د. سۆزان ئامێدى/ جوور ئه‌وه‌گ باس ئه‌كريه‌ێد، له عه‌ممان پرووژه‌يگ خه‌ريكه ريكخريه‌ێد و وه‌و خاتريشه تائيسه دو دانيشتن ئه‌نجام درياگه‌و بڕ 120 مليۆن دۆلاريش هه‌واڵه‌ى بانك عه‌ره‌بى كرياگه له‌لايه‌ن لايه‌نيگه‌و(من نازانم كييه)، وه‌لێ دو كه‌س هه‌ن ناودارن و ئاماده‌ى ئه‌و دانيشتنه‌يله بوين، ك ئه‌ويش سعه‌د به‌زاز وه‌شيوه‌ى سه‌رپه‌رشتيار له‌بان پرووژه‌گه‌و محه‌مه‌د سه‌رۆك په‌رله‌مان عراقى ك ره‌سيه دانيشتن دويه‌م.
باس له‌وه ئه‌كريه‌ێد ك كادره‌يل ئى پرووژه(سياسى سنى)و وه‌رجه رووژه‌يليگ سه‌ردان ده‌وڵه‌ت ئيمارات كردنه‌و باڵيۆز ئه‌مريكايش دوياى راوێژ و ريككه‌فتن ئه‌مريكى بريتانى ئاماده‌ى دانيشتن بويه وه‌بى ئه‌وه‌گ زويتر ئاگادار ئاماده‌بويه‌يل له‌و دانيشتنه بك، ك له‌يوا دياره ئى پرووژه ره‌زامه‌نى ده‌وڵه‌ت ئسرائيل وه‌ده‌سهاوردگه.
له‌ڕاسى من باوه‌ڕم ئه‌وه‌سه ده‌س ئه‌جنداى جوراوجوور له‌پشت ئى پرووژه بدێ، له‌وه‌ختيگ ك ئه‌نبار ئاوه‌يل ژير زه‌وێ فريه‌يگ ديرێد وه‌تايبه‌ت له‌و ناوچه ك وه‌پى ئويشريه‌ێد ئه‌لڕيشه، بيجگه سامانه‌يل تر ك وه‌به‌ر ناوريانه‌و دوير نيه ئسرائيل ته‌ماى كردوێد يا به‌رژه‌وه‌ندييگ له‌تى داشتوود و هه‌زاران فلستينى له‌تى جيگير بكه‌ن، ئمجا ئى دو مه‌سه‌له‌يشه گرنگى فريه‌يگ ديرن له‌لاى ئسرائيل.
وه‌لێ وه‌نسبه‌ت ئه‌را ده‌وڵه‌ت ئيمارات ك ميواندارى دويا دانيشتنه‌گه كرد، باوه‌ڕم ئه‌وه‌سه ئى پرووژه(فيدراڵيه‌ت ئه‌نبار)بدێ وه ئه‌وه‌گ دريژه‌ده‌ر ده‌وڵه‌ته‌يل سنيه‌و يه‌يش دڵنيايى و نيشانه‌ى سه‌قامگيرى ئه‌ياد وه‌ئه‌وه‌گ پرووژه‌ى ئيرانى له دريژه‌وبوين بڕيه‌ێد.
له‌ڕاسى مه‌ردم ئه‌نيار ناكووكيه‌يل وه‌رده‌واميگ داشتنه وه‌ل حكومه‌ت ناوه‌ندى عراقى هه‌ر له‌سه‌رتاى دامه‌زراننيه‌و بيجگه ناتواناييان له به‌شداريكردن كارايگ له خوه‌ينيشانداينه‌يل ئيسه نه‌وه‌گ تومه‌ت تيرۆر بخه‌نه پاڵيان.
هه‌ر وه‌و خاريشه دياره ك لايه‌نه‌يل سياسى سنى سه‌ربار ئه‌وه‌گ زويتر سيسته‌م فيدراڵيه‌ت ره‌ته‌و كردن، وه‌لێ ئيسه قورتاربوين له‌تى دويننه‌و.