ئه‌كا ئمجا ئه‌و كومه‌ڵه چ وه‌شيوه‌ی ملله‌ت و چ وه‌شيوه‌ی نه‌ته‌وه‌و و چ وه‌شيوه‌ی مه‌ردم نيشته‌جای جوگرافی تايبه‌ت بوون ؛ ك ئه‌و ده‌زگايه‌يليشه بايه‌د له خوه‌شی و ته‌نگی وه‌ل ئه‌و مه‌ردمه بوون ك ته‌عبير له ئراده‌و هوير و به‌رژه‌وه‌ندييان ئه‌كا و تا ئه‌وره‌گ تويه‌نی بووده جامه‌كيگ ئه‌را ئه‌وه‌گ خوه‌شيه‌يل و بوونه‌يل نيشتمانی و ئاينی و ناخوه‌شيه‌يل جوور كاره‌ساته‌يل گه‌وراو و ڕويداگه‌يل ناخوه‌ش و كيشه‌و گرفته‌يل ئه‌و مه‌ردمه ئه‌ڕا ڕای گشتی ناوخوه‌يی و ده‌ره‌كی نيشان بيه‌ێد. ئه‌وه‌گ بنووڕيگه تلفزيونه‌يل كوردی يا گوش به‌يگه ڕاديو يا ڕووژنامه‌يل و گوڤاره‌يل و چاپه‌مه‌نيه‌يل وه‌شيوه‌ی گشتی بخوه‌نی باوه‌ته‌يل جووراوجوور دوينی و ژنه‌فی و خوه‌نيگ و بڕيگ له‌و باوه‌ته‌يله شايه‌د سوودمه‌نديش نه‌ون و ته‌نيا ئه‌را ئه‌وه‌سه ك وه‌خته‌گه‌يان يا لاپه‌ڕه‌يلی وه‌پييان پڕه‌و بكه‌ن. ئه‌ڕا نموونه تلفزيونه‌يل كوردی هه‌ر ڕووژ كوڵه به‌رنامه‌يليگ ديرن له ژير ناوونيشان وينه هه‌واڵ ك هه‌ر ڕويداگيگ بويچگ و ئاسايی له هه‌رشوينيگ ئی جه‌هان پيه‌ن و وه‌رينه له شه‌ريكه‌يل به‌رهه‌م تلفزيونی وه پويل سيننه‌ی و نيشان مه‌ردم ده‌نه‌ی جوور له‌يه‌ك داين دو ئۆتۆمۆبيل له فڵانه وڵات و نوقم بوين به‌له‌ميگ ماسی گرتن له فڵانه شوين له دنيا، يا كه‌سيگ ك كاريگ ئه‌ڵاجه‌وی ئه‌نجام ده‌يگ جوور كيشان ئۆتۆمۆبيليگ وه‌دگان و يا به‌رنامه‌يگ چه‌ن ده‌قيقه‌يی له‌باوه‌ت هونه‌رمه‌نديگ يا كه‌سايه‌تييگ بيگانه.
