پایته‌خت عراق كه‌فیگه وه‌رچه‌و، هیمان هه‌ر مه‌ردم شاره‌گه دڵیان خوه‌شه وه‌ئه‌وه‌ك شادى و به‌خته‌وه‌رى خه‌ریكه تیه‌یگه‌وه‌و مه‌ردمان عراقى فره خوه‌شحاڵن وه‌و ده‌سپیشخه‌رى یا موبادره‌ى (كاك مه‌سعود بارزانى) سه‌رۆك هه‌رێم كوردستانه ك تویه‌نست دویاى هه‌یشت مانگ كیشه‌و ناكووكى له‌ناونى پارته‌یل و لایه‌نه‌یل عراقى جاریگ تر گشتیان له‌بان یه‌ك هه‌ڵویست گرده‌و بكاو خوه‌شى و شادى بخه‌یگه دڵ گشت تاكیگ و بووگه بنه‌مایگ ئه‌را خوه‌شگوزرانى و ئاوه‌دانى و بنبڕكردن براكوشى و تیرۆر.
هه‌ر له‌وه‌ر ئه‌و هه‌ڵویست پڕ له‌ئاشتیانه‌ى سه‌رۆك هه‌رێم كوردستانه، جایه‌ڵ جوانه‌یل فره‌یگ له كورده‌یل فه‌یلى بڕیار ئه‌وه دان له‌ڕووژه‌یل عه‌ید قوربان ئاهه‌نگیگ وه‌و بوونه‌وه ساز بكه‌ن و ده‌یه‌ها جار له‌و ئاهه‌نگه هه‌ڵهه‌ڵه‌ى خوه‌شى ئه‌را جه‌ناب كاك مه‌سعود بیه‌ن وه‌ل گرمه‌ى سازده‌وڵ و جوانترین هه‌ڵپه‌ركه‌ى كوردى پیشكه‌ش بكه‌نه گشت ئاماده‌بویه‌یل له‌كورد و عه‌ره‌ب و پیكهاته‌یل تر له‌دویرگه(جه‌زیره)ى به‌غدا، ك چه‌ن ساڵیگه ئه‌و دویرگه خوه‌شى له‌یوا وه‌خوه‌یه‌وه نه‌یه‌و ته‌نانه‌ت وه‌رپرسه‌یل و كارمه‌نده‌یل جه‌زیره‌گه‌یش خوه‌شحاڵى خوه‌یان نیشاندان و ئومیده‌وار بوین هویچ وه‌ختى پاى كورد له‌وشوونه نه‌وڕیه‌یگ و خه‌یر و به‌ره‌كه‌ت وه‌ل خوه‌یانا بارن و بیجگه ئه‌وه‌یش ده‌س یارمه‌تى و هاوكارى ئه‌را جایه‌ڵ جوانه‌یل كورد فه‌یلى دریژ كردن له‌و ئاهه‌نگ و خوه‌شیه.
له‌ى باوه‌ته‌وه جایه‌ڵ جوانه‌یل فه‌یلى وه‌رجه سازكردن ئه‌و ئاهه‌نگه په‌یوه‌ندى كردنه ده‌زگاى شه‌فه‌ق له‌وه‌ر خاتر ئه‌وه‌ك ئه‌و هه‌ڵویست پڕ له‌شادى خوه‌یانه له‌ڕى ره‌سانن یا ئعلام شه‌فه‌قه‌وه بڕه‌سیه‌یگه كورده‌یل به‌غدا تائاماده‌ى ئه‌و هه‌ڵپه‌ڕگه‌ى گه‌رم خوین گه‌رمه‌یله بوون و جویر هه‌واڵیگ له‌سایت شه‌فه‌قه‌وه په‌خشه‌و بكریه‌یگ ، ئمجا خوه‌شبه‌ختانه كامیراى(شه‌فه‌ق) له‌بان داواكارى ئه‌و ئه‌زیزه‌یله له‌جه‌زیره‌ى به‌غدا ئاماده بوى له‌ئیواره‌ى ڕووژ شه‌ممه‌ى دویاڕووژ عه‌یدو زیاتر خوه‌شى خسته دڵ جایه‌ڵ جوانه‌یل و كه‌شیگ كورده‌وارى و پڕ له‌گرمه‌ى سازده‌وڵ و چووپى كیشان دروس بوى.
