، وه‌ئاماده‌بوين شماره‌يگ فه‌ره له كه‌سايه‌تيه‌يل سياسی و ڕووشنهويری و ئه‌ندامه‌يل چالاك ڕێكخرياگه‌يل كۆمهڵگای مه‌ده‌نی و شماره‌يگ له ڕووژنامه‌نويسه‌يل، كۆڕيگ له ژير ناونيشان ( وه‌ده‌سه‌ودان ئاشتيانه‌ی ده‌سه‌ڵات ) له باره‌گای ده‌زگای شه‌فه‌ق له به‌غدای پايته‌خت وه‌ڕيه‌و چوی.
سه‌ره‌تا، كۆڕه‌گه وه ده‌قيقه‌يگ وسيان وبيده‌نگی ئه‌ڕا گيان پاك شه‌هيده‌يل ده‌س وه‌پی كرد و له دويای وه‌خه‌ير هاتن كردن ميوانه‌يل و ئاماده‌بويه‌يل له لايه‌ن ڕێكخه‌ره‌يل كۆڕگه، حه‌يده‌ر قوتبی ڕووژنامه‌نويس و مامۆستای زانكۆ كۆڵه‌باسيگ له‌باره‌ی تاريخ ده‌سه‌ڵاتداری و ده‌سه‌ڵاتداره‌يل و چوينيه‌تی ده‌سوه‌ده‌س كردن ده‌سه‌ڵات له‌ناونيان له سه‌رتاسه‌ر دنيا وه‌گشتی و له عێراق وه‌تايبه‌ت پێشكه‌ش وه ئاماده‌بويه‌يل كرد.
ناوبرياگ له سه‌ره‌تای باسه‌گه‌ی ئاماژه وه‌و خاڵه‌يل گرنگه كرد ك بايه‌ته ئه‌را وه‌ده‌سه‌وداين ده‌سه‌ڵات وه شيوه‌يگ ئاشتيانه له حكوومه‌تيگه‌وه ئه‌را حكوومه‌تيگ تر وه‌گووره‌ی ده‌ستوور وڵات له‌وه‌رچه‌و بگريه‌ێ ؛ قوتبی هه‌ميش ڕۆڵ يا ده‌ور ده‌زگايل ڕه‌سانن له‌ی باره‌وه وه گرنگ زانست.
دوياتر دكتۆر نهی الد‌رويش وه‌ڕيه‌وبه‌ر ڕێكخرياگ كۆمهڵگای عيراقی نموونه‌يی و پسپۆر له كاروبار ڕێكخرياگه‌يل كۆمهڵگای مه‌ده‌نی ، وته‌يگ پێشكه‌ش وه ئاماده‌بويه‌ل كۆڕه‌گه كرد. ده‌رويش له وته‌گه‌ی باس له فامستن مانای ڕاسه‌قينه‌ی وه‌ده‌سه‌وداين ئاشتيانه‌ی ده‌سه‌ڵات كرد و وت: ئيمه وه‌رجله گشت چشتيگ بايه‌سه وه‌وردی له مانای وه ده‌سه‌وداين ئاشتيانه‌ی ده‌سه‌ڵات بڕه‌سيمنه‌و تا بتويه‌نيم جيوه‌جی و په‌يڕه‌وی بكه‌يم. له‌لايگتره‌و ناوبرياگ ئاماژه وه گرنگی ڕۆڵ و كاريگه‌ری ئامێره‌يل ڕه‌سانن و ده‌زگايل ڕاگه‌ياندن و ڕێكخرياگه‌يل كۆمهڵگای مه‌ده‌نی و بايه‌خدانيان وه‌ی مه‌سه‌له‌ی چاره‌نويسسازه كرد و وه شيوه‌يگ گشتی له ڕه‌سانن عێراقی و ڕێكخرياگه‌يل كۆمهڵگای مه‌ده‌نی له‌وه‌ر كه‌مته‌رخه‌می و گرنگی نه‌دانيان وه‌ی مه‌سه‌له‌ی گرنگ و هه‌ستياره ڕخنه گرد و هووكار ڕه‌خنه‌گه‌ی ئه‌را ئه‌وه برده‌وه ك، وه‌و جووره‌گ بايه‌ته بوود، گرنگی وه‌ی باوه‌ته نه‌يانه و ئه‌رك خوه‌يان وه‌خاسی و وه‌ته‌واوه‌تی جيوه‌جی نه‌كردنه.
وه‌ڕيه‌وبه‌ر ڕێكخرياگ كۆمهڵگای عيراقی له به‌شيگتر قسه‌گانی باس له ڕۆڵ و كاريگه‌ری ديموكراسی له بوار وه ده‌سه‌وداين ئاشتيانه‌ی ده‌سه‌ڵات له وڵاته‌يل دنيا كرد و وه فاكته‌ريگ گرنگ له‌ی باوه‌ته له‌قه‌ڵه‌می دا و له‌بان په‌يڕه‌و كردن پرۆسه‌ی ديموكراسی ئه‌را ده‌سوه‌ده‌س كردن ئاشتيانه‌ی ده‌سه‌ڵات له ناونی كابينه‌يل حكوومه‌ت عێراقيش جه‌خت كرد و له‌شان ئه‌وه‌يش له‌وه‌رچه‌و گرتن دادپه‌روه‌ری ئينتقالی ( العدالة الانتقالية ) له كۆمه‌ڵگا وه‌گرنگ وه‌سف كرد.
دوياتر مهند الكنانی وه‌ڕيه‌وبه‌ر تووڕ عێراقی (عه‌ين) ئه‌را چاودێری كردن هه‌ڵوژاردن، وه هوير و ئه‌ڕای چوين خوه‌ی له گفتوگووه‌يل كۆڕه‌گه به‌شداری كرد و وه‌پيچه‌وانه‌ی قسه‌يل الد‌رويش ، ڕۆڵ ڕێكخرياگه‌يل كۆمهڵگای مه‌ده‌نی و چالاكيه‌يليان ئه‌را سه‌ركه‌فتن پرۆسه‌ی هه‌ڵوژاردن په‌رله‌مانی له عێراق به‌رز نرخان و وه ڕۆڵيگ كاريگه‌ر و گرنگ له‌ی مه‌يدانه له قه‌ڵه‌می دا.
شايان باسه ، كۆڕه‌گه ك ئه‌ڕا ماوه‌ی دو سه‌عات دريژه كيشا وه به‌شداری و گفتگوو شماره‌يگ له ئاماده‌بويه‌ل كووتايی وه پی هات.
 |
 |
 |
 |
 |
 |
 |
 |
 |
 |
 |
|
 |
 |
 |
 |
 |
 |