شاره سیفه‌ته‌یل جوانیگ هه‌ڵگردیه و جوانترینیان ئه‌وه‌سه ك كه‌س نیه‌زانى له‌ى شاره كى سونیه و كى شیعه‌س، چوینكه گشت كه‌سیگ به‌شدارى كه‌ن له زینگه‌وكردن یاد عاشورا وه‌بى جیاوازى، وگشت لایگ وه‌یه‌كه‌و خوه‌یان ئاماده‌كه‌ن ئه‌را پیشوازى كردن له‌ى مانگه وه هه‌ڵداین په‌رچه‌م ڕه‌نگاوڕه‌نگ ودروشم یا شعاره‌یل دینى ك وه‌گه‌رمى پیشوازى له ساڵ هجرى كه‌ید و ستایش بنه‌ماڵه‌ى په‌یغه‌مبه‌ر مه‌زن (ص) كه‌ید، و مه‌ردم ئى شاره مه‌جڵسه‌یل عه‌زادارى حوسه‌ین گریه‌ده‌ن وه دریژى مانگ موحه‌ڕه‌م و خوراكه‌یل فره‌یگ به‌شه‌و كه‌ن جوور هه‌لیسه و قیمه، و له‌هه‌مان وه‌ختیش مه‌وكبدارى كه‌ن و هه‌ر ناوچه‌یك ده‌سه و مه‌وكب خوه‌ى درى، ك پیكهاتیه له پیاوه‌یل ژنه‌یل ومناڵه‌یل و وه‌چوارده‌ور شارا گڕ خوه‌ن تا ڕه‌سنه لاى حوسه‌ینیه‌ى گه‌ورا و له‌ورا سه‌ید حوسه‌ینیه‌گه پیشوازى له‌لیان كه‌ید تا عازیه‌تبارى له‌لى بكه‌ن، حوسه‌ینیه‌ى گه‌ورا فره كۆنه‌یه وله دیواره‌گانیه‌و دیاره ك ئه‌را مێژوو یا تاریخ كۆنیگ چووده‌وه، ئه‌وه‌یشه شایان ئاماژه وه‌پیداینه ك مه‌ردم ئى شاره هاوكارى یه‌كترى كه‌ن و یه‌یشه خوه‌شترین سیفه‌ته‌یل مه‌ردم ئى شاره‌سه وگشتیان میننه زه‌نجیره‌ى فره وه‌قه‌وه‌تیگ ك كه‌س نیه‌تویه‌نى بووڕیده‌ى، چوینكه گشتیان پشت یه‌كترى گردنه و چاره‌نویسیان یه‌كیگه و ئامانجیان یه‌كیگه و ئه‌ویش ئه‌وه‌سه ك دوباره بچنه‌و ئه‌را باوه‌ش كوردستان خوه‌شه‌ویسیان.