کەنعان موڕاد/ لەی رووژەیلە، كۆمپانیای پۆست گشتی، لە وەزارەت پەیوەندیەیل عراق، پوولیگ وە وینەی شاعر رەحمەتی محمد مەهدی جەواهری،  وە ساڵیاد کووچکردنی دەرکرد.  

وەزارەتەگە بەیاننامیگ وەو کار گرنگە دەرکرد، ک وینەی شاعریگ وەزوان عەروی (فصيح) شعرەیلی نویسان، و بویە جی شانازییگ ئەرا گشت عەرەو، ک ناو (گەپترین شاعر عەرەب) بڕینە باڵای. 

ئی کارە وە فەرمان ئەنجومەن وەزیرەیل عراق رەسیە ئەنجام، ک یە ٢٥ ساڵە ئەو شاعرە کووچ کردیە.  

جەواهری، هەرچەن عەرەو بوی، باوجی گرنگی وە باوەت کوردی دیاد، و ئەو کڵاو سەریە، بەڵگەیگە ک باوەت کورد هەمیشە لەبان سەری بوی. 

وەلێ ئی حکومەت ئیسە، ک ئەو پوولە وە وینەگەی جەواهیری دەرکرد، کەفتە گیچەڵ گەورەیگ، چوینکە هەڵەی فرە گەورەیگ کردیە، لە ریزوان ئەو نویسینە ک لەبان پوولەگە نویسایە، و هەر کەسیگ کەمیگ لە زوان عەروی بزانێد، ئەو هەڵە ئاشکرا کەێد، ک بایەتە ووشەی (العشرین) بوودە (العشرون).    

ئی پوولە ک نرخەگەی ١٥٠٠ دینارە، سێ هەزار دەنگ لەلی چاپ کریایە، و لە گشت میدیایل راگەیانن،  سۆشیال میدیا بڵاوی کریا، و نەزانستنە ک ئی هەڵەی گەورە کردنە.     

دیارە ک رەحمەتی جەواهری، دویای مردنیش، لە ستەم حکومەتی قورتار نیەوود.