كوومه‌ڵگای كورديمان و هه‌ر وه‌سه‌به‌ب ئه‌و سستم سياسی ديموكراتيه ك پياده كريا چه‌نه‌ها لايه‌ن دروس بوين ئه‌را خزمه‌تكردن به‌رژه‌وه‌نديه‌يل جياواز ملله‌ته‌گه‌مان ك راده‌ی هه‌وڵ و چالاكيه‌يل ره‌سيه ركابه‌ری يامونافسه‌و ره‌خنه‌گرتن له‌ده‌سڵات وه‌ناو ئۆپۆزسيۆن . مه‌عنای ئه‌وه‌سه تويه‌نيم بويشيم سه‌ره‌تای خاسيگ په‌يابوی له ديموكراتيه‌ت ك وه‌ئازادی بتويه‌نيگ هويرو باوه‌ڕ خوه‌ی ده‌رخه‌يگ و حورمه‌تی بگيريه‌يگ و بڕه‌سيگه راده‌يگ به‌ره ياجه‌بهه‌يگ دروس بووگ چه‌واشه‌ی هويروڕای ده‌سڵات وه‌ناو ئۆپۆزسيۆن ، ئمجا ئه‌گه‌ر بتوايم تاريف ئۆپۆزسيۆن بكه‌يم وه‌گشتی ، ئه‌وه پيكهاتگه له‌و پارت و ريكخرياگ و گرووپه‌يله له‌ژير چه‌تر ديوكراتيه‌ت وه‌شيوه‌ی ئاشتيانه‌و هه‌مان وه‌خت وه نه‌فوه‌رگرتن له‌وه‌زع ئازادی ره‌خنه له‌ده‌سڵات گرن ئه‌را خزمه‌ت به‌رژه‌وه‌ندی وڵات . وه‌لی دويای دروسبوين ئه‌و له‌شكر وه‌رفراوانه وه‌ناو سه‌نته‌ر و ريكخرياگ و لايه‌نه‌يل جووراوجوور ك له‌ڕی قانوونه‌وه موڵه‌ت كاركردن وه‌رگرتن سه‌ختی كه‌فته ناو چوينيه‌تی كاركردن ك تاراده‌يگ ئه‌و كاركردنه هه‌رچه‌نی له‌به‌رنامه‌يانيش نه‌ويگ هه‌ر كار ئه‌رای كردنه يا وه‌چه‌واشه‌ی به‌رنامه‌وه كار كردنه‌و بڕه‌سيگه راده‌يگ ك تائيسه نه‌تويه‌نن به‌شيگ له‌ئامانج گشتی و تايبه‌ت بارنه‌ده‌س ، يه‌يش بيجگه ئه‌و هه‌مگه پشتگيری و كارئاسانيه ك ده‌سڵات ئه‌رايان كرده‌سه‌ی و بايه‌سه ئيسه وڵات وه‌كلتووره ماددی و مه‌عنه‌ويه‌گه‌يه‌وه هويچی له‌وڵاته‌يل پيشكه‌فتگ جه‌هان كه‌متر نه‌وياتاگ ، وه‌لی وه‌سه‌به‌ب لاداين و پشتگووشخستن چوينيه‌تی كار ريكخرياگی و ئامانجه‌يل گشتيی نه‌ته‌وه‌يی وه‌شيوه‌يگ گشتی ك كه‌فته ناو كاركردنيانه‌وه له‌يوا له‌لی هات ئه‌و ريكخرياگ و لايه‌نه‌يله ك هاوكار ده‌سڵاتن يا نه‌يار ده‌سڵاتن له‌يه‌ك جياوه نه‌كريه‌ن يا هويچ لايگ له‌ليان پرووژه‌يگ نه‌ياشتووگ ئه‌را پڕه‌وكردن شيوه‌ی كاركردن ، به‌ڵكوو له‌ژير كاريگه‌ری كه‌سی تويش جووره تويڕه‌ييگ بوون و بڕيار ئمڕوو له‌خزمه‌ت سوو نه‌وگ و هه‌ر وه‌گووره‌ی رويداگ رووژ گوزه‌ر بكه‌ن .
هيمان گشت ئه‌و هه‌قه‌يل ديموكراتی نه‌ته‌وه‌ييمانه وه‌و راده‌يشه يه‌كلاوه نه‌كرياگه ك قوناغ و هوشياره‌وكردن له‌وپه‌ڕی ئازادی بووگ جوير ئه‌و كيشه‌يله ك وه‌ل حكوومه‌ت مه‌ركه‌زی عراقا هه‌س ، مه‌رز كاركردن ئازاديش قانوون ريكی خه‌يگ ئه‌را خزمه‌ت به‌رژه‌وه‌ندی گشتی . مه‌عنای ئه‌وه‌سه كريه‌يگ ده‌سڵات له‌بان بنه‌مای قانوونيگ ديموكرات وئازاد ده‌رفه‌ت به‌يگه لايه‌ن ئۆپۆزسيۆن ئه‌را كارو ره‌خنه‌گرتن ، وه‌لی نيه‌وگ هه‌ر لايه‌نيگ كه‌فته به‌ره‌ی ياجه‌بهه‌ی ئۆپۆزسيۆن جه‌نگ وئاشتی تيكه‌ڵ بووگ له‌لای ، چوينكه ئۆپۆزسيۆنيش بايه‌سه پشت وه رای و هه‌ق وداواكاريه‌يل گشتی بووه‌سيگ ، ئمجا ئه‌و جووره خه‌باتيشه ك ئيسه هه‌س وه‌ناو ئۆپۆزسيۆنه‌وه ، وه‌رده‌وام ها له‌به‌رزی و نزمی و لايه‌ن و ريكخرياگه‌يليش تيكه‌ڵ و شيوياگن ، له‌وه‌ر ئه‌وه هه‌وه‌جه وه قانوونيگ گشتی كريه‌يگ ئه‌را خه‌بات ئۆپۆزسيۆن ك كاركردنيان مه‌ترسی نه‌خه‌يگه بان به‌رژه‌وه‌نديه‌يل گشتی و نه‌وگه مايه‌ی ناكووكی ناونی رزه‌يل ملله‌ت .