له وه‌رده‌سی بوین بوه‌یگ له‌وانه‌یش ئاژه‌ڵ و وڵاخ له زورم كاره‌یل وه تایبه‌ت له ژیان ئاوای نشینی ته‌قالا كردگه ك وه‌شیوه‌یگ بی وینه كاره‌یلی بوه‌یگه‌ڕی و خوه‌ی وه‌پیانه‌و شه‌كه‌ت بكه‌یگ وه تایبه‌ت له وه‌ڕیه‌و بردن ژیان رووژانه‌یان جوور كشتوكاڵ وئاژه‌ڵ و په‌له‌وه‌ر وه‌خاوه‌ن كردن . هه‌رچه‌ن له ژیان مه‌ردم ئاوای نشین وه‌رجله هاتن ئامێره‌یل و كه‌ره‌سه‌یل ئیسه كاره‌یلیان وه زه‌حمه‌ت و وه‌شه‌كه‌تی فه‌ره‌یگ ئه‌نجام دیان . یه‌كیگ له‌و كاره‌یله ك جفتیاره‌یل ئه‌را ژیان رووژانه‌ی ژیانیان و داهات ساڵانه‌یان پشت وه‌پی به‌سیان كاڵین گه‌نم و جویه و زوڕات بو و كاڵین ئه‌و دانه‌وێڵه‌یلیشه نیاز وه كار زوی له وه‌خت دیری ، یه‌عنی بایه‌د وه‌رجله هه‌ركاریگ زه‌ویه‌گه ئاماده تویه‌م وه‌شانن بكریه‌ی و ئه‌و وه‌ختیشه ئه‌را جفت كردن سوود له وڵاخ و چوارپا جوور قاتر و ئه‌سپ و گا
وه‌رگردیاد . ئمجا ئه‌را جفت كردن ئامێریگ وه‌كار بردیاد ك وه‌چه‌ن تیكه دار وه‌یه‌كه‌و به‌سیاده‌یان و زهوی وه‌پی جفت كردیاد كه ئه‌ویش گاواسن بوی. ئه‌و گاواسنه ك وه‌دار دروس كریاویگ گشت شیوه‌یل جفت كردن وه‌پی ئه‌نجام دیان . ئمڕوویش ك تازه‌ترین ئامێره‌یل كشتوكاڵ هاتگه‌سه كوردستان وه‌لی فه‌ره جار دوینیم ك جفتیاره‌یل له به‌عزی شوینه‌یل هه‌ر له‌و ئامێر كویه‌نه سوود به‌یگ وه‌تایبه‌ت له‌و شوینه‌یل سه‌خته ك ئامێره‌یل تازه جوور تراكته‌ر توانای چگن ئه‌ڕایان نه‌یرن جوور لاپاڵ جه‌وه‌ڵه‌يل و ناو دوڵه‌یل ته‌نگ و دویرده‌س ك جاده ئه‌رایان دروس نه‌كریاگه . بیگومان وه دڵنیاییه‌وه رووژیگ گاواسن چویی بیجگه له‌و سوود و قانجازه ك وه مه‌ردم ئاوای نشین ره‌سانیاد وه‌داهێنان گرنگیگیش وه‌حه‌ساو هاتیاد وه‌تایبه‌ت ئه‌را ئه‌و كه‌سه‌یله ك عه‌قڵیان وه‌بان چشتیگ له‌و چه‌شته‌یله شكیاگه . وه‌ڕاسی وه‌ختی ئمڕوو دیمه‌ن زهوی كاڵین وه‌و ئامێر كویه‌نه له به‌عزی شوین دوینیم دڵخوه‌ش بویمن وه‌ی ئامێره ك باوگ و باپیره‌یلمان دروسی كردنه و بیجگه ئه‌وه‌یش گاواسن چویی نموونه‌ی زینگیگ مێژوویه له ژیان كورده‌واری ملله‌ته‌گه‌مان.