شه‌فه‌ق نيوز/ له ئاوايى "عومه‌ركان" له خوه‌رهه‌ڵات موسڵ، كه‌مينه‌يگ له تايفه‌ى شه‌به‌ك سه‌ركه‌فتن له مه‌ندنه‌وه‌يان له‌ژيان وه دريژايى دوساڵ، ك ريكخرياگ ترۆريستى داعش له‌وه‌ر هووكاره‌يل ئايينى ئه‌گريده‌يان ئامانج.
مه‌ندنه‌وه‌ى ئه‌وانه ئه‌چێده‌و ئه‌را خاسى نه‌ديم سلێمان حه‌سه‌ن پياو ئايينى و ئيمام ئاوايه‌گه، ك ئه‌را ماوه‌ى 20 ساڵه داوا له رووڵه‌يل ئاوايه‌گه ئه‌كا بچنه ناو مه‌زه‌و سنى، ئمجا دوياى زاڵبوين داعش له‌بان ئه‌و ئاوايه له حزه‌يران 2014، يه‌كسه‌ر مه‌ردم ئه‌وو ئاواييه زانستن ك چاره‌نويس خراويگ چه‌وه‌ڕييان ئه‌كا، له‌يرا حه‌سه‌ن ده‌سكردن چه‌سپانن پلانه‌گه‌ى جوور ئه‌وه‌گ رووژنامه‌ى لۆمۆند فره‌نسى باسى كرد.
وه‌رجه ره‌سين داعش، ئاوايى عومه‌ركان نزيكه‌ى 500 ئاوايى له تايفه‌ى شه‌به‌ك له‌تى بوى، ك يه‌يش كه‌مينه‌يگ عراقيه‌و له ده‌يان ئاوايى تر له هامارى نه‌ينه‌وا وجوود ديرن له ناوچه‌يل موسڵ.
له‌ى باوه‌ته‌و، حه‌يده‌ر عه‌بدوڵڵا ك يه‌كيگه له مه‌ردم نيشته‌جى ئه‌و ئاوايه‌و ناچار بوى له ناوڕاس مانگ ته‌شرين دويه‌م 2016 باێد وه‌ره‌و سه‌ربازگه‌ى خازر له كوردستان وت: دوياى ئازادكردن ئاوايه‌گه له‌ى دوياخره له‌ژير ده‌سڵات داعش مه‌ردمانيگ ئويشن ئيمه كورديم و بڕيگيش ئويشن عه‌ره‌بيم، وه‌لێ مه‌سه‌له‌گه وه ته‌مامى ئه‌رايان ئاشكرا نيه و ئنتماى ئايينى ئيمه نازانن.
كه‌مينه‌ى شه‌به‌ك وه زووانه‌يل كوردى و عه‌ره‌بى قسه ئه‌كه‌ن، بيجگه شيوه‌زووان گۆرانى و بڕيگ له‌ليان خوه‌يان وه شيعه تاريف ئه‌كه‌ن و بڕيگيانيش وه سنى، وه‌ل ئه‌وه‌يشا ئنتماى ئايينى ئه‌يانه جياجياس وه گووره‌ى كاريگه‌رى ده‌ره‌كى و ئه‌و بارودوخه ك له‌تى ژيه‌ن، وه‌لێ ميراته رووشنهويريه‌گه‌يان له بنه‌ماوه رووحانيه‌و په‌يوه‌سه وه مه‌زه‌و شيعه.
له ڕووژه‌يل يه‌كه‌م زاڵبوين داعش له‌بان ئاوايه ك هانه نزيك شوونه‌وار نه‌مروود و مێژووى ئه‌چێده‌و ئه‌را سه‌رده‌م ئاشوورى، يه‌كسه‌ر 27 كه‌س له رووڵه‌يل ئه‌و تايفه گوما بوين.
حه‌يده‌ر عه‌بدوڵڵا ك ته‌مه‌نى 36 ساڵه، ئويشێد: ئه‌و 27 كه‌سه له‌ناكاو گوما بوين و دى چه‌ومان وه‌پيان نه‌كه‌فت، دوياى ئه‌وه‌يش ريكخرياگ داعش ئامووزاگه‌م و هاوسه‌ره‌گه‌م كوشت وه تومه‌ت ئه‌وه‌گ شيعه‌ن.