وه له‌هه‌مان وه‌خت ڕويداگه‌يل و كاره‌ساته‌يل گه‌ورای ملله‌ته‌گه‌يان ك هه‌زاران خانه‌واده‌و بنه‌ماڵه ، داخدار و سيه پووش ئه‌كا له هويره‌و به‌ن و چمانی نه كاره‌ساتيگ بويه و نه‌يش خه‌وه‌ر له‌لی ديرن. ئه‌ڕا نموونه گشت ملله‌ت عراق وه‌كورد و عه‌ره‌ب و نه‌ته‌وه‌و تايفه‌يلتر خاس زانن ك له سه‌ره‌تای مانگ نيسان ساڵ ١٩٨٠ ڕژيم به‌عس وه‌دركردن بڕياريگ نائنسانی و زاڵمانه ، ناسنامه‌ی عراقی له‌نزيكه‌ی نيم مليون كورد فه‌يلی سه‌نه‌و و ئيكه‌ش وه‌پای په‌تی و له ناو كيڵگه‌يل مين ڕه‌وانه‌ی ئيرانيان كرد و ده‌س نا‌بان سه‌روه‌ت و سامانيان و دوياخريش نزيكه‌ی پانزه هه‌زار جوان كورد فه‌يلی له تاقيگه‌ی چه‌كه‌يل كومه‌ڵ كوژ ، مه‌واد ژاراوی وكيمياوی له‌بان له‌شيان دپيه‌كه‌و كرد، وه‌بی ئه‌وه‌گ تاوانيگ داشتوون ؛ ته‌نيا له‌وه‌رئه‌وه‌گ كورد بوين و شوون ده‌سيان له خه‌بات ئازاديخوازی ملله‌ته‌گه‌يان ديار و به‌رجه‌سته بوی و سه‌دانيان چه‌ك شه‌ره‌ف پێشمه‌رگايه‌تی كردوينه شان ئه‌را ئه‌وه‌گ له جه‌نگ ڕزگاری ملله‌ته‌گه‌يان هاوبه‌ش بوون ؛ وه‌لی وه‌داخه‌وه هه‌ميش ئويشيم وه‌داخه‌وه له‌ی ڕووژه‌يله ميديای كوردی، نه تلفزيون و نه ڕاديو و نه ڕووژنامه‌يل هويچ ئاماژه‌يگ وه‌كاره‌سات كوچ وه‌پيكردن نزيكه‌ی نيم مليون هاوزوان كورد خوه‌يان و كوشتن وه‌كومه‌ڵ هه‌زاران جوان كورد فه‌يلی له زندانه‌يل نوگره سه‌لمان و ئه‌بوغورێب نه‌كرد و چنه دياره هه‌ر له بنه‌ڕه‌ت وه‌هاوزوان و ڕووڵه‌ی ملله‌ته‌گه‌يان نيه‌زاننه‌يان و چمانی له گووش گا خه‌فتنه. من له كوتايی ئی باوه‌ته ئی پرسياره‌يله ئاراسه‌ی وه‌ڕه‌يوه‌ر و وه‌رپرس ميديايل كوردی و نويسه‌ره‌يل و ئه‌ديبه‌يل و سه‌رجه‌م قه‌ڵه‌م وه‌ده‌سه‌يل كورد كه‌م و ئوميدوارم ئه‌را ميژوو وڵاميان بيه‌نه‌و.
*ئايا ميديای كوردی خه‌وه‌ر له كاره‌سات و جينۆسايد كردن نيم مليون كورد فه‌يلی نه‌يری؟
* ئايا ميديای كوردی تراجيدی كورد فه‌يلی نه‌گ جوور كاره‌ساتيگ نه‌ته‌وه‌يی ، ته‌نانه‌ت جوور كاره‌ساتيگ ئنسانييش نيه‌نووڕيگه پی؟
* ئايا ئاواره بوين نزيكه‌ی نيم مليون كورد و شه‌هيد كردن زياتر له پانزه هه‌زار جوان كورد فه‌يلی چه‌نه ديمانه‌يگ وه‌ل هونه‌رمه‌نديگ ئه‌رای ئه‌رزش نه‌يری؟
*يا هه‌له بنه‌ڕه‌ت ڕه‌نج و مه‌ينه‌ت كورد فه‌يلی وه‌به‌شيگ له ڕه‌نج و مه‌ينه‌ت ملله‌ت كورد حه‌ساو نيه‌كه‌ن ؟
*يا توايگ وه‌ی بی ده‌نگيه وه‌يه‌كجاری ناو كورده‌يل فه‌يلی له ميژووی ملله‌ت كورد بسڕيگه‌و؟
*يا كاره‌سات كورد فه‌يلی نيه‌تيه‌رزی چه‌ن ده‌قيقه‌يگ له وه‌خت به‌رنامه‌يليان يا ستوونيگ له ڕووژنامه‌يليان وه‌پێ پڕه‌و بكه‌ن؟
يانه پرسياره‌يلگن ك ميديای كوردی جوور ئه‌ركيگ نه‌ته‌وه‌يی و ئه‌خلاقی بايه‌د جواويان بيه‌يگ تا لايه‌ن كه‌م وجدان خوه‌ی له‌ی باوه‌ته ئاسووده بكا.