خوه‌راك له‌ژينگه‌ی سروشتی له‌ئه‌نجام وه‌كارهاوردن وه‌سيله‌يل نه‌هيشتن مه‌ل ومووری و په‌ين كيمياوی له‌كشتوكاڵ پيس بووگ ، له‌وه‌ر ئه‌وه ئه‌و مادده‌يله وه قه‌يريگ له به‌رهه‌ميل كشتوكاڵ گرده‌و كريه‌ن ك شايه‌ت زه‌ره‌د ئه‌را ئاده‌ميزاد و گيانله‌وه‌ره‌يل تر داشتووگ ، يه‌يش له‌وه‌ر جی وه‌جی نه‌كردن رينمايه‌يل سه‌ڵامه‌تی و ماوه‌ی دڵنيايی له‌وه‌خت وه‌كارهاوردن روی ده‌يگ ك گره‌نتی كه‌مه‌وبوين نسبه‌ی ئه‌و جووره مادده‌يل ژه‌هراويه له‌خوه‌راك به‌خشيگ ئه‌را نسبه‌ی خواست . ئمجا له‌يرا چه‌ن هووكاريگ پيسبوين خوه‌راك خه‌يمنه روی و له‌وانه‌يش :-
١- خراو دروسكردن خوه‌راك : وه‌گووره‌ی زيايكردن مادده‌يل زه‌ردبه‌خش وه‌ك ( تامبه‌خش و شلكه‌ر و دژه ئۆكسيد و قوتيبه‌ن يا معه‌له‌ب )و چشته‌يل تاريخ كووتا يا ئكسپايه‌ر ، شايه‌ت خوه‌راك له‌وه‌خت ئاماده‌كردن و گه‌رمكردنی پيس بكا .
٢- پيسبوين وه‌و ميكرۆبه‌يله ك وه‌ل هه‌واو تووزه‌وه جياواز كريه‌ن له‌ڕيگه‌ی مه‌ل و مووريه‌وه .
٣- پيسبوين وه په‌ين كيمياوی و له‌ڕيگه‌ی سامپاشكردن مه‌ل ومووريه‌وه .
٤- پيسبوين وه دويكه‌ڵ و مادده‌يل ده‌ركرياگ له نه‌فت ك هه‌وا پيس كه‌ن و ئه‌وانيش خوه‌راك پيس كه‌ن .
٥- پيسبوين له‌ئه‌نجام مقه‌يه‌تيكردن خوه‌راك له كيسه‌و قوتی پلاستيك ، وه‌تايبه‌ت ئه‌وانه‌ك وه‌شيوه‌ی خاس و گونجياگيگ دروس نه‌كريانه .
٦- پيسبوين له‌ئه‌نجام مادده‌يل شه‌وقبه‌خش و ليزه‌ريه‌وه ك ترسناكترين جووره‌يل پيسبوينه .
ئمجا مقه‌يه‌تيكردن خوه‌راك له پيسبوين تويه‌نيم وه گرتنه‌وه‌ر ئی رينمايه‌يله مقه‌يه‌تی له پيسبوينی بكه‌يم :-
١- قه‌يه‌غه‌كردن وه‌كارهاوردن سامپاشی ئه‌را بان ته‌ندروسی و ژينگه‌و مه‌رزناين ئه‌را وه‌كارهاوردن په‌ين كيمياوی و سامپاشكردن مه‌ل ومووری وه‌شيوه‌ی خاسيگ .
٢- وه‌كارهاوردن ئاو پاك ئه‌را ئاوه‌دانی كشتوكاڵ .
٣- دابينكردن ئاو خواردن پاكيگ و پاكه‌وكردن گورج ئه‌مباره‌يل ئاو .
٤- قه‌يه‌غه‌كردن خواردنه‌يل ده‌مواز .
٥- ئه‌نجامداين وشكانن ته‌ندروسی و تاقيگه يا موختبه‌ر ده‌وره‌يی ئه‌را ئه‌وانه‌ك له‌مه‌يدانه‌يل پيشه‌سازی خوه‌راك كار كه‌ن .
٦- وه‌كارناوردن قوتی پلاستيك و كيسه‌ی نايلۆن ئه‌را مقه‌يه‌تيكردن خوه‌راك .
٧- سه‌ربڕين حه‌يوان له‌شوون تايبه‌ت و له‌ژير چه‌وديری پزيشك يا دكتۆر به‌يته‌ری .