ئيمام ئاوايه‌گه ئويشێد: وه‌ختى ك داعش هات، وتنه‌پيمان ئيوه شه‌به‌كين، ماناى ئه‌وه‌سه ئيوه شيعه‌ين، بڕيگ خيزانيش بڕيار دان بهه‌يوان له ناوچه‌گه‌و باقى مه‌ردمه‌گه‌يش ناچاربوين هه‌رچى كتاوه‌يليگه ك چاپ ئيران وه‌پيانه‌و بوى بدڕن و ره‌سمه‌يل حسه‌ينى بسزنن، دى وه‌ى جووره تويه‌نستن له ئاوايه‌گه بميننه‌و.
يه‌يش روخسار ئه‌و پلانه بوى ك شێخ حه‌سه‌ن دايناوێد و قه‌ناعه‌ت وه چه‌كداره‌يل داعش كرد ك مه‌ردم ئى ئاوايه سنى مه‌زه‌ون و ئويشێد وه‌تمه‌سه‌پيان من سنييم و مه‌ردم ئاوايه‌گه‌ميش گشتيان سنيين.
شايه‌ت شێخ حه‌سه‌ن قسه‌گه‌ى راسه ك وتگه خوه‌م و مه‌ردم ئاوايه‌گه سه‌ر وه مه‌زه‌و سنييم و شايه‌تيش له‌وه‌ر ئه‌وه كردگه تا مقه‌يه‌تى له رووڵه‌يل ئاوايه‌گه‌ى بكاو ژيانيان نه‌كه‌فێده مه‌ترسى له جه‌نگيگ ك هيمان ئاقبه‌تى ديار نيه.
له‌يرا بڕيگ له مه‌ردمان سه‌ر وه مه‌زه‌و شيعه سوپاسگوزارى له شێخ حه‌سه‌ن كردنه، ئه‌ويش له‌وه‌ر ئه‌وه‌گ دروو وه‌ل داعش كردگه‌و ژيان ئه‌و شيعه مه‌زه‌وه‌يله قورتار كردگه.
ئه‌و شێخيشه ك ته‌نيا مزگفتيگ له ئاوايه‌گه دروسكردگه وه‌رجه 20 ساڵ، وتگه: ئه‌يانه چوين بوينه‌سه شيعه، چوينكه من له‌يوا بزانم گشت ئه‌و مه‌ردمه له‌يرا ژيانه سنى بوينه و ته‌نانه‌ت ئه‌و جايه‌ڵه‌يليشه ك داعش كوشته‌يان سنى بوينه.
ئيمام ئاوايه‌گه بڕيگ له‌و جايه‌ڵه‌يله ك سه‌ردان شار نه‌جه‌ف كردنه وه ئه‌وه تاريف كردوێد ك ته‌نيا له‌وه‌ر گه‌شتكردن و خوه‌شگوزه‌رى چينه نه‌ك له‌وه‌ر شيعه‌يى، چوينكه وه‌قسه‌ى خوه‌ى ئه‌وانه له بنه‌ڕه‌ته‌و له‌ى مه‌سه‌له نازانن.
شكار جه‌ميل ئويشێد: ئيمه ترسيايمه له شان ئاوايه‌يل تر بمينيم و بايه‌س بوى له بانمان ديوار ده‌ور ئاوايه‌گه بكرديايم، وه‌لێ شێخ حه‌سه‌ن گاڵته‌ى هاتگه وه‌ى فكره‌و خه‌ستگه وه‌پى.
ئمجا له‌وه‌ر به‌شداريكردنيش له جه‌نگ دژ داعش، مه‌ردم ئاوايه‌گه وه‌تايبه‌ت شه‌به‌ك ده‌سكردنه دامه‌زرانن دو گرووپ چه‌كدار، يه‌كيگيان له‌لايه‌ن ده‌سڵاته‌يل كورديه‌و پشتگيرى كرياو ئه‌واكه‌يش ده‌سڵاته‌يل شيعه، ئمجا ئه‌وانه‌گ له‌لايه‌ن شيعه‌و پشتگيرى كريان ده‌سكردنه به‌رزه‌وكردن ئاڵاى تايفه‌ى شيعه له‌بان ئه‌و ئاوايه‌يله ك هيزه‌يل سوپاى عراقى ئازاديان كرد و له‌وانه‌يش ئاوايى عومه‌ركان.