؛ وله‌ی راسا دیداره‌یل و گوفتوگوه‌یل وهامشوو له ناونی سه‌رجه‌م لایه‌نه‌یل سیاسی زیاتره‌و بیوه‌و یه‌یش له وه‌ختیگه هاوپه‌یمانیه‌یل ده‌وره‌ی گوزه‌یشته نزیكه بشیویه‌ن وهاوپه‌یمانیه‌یل تازه‌یگ وه‌دی تیه‌ن ؛ ئه‌را نمونه جه‌بهه‌ی ته‌وافوق وه ته‌واوه‌تی شیویاس و ته‌نیا ئه‌وه مه‌نگه به‌یانیگ ره‌سمی ده‌ر بكه‌ن و كوتایی عومر ئه‌وجه‌بهه ئعلان بكریه‌ی ؛ له قایمه‌ی عراقیه چه‌ن شه‌خسیه‌ت جیابیونه‌وه‌ی خوه‌یان ئعلان كردن له‌وانه‌یش عزه‌ت شابه‌نده‌ر و سه‌ید ایاد جه‌مال الدین و پێشبینی كریه‌ی شه‌خسیه‌ته‌یل تریش له روژه‌یل ئاینده له‌و قایمه جیاوه بوون ؛ قایمه‌ی ئئتلافیش له زیوه‌و ناكوكی كه‌فتنه ناو لایه‌نه‌یلی وهه‌ر له یه‌كم ساڵ دامه‌زرانن په‌رله‌مان و حكوومه‌ت مالكی حزب فه‌زیله و ته‌یار سه‌دری ك دوو لایه‌ن سه‌ره‌كی ناو ئئتلافه‌گه بیون جیاوه بیون وئیسه هه‌وڵ و ته‌قالایه‌ل فه‌ره‌یگ دریه‌ی تا ئئتلاف ناوبریاگ وه شیوه‌یگتر زینگه‌و بكه‌ن وهه‌ر لایه‌نیگیش ئه‌را به‌شداری كردن له‌و ئئتلافه مه‌رج تایبه‌ت خوه‌یان دیرن ؛ قایمه‌یلتر ناو په‌رله‌مان ئیسه‌ی عراقییش هه‌ر كام گرفته‌یل خوه‌یان دیرن و ناكوكوكی كه‌فتگه‌سه ناونیان ؛ سه‌رجه‌م ئی گوڕانكاریه‌یله ئه‌وه نیشان ده‌ن ك نه‌خشه‌ی سیاسی وڵات وه‌ره‌و گۆڕان بنه‌ڕه‌تییگ چوود وله چه‌ن هه‌فته‌ی ئاینده ئئتلافه‌یل تازه‌یگ تیه‌نه مه‌یدان و ئی ئئتلافه‌یله وینه‌یگ له ئاینده‌ی سیاسی عراق نیشان ده‌ن ؛ زورم كارناسه‌یل و پسپۆره‌یل كاروبار سیاسی ناوخوه‌یی و بیگانه هانه‌و باوه‌ڕه ك ئیجاره لایه‌نه‌یل ئسلامی شیعه نه‌تیوه‌نن ئه‌و ده‌نگه‌یل ده‌وره‌ی گوزه‌یشته وه ده‌س بارن له‌وه‌ر ئه‌وه‌گ له‌ی چوار ساڵه ك حكوومه‌ت و زورم ئه‌ندامه‌یل په‌رله‌مان له هێزه‌یل شیعه بیونه و كارنامه‌ی ئئتلاف شیعی له‌ی چوارساڵه سه‌ركه‌فتن و ده‌سكه‌فته‌یل له‌یوایگ له‌تی نیه بیجگه پێشكه‌فتن بویچگیگ له بوار ئه‌منی ك ئه‌ویش پایدار نیه و یه‌یش هیلیگ زورم ده‌نگده‌ره‌یل ره‌ئی خوه‌یان ئاڵشت بكه‌ن ئه‌ویش وه‌خاترئی خاڵه‌یله :
١- كاره‌یل و پرۆژه‌یل خزمه‌ت گوزاری جوور كاره‌با و ئاو و قه‌یران نیشته‌جا بیون و بیكاری و گرانی هه‌ر جوور خوه‌یان مه‌ننه‌سه‌و و مه‌ردم هیوچ ئاڵشت و ئوڵشتیگ له‌ی باوه‌ته نه‌ینه تا ئه‌را چوار ساڵ ئاینده ده‌نگ بیه‌نه لایه‌نه‌یل مه‌زه‌بی .
٢- گه‌ناته‌كاری جوور خوره سه‌ر تا پای سیستم حكوومه‌ت گرتیه‌سه‌وه‌ر و له‌ی فه‌تره ته‌نیا وه‌زیر بازرگانی ئستجواب كریاو له سه‌ر كار لاوریا و ئه‌ویش هیوچ گوڕانیگ له ژیان مه‌ردم وه‌دی ناورد .
٣- كێشه‌یل ناونی هه‌رێم كوردستان و به‌غدا جوور خوه‌ی مه‌نگه‌سه‌ی و له به‌عزی شیون ناكوكیه‌يل ئه‌و قه‌ره تونده‌و بیون ك نزیك بیو هێز پێشمه‌رگه‌و جه‌یش عراقی بیه‌ن له‌یه‌ك و جه‌نگیگ به‌رپا بیواتاگ ك دیواخر كۆنترۆڵ كردنی زه‌حمه‌تیو.
٤- راسه‌وكردنه‌یل ده‌ستووری بیجگه بڕیگ ماده هه‌ر جوور خوه‌یان مه‌نگه‌سه‌یان و ناكوكیه سه‌ره‌كیه‌گان وه‌بی چاره‌سه‌ر مه‌ننه .
بیجگه ئه‌وكێشه‌یل سه‌ره‌كیه ده‌یان و شاید سه‌دان كێشه‌و گرفت بویچگ هه‌س ك مه‌ردم روژانه ده‌س و په‌نجه وه‌لیا نه‌رم كه‌ن .وه له وه‌رچه‌و گردن ئه‌وخاڵه‌یله له ئاست ناوخوه‌یی و كێشه‌و گرفته‌یل حكوومه‌ت مالكی وه‌ل وڵاته‌یل هاوسا جوور كوه‌یت له باوه‌ت خه‌ساره‌ت داگیركردنی له لایه‌ن رژیم رمیاگ به‌عس و ئيران وه‌خاتر دخاڵه‌تی له كاروبار داخلی عراق و توركیه وه‌خاتر به‌سان سه‌رچاوه‌یل ئاو و سوریه وه‌خاتركل كردن چه‌كداره‌یل توندڕه‌و ئه‌را ناو خاك عراق و هه‌میش گرفته‌یل حكوومه‌ت مالكی وه‌ل به‌عزی له وڵاته‌یل جه‌هان ؛ وه‌دیور زانریه‌ی ده‌نگده‌ر عراقی ئیجاریشه جوور گوزه‌یشته ده‌نگ خوه‌یان بیه‌نه ته‌یار مه‌زه‌بی و شایه‌د مه‌ردم ئیجاره‌گه بتوان لایه‌نه‌یل لیبرالی وعلمانی تاقی بكه‌ن وه‌ئومید ئه‌وه‌گ كه‌می له گرفته‌یلیان چاره‌سه‌ربوود .