خستنه‌ریو ئی دوسیه هه‌رماوه جاریگ نیشانه‌ی ئه‌وه‌سه ك كیشه‌ی ناونی هه‌ردوولات وه‌شیوه‌ی ریشه‌یی چاره‌سه‌رنه‌كریاگه وئه‌وه‌گ تائیسه ئه‌را ئی كیشه‌كریاگه چاره‌سه‌روه‌ختی بیوه و ئه‌وه‌گ له‌ی چه‌ن روژدیواخره له‌ناونی به‌غداوكوه‌یت ریودا ئی قسه‌مانه سابت كه‌یگ . هه‌ردولاله ری ته‌سریحه‌یل ئعلامی له به‌رژه‌وه‌ندی ولاته‌گه‌یان ومله‌ته‌گه‌یان وه‌رگری كه‌ن وهه‌رلایگیان پاساویا ته‌بریره‌یل خوه‌یان ئه‌راقسه‌گانیان دیرن . هه‌روه‌وجوره‌گ گشت زانن ئی دوسیه یامله‌فه تازه نیه وبه‌لكم ریشگی ئه‌را سه‌ردمه‌یل دامه‌زریان هه‌ردو ولات ئه‌چیده‌و ؛ له‌یره ئی پرسیاره خوه‌ی قوته‌و كه‌یگ ك ئه‌ویش ئه‌وه‌سه چه ریودا ك ئی دوسیه له‌ی وه‌خته وه‌ی جوره بكه‌فیگه‌بان ووه‌گه‌رمی باس بكریه‌ی ؟
بی گومان عراق له‌شیون ئالوگورنیسان ٢٠٠٣ ئومیدواربیوك لاپه‌ره‌یل گوزه‌یشته نه‌گ ته‌نیا وه‌ل كوه‌یت به‌لكم وه‌ل گشت ولاته‌یل هاوسا بوه‌سیگ ؛ له‌وه‌رئه‌وه‌گ تاوانه‌یلی ك رژیم گوه‌زه‌یشته ئه‌نجامیان داس نه‌بایه‌د مله‌ت عراق تاوانی بیه‌یگ یامه‌سئولیه‌تی بگریگه مل ؛ چیون مله‌ت عراق وه‌رجله مله‌ت كوه‌یت له‌سیاسه‌ته‌یل سه‌رشیتانه‌ی رژیم به‌عس زه‌ره‌دمه‌ن بیووگشت نه‌ته‌وه‌و تایفه‌یل مله‌ت عراق له‌و سیاسه‌ته‌یله نارازی بیون وئمرویش نه‌بایه‌د مه‌سئولیه‌ت نه‌فامی وسه‌رشیتی رژیم به‌عس گوروه‌گوربكه‌فیگه ملی .
مله‌ت عراق ئمروچه‌وه‌ری وه‌ده‌س هاوردن حه‌قه‌یل خوه‌ی كه‌یگ وله‌نوای ئه‌وحه‌قه‌یلیشه ده‌رچگن له‌ژیربارفه‌سل هه‌فتومه ك سه‌ینی فه‌ره‌یگ خستگه‌سه بان شان هاولاتیه‌یل ؛ ئمجا وه‌ل ئاماده‌كاریه‌یل عراق ئه‌راده‌رچگن له‌ژیربارئه‌وفه‌سله ؛ ده‌وله‌ت كوه‌یت وه‌شیوه‌ی فه‌رمی یاره‌سمی ئعلان كرد ك له دیداروگوفتوگو كاروه‌ده‌سه‌یل ئی ولاته وه‌ل ئه‌میندارگشتی نه‌ته‌وه‌یل یه‌كه‌وگرتگ ونوینه‌ر ولاته‌یل ئه‌ندام دایمی له ئه‌نجومه‌ن ئاسایش ته‌قالاكریه‌ی عراق له‌ژیرئه‌و فه‌سله بمینیگه‌ی تاوه‌ختیگ گشت پابه‌ندیه‌یل خوه‌ی له‌باوه‌ت داگیركردن كوه‌یت جیوه‌جی بكه‌یگ . عراق تازه‌و سیستم دبلوماسیی له‌بان هه‌ره‌شه‌كردن ووه‌كاربردن زوان زور بنیای نه‌نریاگه ؛ به‌لكم وه‌عه‌كسه‌و عراق توایگ دوسانه‌ترین وخاسترین په‌یوه‌ندی وه‌ل جه‌هان و وه‌تایبه‌ت ولاته‌یل هاوساداشتوگ ئه‌ویش له‌بان بنه‌وای دخاله‌ت نه‌كردن له‌كاروباریه‌كتری و ئمجا لاپه‌ره‌یل گه‌رم عراق وكوه‌یت وه‌ته‌سریحه‌یل ئعلامی چاره‌سه‌رنیه‌كریه‌ن به‌لكم ئی كیشه نیازوه‌ئارامی ودانیشتن كاروه‌ده‌سه‌یل پایه به‌رزهه‌ردو ولات دیری تاوه‌شیوه‌ی مه‌سئولانه وئه‌را به‌رژه‌وه‌ندی هه‌ردومله‌ت كاربكه‌ن وه‌تایبه‌ت ك كاروه‌ده‌سه‌یل پایه به‌رزولاته‌گه‌مان په‌یوه‌ندی نزیك وبرایانه‌یگ وه‌ل ده‌سه‌لاتداره‌یل كوه‌یتی دیرن وئی په‌یوه‌ندیه‌یله هن ئمرو نین به‌لكم په‌یوه‌ندییگه ك چه‌ن ده‌یه وه‌رجله ئیسه وه‌شیوه‌ی بته‌و بنیای نریاس وتیوه‌نی گشت گریه كوره‌یل ناكوكیه‌گان وازبكه‌ن وته‌سریحات ره‌سمی كاروه‌ده‌سه‌یل پایه‌به‌رزهه‌ردولا له‌ی باوه‌ته نیشانه‌ی ئه‌وه‌سه ك هه‌ردولا توان كیشه‌گان وه‌شیوه‌ی برایانه چاره‌سه‌ربكه‌ن تانه‌وگه قه‌یران یائه‌زمه‌یگ له‌ناونی هه‌ردولا و ئه‌رائی كاره‌یش بایه‌د ری ودبلوماسی هه‌ردوولات بدریه‌ی تا نه‌خش یاده‌ورخوه‌ی له‌ی قوناغه بازی بكه‌یگ وكه‌شوهه‌وایگ گونجیاگ ئه‌رای وه‌دی باریگ . له‌كوتایی مه‌نگه بیوشیم ك عراقیه‌یل له گشت ته‌قالاو چالاكیه‌یلیان نینه ته‌ما كیشه‌وگرفت وه‌ل ولاته‌یل ومله‌ته‌یلتردروس بكه‌ن له‌وه‌ر ئه‌وه‌گ هانه‌وباوه‌ره ك ئاوه‌دانی ولات له‌ی قوناغ یامه‌رحه‌له هاله‌نوای گشت به‌رنامه‌و پروژه‌گانیان .