مه‌يدان خودبه‌ختكردن له‌وه‌ر به‌رژه‌وه‌ندی گشتی و به‌رژه‌وه‌ندی خوه‌ی وه‌ل به‌رژه‌وه‌ندی مه‌ردما بووگ و ڕه‌زامه‌نی ملله‌ت وه‌ده‌س باريگ و ته‌ماح وه ماڵ ملله‌ت نه‌خه‌يگه نوای ئاسووده‌يی وژدانه‌وه ؟ مه‌به‌س باسه‌گه‌مان له‌يرا ئه‌وه‌سه لايگ بكه‌يمنه لای په‌رله‌مانتاره‌يل دويه‌كه‌و ئمڕوو ، ك چوين تا دويه‌كه هه‌وڵ و ته‌قلای ئه‌وه دان وه‌هه‌ر شيوه‌يگ بووگ ده‌نگ مه‌ردم بارنه ده‌س له هه‌ڵوژاردنيان له‌وه‌رخاتر ئه‌وه‌ك ئاره‌زووه‌يليان بايگه دی و بچنه ژير چه‌تر په‌رله‌مان و بڕه‌سنه ئامانجه‌يل خوه‌يان ، چوينكه له‌و شوونه وه‌گشت ئازادييگه‌وه ره‌فتار خوه‌يان كرديان و فره‌يش له‌ليان وه‌بی ئه‌وه‌ك هساو ئه‌را حورمه‌ت و سه‌نگ ئه‌و شوونه بكه‌ن ك له‌تی بوينه نوێنه‌ر ملله‌ت جوير دوشمن ملله‌ت هه‌ڵسووكه‌فت كرديان و لوجنه‌يگ يا دادگايگ سه‌روه‌خوه‌يی نه‌وی چه‌وديری ئه‌و حاڵه‌ته‌يله بگرداگه خوه‌ی و هساو وكتاو وه‌ل سه‌رپيچيكه‌ره‌يلا بكرداگ و په‌رله‌مانتار له‌يوا بوی جوير ئه‌وه‌ك گشت ده‌سڵاتيگ وه‌ده‌س خوه‌ی بووگ له‌ريڕه‌و خوه‌ی لادياگ و باس له‌قسه‌و باوه‌ته‌يليگ كردياگ دڵ فره كه‌س وه‌پی زه‌خمدار و ناڕه‌حه‌ت كردياگ و له‌وه‌رخاتر به‌رژه‌وه‌ندی مه‌ردمانيگ ده‌س كردياگه گه‌نڕه‌فتاری و قسه‌وه‌شانن و ناوزڕانن مه‌ردمانيگ تر هه‌ر وه‌ئاشكرا ، وه‌لی ئمڕوو له‌يوا دياره وه‌زع وه‌شيوه‌يگ تر گويڕيه‌يگ و دی ئه‌وه نيه‌مينيگ هه‌ر كه‌سيگ و ، وه مه‌رام خوه‌ی په‌يمانه بكاو هه‌رچی ناهه‌قی و ناسزاييه وه‌ئازاد بوشيگ و كه‌سيگ نه‌وگ پرس وپرسكاری وه‌ليا ئه‌نجام به‌يگ . ئه‌گه‌ر تا دويه‌كه زه‌مينه خوه‌ش بوی ئه‌را ئه‌و په‌رله‌مانتاره‌يله ك له‌مه‌رز پيرووز ئه‌ركه‌يليان بازپه‌ڕان بكه‌ن و تواسيان له‌و مه‌نبه‌ره‌وه كيشه‌و گرفت دروس بكه‌ن و شيوای شيو بكه‌فيگه وڵات و هويچ سه‌قامگيری و ئارامييگ روی نه‌يه‌يگ و ئی تايفه‌گه بكه‌نه دژ ئه‌واكه‌ی تر و ئی نه‌ته‌وه‌گه ئه‌واكه‌ی تر وه‌پی قه‌بول نه‌وگ و هه‌ميشه وه‌ربه‌س دروس كرديان له‌وه‌رده‌م گشت چاره‌سه‌ريگ و هه‌ق هه‌قخورياگه‌يل وه ره‌وا نه‌زانستيان يا هه‌رچی به‌زم وڕه‌زمه له‌ژير كڵاويان بوی ، ئه‌وه ئمڕوو چشتگه جووريگ تره‌و ئيسه‌ودويا بايه‌سه خوه‌يان بشارنه‌وه له‌و جووره ره‌فتاره‌يله‌و مه‌رز خوه‌يان وه‌ته‌واوی بزانن و نه‌چنه قه‌ره‌ی (بڤه)و هه‌ر كاريگ ك زه‌ره‌د بڕه‌سنيگ .
پاريزبه‌ندی يا حصانه ، وه‌مه‌عنای مه‌رز نه‌شكانن تيه‌يگ له‌ڕه‌فتار و چوينيه‌تی هه‌ڵسووكه‌فت ، ك وه‌كورديه‌گه‌ی خوه‌مان (بايه‌سه پاريز بكه‌يد له‌و چشته‌يله ك بوونه مايه‌ی سه‌رژان و مه‌ترسی) ، له‌يه‌ودويا وه‌گشت ئازادييگه‌وه توينيم ئه‌و كه‌سه‌يله يا ئه‌و په‌رله‌مانتاره‌يله ك تا دويه‌كه مه‌ردم ئازاری كردن و ته‌سريحات ناوه‌جی و ناپه‌سه‌ن دان بخه‌يمنه ژير ده‌سڵات هه‌ق و دی نه‌يليم وه هه‌وه‌س خوه‌يان په‌يمانه بكه‌ن ، چوينكه له‌يوا دياره ئه‌و پاريزبه‌ندی يا حصانه له‌ليان ئه‌ڵگيرياو دی خوه‌يان شارنه‌و له‌و ره‌فتاره‌يل ناپه‌سه‌ن و ناڕه‌سه‌نه ك تا دويه‌كه تيكه‌ڵ هويرو باوه‌ڕيان بوی . ئمجا وه‌ل ريز وحورمه‌تمان ئه‌را په‌رله‌مانتار هويرواز و خاوه‌ن سه‌رڕشته‌ی به‌رز ك هه‌ميشه هه‌وڵ و ته‌قلای ئه‌وه ده‌ن گشت پيكهاته‌يل له‌يه‌ك نزيكه‌و بكه‌ن و له‌گشت قسه‌و باوه‌ته‌يليان خه‌ير كاڵن و چنه پيری به‌رژه‌وه‌ندی گشتيه‌وه .