دروسكردن ئداره‌يگ مه‌ده‌نی له‌شوون ئنتداب بريتانی بوينه پيشبينی له گوزه‌يشتيگ ك شايه‌ت له‌شوون سه‌روه‌خوه‌يی ئه‌و وڵاته بووگه مه‌رجه‌عيگ ناوخوه‌يی و هه‌ريمی و هه‌مان وه‌خت وه‌ل هه‌وه‌جه‌يل ئاينده‌يا بچووگ ، چوينگه عراق كيشه‌ی فره‌تر بويه له‌و ده‌وڵه‌ته‌يل عه‌ره‌بيه ك كيشه‌ی نه‌ته‌وايه‌تی داشتنه‌و چاره‌سه‌رنه‌كردن ئی مه‌سه‌له‌ی گرنگ يا موهميشه هووكاريگ كاريگه‌ر بويه ك ئه‌و وڵاته ئاسايش سياسی و ئه‌منی وه‌خوه‌يه‌وه نه‌وينيگ وبه‌شداريكردن نه‌ته‌وه‌يگ له‌لايه‌ن ده‌سڵاتداره‌يليگ ك وه ئه‌قڵيه‌ت كويه‌نه‌په‌رسی هه‌ر وه‌ره‌و دويا كار كرديان و ئه‌نجام كاره‌يليانيش له‌ماده‌يگ سڕكه‌ر وه‌ختی زياتر نه‌وی ، ئه‌وه‌سه ك هه‌ر وه‌ختيگ ئه‌قڵيه‌تيگ هويره‌وكردن هه‌مان ديد جاران بوياتاگ دی چشتيگ نه‌مه‌نده‌وه باس له‌لی بكه‌يگ و ئاينده‌يش له‌وه‌رچه‌و بگريگ .
بيگومان هويچكام له رژيمه‌يل وه‌رين چ سستم پاشايه‌تی چ كووماری ، ئه‌وه‌نه له‌خه‌م قايمكردن ده‌سڵات خوه‌يان بوينه ئه‌وه‌نه كار له‌بان بنياتناين كوومه‌ڵگا و تاك نه‌كردنه وه‌جووريگ ك ده‌ور بنه‌ڕه‌تی بوينيگ له‌داناين و دامه‌زرانن وڵاتيگ ك له‌تی ده‌ستوور و ئازادی بوونه ستوين ئداری حكوومه‌تيگ دامه‌زرياگی و قانوون له‌تی باڵاده‌س بووگ ، ئيسه‌يش ئاساييه ئه‌گه‌ر بويشيم بيجگه ئه‌وه‌ك عراق ها له‌ناو پرووسه‌يگ ديموكراسی و تاريفی وه ئه‌وه بكه‌يم ك له‌روی ديموكراسيه‌وه چشت فره‌يگ ده‌سه‌وه‌ر نه‌كردگه له ديموكراسيه‌ت و له‌مه‌رز خوه‌ی زياتر كه‌فته‌سه نوای رويداگه‌يل ، چوينكه كوومه‌ڵگای عراقی هيمان كاريگه‌ری دين و مه‌زهه‌بی ها له‌بانی ، عراق ديموكراسيه‌تيگ ديريگ هيمان به‌رژه‌وه‌نديه‌يل حزبی و ناوچه‌يی ده‌ور دوينن له كاراكردن سياسه‌ت خودمه‌جالداين له ده‌سكه‌فته‌يل ده‌ستووری و ئه‌و ئداره‌ی هاوبه‌ش پيكهاته‌يل سياسيه ك ديموكراسيه‌ت ته‌وافقی هاورده‌ی وجوود .
كورد ئه‌گه‌ر له‌لايه‌ن كوومه‌ڵايه‌تی و ئابووريه‌وه گرفت دويرماوه‌يگ داشتويگ ، ئه‌وه له‌ژيان سياسی ولايه‌ن حزبی نه‌ويه‌سه كيشه‌و گرفت يا وه‌ربه‌س دروس نه‌كردگه ك گيان تايفی و نه‌ته‌وه‌يی شوون وه فكر تازه‌گه‌ری چووڵ بكه‌يگ ، يا لايه‌نيگ و حزبيگ باوه‌ڕ وه هه‌ڵوژاردن وژيان هاوبه‌ش سياسی نه‌ياشتووگ ، بيگومان جياوازی و هويروباوه‌ڕ و چشته‌يل تر له نرخ ديموكراسيه‌ت هه‌ريم كوردستان كه‌مه‌و نه‌كردگه ك هه‌ر لايه‌نيگ و چه‌قوو خوه‌ی تيژ بكه‌يگ .
ده‌سڵات چ بكه‌فيگه ده‌س زوورمينه يا كه‌مينه ، مادام ئازادی و هه‌قه‌يل ئه‌را گشت مه‌ردم دابين كه‌يگ ئه‌وه بيگومان وه شه‌رعی و قانوونی دانريه‌يگ ، ديموكراسی ئه‌وه‌سه ك وه راسی په‌يڕه‌و بكريه‌يگ ، ئمجا خراو وه‌كارهاوردن پۆسته‌يل ئداری و په‌خشه‌وبوين گه‌ناته‌كاری له دام و ده‌زگايه‌يل گونای ديموكراسيه‌ت نيه ، چوينكه پرووسه‌ی سياسی له عراق هيمان خوه‌ی نه‌گرتگه‌و ريڕه‌و دروسيگ نه‌يريگ .