رياز جاسم محه‌مه‌د فه‌يلی
بايه‌د ئشاره‌ت بكه‌يمنه ئه‌ی باوه‌ته ك له دانيشتنه‌يل كوتايی په‌رله‌مان وه‌رين وڵات و وه‌رجله كوتايی هاتن وه‌كاره‌يلی، هه‌ريه‌ك له ياسا‌يل ده‌سه‌ی كيشمه‌كيشه‌يل مۆڵكداری ، و ياسای قه‌ره‌بوو زه‌ره‌دمه‌نده‌يل له‌لايه‌ن ده‌سه‌ڵات دكتاتۆری وه‌رين ك بايه‌د له‌يه‌كه‌و داينه‌يليگ له‌بان په‌سه‌ن كردن ئه‌ی ياسا‌يله ئه‌نجام بيه‌يم و بزانيم ك ئه‌ی ياسا‌يله تا چه‌نيگ وه‌ڕاسی كاركه‌ن ئه‌را چاره‌سه‌ر كردن كيشه‌ی كوچ وه‌پی كرياگه‌يل وه زوور له‌لايه‌ن ده‌سه‌ڵات دكتاتۆری وه‌رين وه تايبه‌ت كورده‌يل فه‌يلی ك وه‌خاتر بڕياره‌يل ده‌سه‌ڵات وه‌رين زوڵم فره‌يگ وه‌پيان كريا جوور بردن ناسنامه‌ی عيراقيان و دويره‌و خستن ناياساييان ئه‌را ده‌يشت سنووره‌يل وڵات و زندانی كردن ڕووڵه‌يليان و بردن ماڵ و مۆڵكيان و ئازارداين و له‌سێداره داين مناڵه‌يليان وه تاوانه‌يل نائنسانی فيشتريگ وه‌هه‌ق ئه‌ی لايه‌ن مه‌زڵوومه كريا و له‌چوارچيوه‌ی عيراق تازه بايه‌د ته‌قالا بكريه‌يگ وه‌گوره‌ی ده‌ستوور ئه‌ی لايه‌ن ره‌سه‌ن عيراقيه قه‌ربوو بكريه‌يگ و گشت ئه‌و زوور و زوڵمه ك هاله‌بانيان لاوه‌ن . بايه‌د ئشاره‌ت بكه‌يمنه ئه‌ی باوه‌ته ك له‌شوون ڕميان ده‌سه‌ڵات دكتاتۆری وه‌رين له ساڵ 2003 ته‌نيا به‌ش بويچگيگ له كيشه‌يل كورد فه‌يلی چاره‌سه‌ر كريا جوور ياسای ناسنامه‌ی عيراقی شماره‌ی 26 له ساڵ 2006 و ياسای ده‌سه‌ی چاره‌سه‌ر كردن كيشه‌يل مۆڵكداری شماره‌ی 2 له‌ساڵ 2006 و ياسای ده‌سه‌ی شه‌هيده‌يل له ساڵ 2006 و ياسای ده‌سه‌ی زندانيه‌يل سياسی شماره‌ی 4 له ساڵ 2006 وه هه‌ميش ئه‌و لايه‌نه‌يله ك له كورد فه‌يلی وه‌رگری كه‌ن وه‌ختيگ په‌رله‌مان عيراقی ياسای وه‌زاره‌ت كووچ و كووچ وه‌پی كرياگه‌يل شماره‌ی 21 له ساڵ 2009 په‌سه‌ن كرد ته‌قالايگ نه‌كردن و ئه‌و ياسا دادوه‌ری وه‌هه‌ق كووچ وه‌پی كرياگه‌يل وه‌زوور زامن نه‌كرد وه هه‌ميش له ياسای خزمه‌ت كردن و خانه‌نشين بوين سه‌ربازی شماره‌ی 3 له ساڵ 2010 زۆڵم فره‌يگ وه‌كورده‌يل فه‌يلی كريا چوينكه وه‌گوره‌ی ئه‌ی قانوونه بايه‌د ئه‌ندامه‌يل هێزه‌يل چه‌كدار بايه‌د له باوگ و داڵگ عيراقی بوون ك ئشاره‌ت راسه‌وخۆيگه وه كورده‌يل فه‌يلی . هويچ كه‌س نه‌بايه‌د له‌وه‌راوه‌ر زۆڵمه‌يليگ وه‌كورده‌يل فه‌يلی كرياس بیده‌نگ بنيشيگ و بايه‌د گشت لايه‌نه‌يل وڵات ته‌قالا بكه‌ن ئه‌را لاوردن زۆڵم له‌لابان ئه‌ی لايه‌ن ڕه‌سه‌نه .