یه‌كیگ له ئاماده‌بویه‌یل وه‌ناو (سه‌لام ئه‌حمه‌د) وه سووزیگ جوان كورده‌واریه‌وه خوه‌شحاڵى خوى نیشانداو ئومیده‌وار بوى هویچ وه‌ختى جایه‌ڵ جوانه‌یل كورده‌یل فه‌یلى بیبه‌ش نه‌ون له‌خوه‌شى و هه‌میشه كه‌ش و هه‌واى گونجیاگیگ ئه‌ڕایان هه‌ڵكه‌فیگ و بتویه‌نن باوه‌ڕ كوردایه‌تى خوه‌یان نیشان بیه‌ن و ناهمى نه‌ون له‌ژیان كوردانه‌و هه‌ڵویست راسه‌قینه‌ى خوه‌یان، دویاى ئه‌وه‌یش كاك سه‌لام ئه‌حمه‌د جویر هاووڵاتییگ كورد فه‌یلى باس له‌وه كرد وت: ئیمه وه‌دریژایى ساڵه‌یل فره‌یگ وه‌تایبه‌ت له‌وه‌خت رژیم وه‌رین هویچ ئازادییگ نه‌یاشتیمنه‌و نه‌تویه‌نستیمنه ته‌نانه‌ت وه‌زوان خوه‌مانیش له‌به‌عزه شوونه‌یلیگ قسه بكردایم و داخ فره‌یگ كیشایمنه‌سه دڵ و ئیسه‌یش ئومیده‌واریم و چه‌وه‌ڕى ئه‌وه كه‌یم هه‌قه‌یل زه‌فتكریاگمان بایگه‌وه‌و حكوومه‌ت كوردستان له‌ى باوه‌ته‌وه ده‌سپیشخه‌ر بووگ ئه‌را چاره‌سه‌ر كیشه‌یل كورد فه‌یلى.
هاووڵاتییگ تر وه‌ناو(ئاراس ئه‌میر) وه‌شاواز جوان و ده‌نگ به‌رز و پڕ له‌سووزیگه‌وه له‌وه‌رچه‌و ئاماده‌بویه‌یل ئاهه‌نگه‌گه‌و له‌ڕى مایكرۆفونه‌وه چه‌ن جاریگ وت(بژیه‌ى كورد و كوردستان، به‌رز بووگ په‌رچه‌م كوردمان). وه‌لى وه‌ل ئه‌وه‌یشا گشت جاریگ وتیان خوه‌زگ ئى خوه‌شیه تا سه‌ربووگ و خه‌وه‌یلمان بایگه‌دى.
مه‌ردمان فره‌یگ له‌ڕى ئه‌و ئاهه‌نگه‌وه تویه‌نستن راز دڵ خوه‌یان ئه‌را په‌یامنێر شه‌فه‌ق هه‌ڵڕشنن و له‌وانه‌یش چه‌ن خیزانیگ كورد ئاره‌زوومه‌ند بوین وه ئه‌وه‌ك ده‌نگ خوه‌شى كورده‌یل هه‌میشه به‌رز و بڵین بووگ و سه‌ركرده‌یل كورد سه‌ربه‌رز بوون ئه‌را دروسكردن ئاشتى و گونجیان له‌ناونى گشت عراقیه‌یل و هه‌میشه ده‌سپیشخه‌ر بوون ئه‌را نیشانداین ڕى خه‌یر و چاره‌سه‌ر و ڕیكخستن پیكهاته‌یل جووراوجوور له‌ناو یه‌كترى.
وه‌ى جووره له‌دویاى چه‌نه‌ها ساڵ جایه‌ڵ جوانه‌یل كورد فه‌یلى له‌به‌غدا وه‌ل گرمه‌ى سازده‌وڵ و هه‌ڵپه‌ڕكه‌ى جووراو جوور كوردیا تویه‌نستن چالاكى جوانیگ نیشان بیه‌ن له‌دویرگه یا جه‌زیره‌ى به‌غدا ك چه‌ن ساڵیگه ئه‌و شوونه فه‌رامووش كریاگه، چوینكه له‌لایه‌ن وه‌زع ئه‌منیه‌وه دڵخوه‌شى نه‌یاشت مه‌ردم ڕوى له‌لى بكه‌ن، وه‌لى ئیسه له‌سایه‌ى خوداو هه‌وڵ و ته‌قلاى سه‌رۆك هه‌رێم كوردستان له‌چاره‌سه‌ركردن ناكووكیه‌یل ناونى لایه‌نه‌یل عراقى، حكوومه‌ت به‌غدایش تویه‌نست كۆنترۆڵ وه‌زعه‌گه بكاو سه‌رله‌نوو ئارامى باریگه‌وه ئه‌را ئه‌و شوون گه‌شتیاریه.
 |
 |
 |
 |