیاسەو، و ئی تاوانە باجەگەی مەگەر نەمان ئیسرائیل بوود.
لەلای خوەییش، د. حەکەم ئەمهز پسپۆڕ کاروبار هەرێمی و ناودەوڵەتی وت: نەسرولڵا کەسیگ جیاواز بوی و گشتی دووسی تواست، و کاریزمای بیوینە داشت، وەگەرد دووسی و وەفاداری و بڕوایی، ئەراوە نەوینی کاریگەرە.
ئەمهز لە قسەیلی ئەرا ئاژانس شەفەق نیوز وت: موجاهیدەیل حزبولڵا حزبوڵا لەڕی خودا جەنگ کەن نەک لەڕی کەسیگ ترەک، ئەراوە لەبان ری نەسرولڵا و هویر و رینمایی مینن.
رووژ شەممەی گوزەشتە، حکومەت عراق، پرسەی ٣ رووژ ئەرا کوشتن حەسەن نەسرولڵا ئەمیندار گشتی حزبولڵا راگەیان.
عەلی خامەنەئی ریبەر باڵای ئیران، رووژ شەەمە، پەنج رووژ پرسە ئەرا کوشتن حەسەن نەسرولڵا راگەیان، کە وەپی وت؛ کەسایەتییگ مەزنە، وتیش؛ بەرەی وەرخودان فەرماندەی ناودیاریگ لەدەسدا، و حزبوڵا ریبەریگ بیوینە لەدەسدا، وەلێ بەرکەت ئەو جیهادیە کە دەیان ساڵ وەردەوام بوی قەت گوما نیەوود.
خامەنەئی وتیش؛ ئەو بنەڕەتە کە لە لوبنان دانا، و دادەی ئەو ناوەندەیل وەرخودان، وە چگن ئەو گوما نیەوون، بەڵکم وە خوین و ئەو شەهیدەیل ئی رویداوە بەرزەو بوود، و ئەو پەلامارەیلە کە لەلایەن بەرەی وەرخودان ئەرا لاشەی رژیم زایۆنیستی ئەوەسا وەشننەی ئاشکراترەو بوون، سروشت بەد قەوارەی زایۆنیستی لەی رویداوە سەرکەفتی نەوی.
رووژ شەممەی گوزەشتە، حزبولڵای لوبنان پرسەی حەسەن نەسرولڵا ئەمیندار گشتی حزبەگە راگەیان، وەیەوە دووپات لە راگەیانن سوپای ئیسرائیل کرد لەی باوەتە.
رووژ شەممە، ئەفیخای ئەدرعی قسەکەر سوپای ئیسرائیل، یەکەم لایەن بوی کە کوشتن حەسەن نەسرولڵا لە کورزەگەی رووژ جمعه راگەیان، کە دەورگرد باشوور بەیروت کردە ئامانج.